Drew Nacino

Sisimulan na ngayong araw ng Truth Commission na binuo ng Simbahang Katolika at mga civil society group ang una nitong pagdinig upang idokumento ang mga umano’y extrajudicial killings kaugnay ng kampanya kontra droga ng administrasyong Duterte.

Ayon kay dating ICC judge, Atty. Raul Pangalangan, isasagawa ang unang pagdinig sa Pope Pius Center sa Maynila.

Nilinaw ni Pangalangan na walang kapangyarihan ang komisyon na magsampa ng kaso o magbigay ng hatol, pero layunin nitong pakinggan ang mga biktima, tipunin ang kanilang testimonya, at gumawa ng ulat na maaaring isumite sa mga ahensya ng pamahalaan at international human rights organizations.

Isa anya sa mga tatalakayin ang kaso ni Raymart Siapo, 19-anyos na napatay noong 2017 sa Navotas habang ilalahad din ang resulta ng pagsusuri sa kanyang labi.

Ipinaliwanag din ni Pangalangan na hindi layunin ng komisyon na siraan ang sinuman kundi ilabas ang katotohanan.

Pormal nang hiniling ng US government sa Pilipinas ang pag-extradite kay Kingdom of Jesus Christ founder, Pastor Apollo Quiboloy, upang harapin nito ang mga kasong sex trafficking at racketeering charges sa Estados Unidos.

Kinumpirma ni Philippine Ambassador to the US Jose Manuel “Babe” Romualdez na noong isang buwan pa ipinadala ng Amerika ang formal request at na-transmit na sa Department of Justice.

Kasalukuyang nakapiit sa Pasig City Jail ang 76-anyos na religious leader, na malapit na kaibigan at spiritual adviser ni dating Pangulong Rodrigo Duterte dahil sa mga kasong sexual, child abuse, at human trafficking.

Kabilang si Quiboloy sa Most Wanted List ng Federal Bureau of Investigation ng US dahil sa sex trafficking by force, fraud and coercion, sex trafficking of children, at bulk cash smuggling.

Matapos ang pitong taong legal battle, nagtagumpay ang negosyanteng si Annabelle Arcilla Margaroli, pangulo ng OMI-JKG Philippines, at kanyang foreign partner na si Marinus Harinck matapos ibasura ng Quezon City Regional Trial Court Branch 90 ang interpleader case.

Bunsod ito ng joint withdrawal ng complaint ng Land Transportation Office official na nag-imbestiga sa nasabing kaso ng OMI-JKG ni Margaroli at Harinck, pangulo ng J. Knieriem B.V., manufacturer at importer ng mga plaka ng D.O.T.R. at L.T.O. mula Netherlands.

Ang interpleader ay inihain sa utos ni dating LTO Executive Director Romeo Vera Cruz dahil sa pagharang ng dating local business partner, na si Christian Calalang ng Power Plates Development Concept, sa 470 million pesos na halaga ng imported blank license plates.

Bagaman ipinag-utos ng korte ang pag-release sa pondo, aminado sina Margaroli at Harinck na malaki naman ang kanilang naging financial loss bunsod ng pitong taong paggulong ng kaso.

Sa ngayon ay hinihintay pa nila ang nakabinbing amendment sa kautusan upang tuluyan na nilang ma-i-deliver ang lahat ng nalalabing blank plates at makumpleto o matapos ang kanilang kontrata.

Samantala, nagpapatuloy ang magkakahiwalay na kasong kriminal laban kina Calalang at iba pang dating opisyal ng kumpanya, kabilang ang mga reklamong qualified theft, estafa, perjury, at falsification, habang ang mga akusasyon ay nananatiling nakabinbin sa mga korte at kinauukulang ahensya.

Naghain din si Margaroli ng cyber libel at disbarment complaints laban sa abogado ni Calalang na si Mark Tolentino kaugnay ng mga alegasyon sa ProCap at iginiit niyang isa rin siya sa mga naging biktima ng online gaming system at isa sa mga unang nagsampa ng syndicated estafa case laban sa mga Singaporean operator nito.

Dudulog sa Senate Impeachment Court ang House prosecution upang linawin ang naging pahayag ni Senador Robin Padilla na walang karapatan ang prosekusyon na magtanong sa mga senator-judge.

Ayon kay House Impeachment Prosecutor Terry Ridon, nais niyang maliwanagan kung talagang nakasaad sa mga patakaran ng korte na bawal magtanong ang anumang partido sa senator-judges, kahit “clarificatory question” lamang ito.

Naniniwala si Congressman Ridon na may karapatan ang defense o prosecution panel na magtanong at humingi ng paglilinaw mula sa mga nag-uusisang senador na tumatayong mga hukom.

Pag-uusapan din anya ng kanilang panig kung kakailanganin pa ng “formal” o “oral manifestation” para sa naturang paglilinaw upang magsilbing gabay na rin sa magkabilang panig.

Nasakote na sa Pasay City ang tatlong suspek sa pagpatay kay dating Abuyog, Leyte Vice Mayor James Bohol at anak nitong si Carlo James.

Kinilala ang isa sa mga suspek na si alyas “Mak” na umaming humingi umano sa nakatatandang Bohol ng palugit sa pagbabayad ng tseke at nagbanta pa ang dating bise alkalde laban sa kanya at kanyang pamilya, kaya’t dinukot ang mag-ama.

Naaresto sina alyas “Mak,” na pawang residente ng Basey (Ba-say), Northern Samar, sa tulong ng Anti-Kidnapping Group at Criminal Investigation and Detection Group matapos matunton ng mga awtoridad ang ginamit nilang sasakyan sa krimen.

Ayon kay Brig. Gen. Jason Capoy, director ng Police Regional Office-8, natunton ang iniwang Mitsubishi GLX Mirage sa Barangay Tingib habang nakatulong ang Global Positioning System footage recorder na ibinigay ng car rental company upang masundan ang galaw ng mga suspek.

Lumabas din sa imbestigasyon na iniwan ng mga suspek ang isang Toyota Hilux sa Sariaya, Quezon bago sila naaresto sa Pasay City.

Patay na nang matagpuan si dating Abuyog, Leyte Vice Mayor James Bohol at anak nitong si Carlou James o Jimbo sa Silago, Southern Leyte tatlong araw matapos silang napaulat na dinukot.

Narekober ang bangkay ng mag-ama mag-a-alas diyes kahapon ng umaga sa isang bangin na nasa pito hanggang walong metro ang lalim sa gilid ng kalsada.

Kinumpirma ni Abuyog Mayor Lemuel Gin Traya ang pagkamatay ng dalawa matapos ipabatid ng Philippine National Police.

Kinondena naman ng alkalde ang insidente at nagpaabot ng pakikiramay sa pamilya ng mga biktima habang tiniyak ang suporta ng lokal na pamahalaan upang makamit ang hustisya.

Blangko pa ang P.N.P. sa pagkakakilanlan ng mga suspek at maging sa motibo sa krimen.

Namemeligro ng kapusin pa ang budget pang-noche buena ng mga Pilipino, lalo ang mga “uring manggagawa”, mahigit dalawang linggo bago mag-pasko.

Ito’y makaraang sumirit pa ang presyo ng karneng baboy sa 380 pesos ngayong linggo mula sa dating 320 pesos kada kilo noong mga nakaraang araw batay sa monitoring ng SUKI Consumer Network.

Ayon kay SUKI Consumer Network spokesperson Amihan Mabalay, bukod sa baboy, nananatiling mataas ang presyo ng carrot kahit pa tiniyak ng Department of Agriculture na may mga imported na paparating.

Karamihan din anya sa mga nanay na kanilang tinanong ay pawang pork menudo ang posibleng ihanda sa tradisyunal na noche buena pero nanganganib na tipirin nila ito dahil sa mahal na karne at sangkap.

Maliban sa karne’t gulay, tinukoy din ni Mabalay na nananatiling mahal ang bigas sa kabila ng pagpupursige ni Pangulong Ferdinand Marcos Junior na pababain sa 20 pesos ang presyo nito bilang bahagi ng kanyang pangako noong 2022 presidential elections.

Isa naman sa nakikitang solusyon ng nasabing consumer group ang pagtanggal sa value added at excise taxes, na makatutulong upang mapababa ang presyo ng mga pagkain, lalo ang karne at gulay.

Nanumpa na bilang bagong Ombudsman si dating Justice Secretary Jesus Crispino Remulla.

Pasado alas-diyes ng umaga nang dumating si Remulla sa Korte Suprema sa Padre Faura, Maynila, kung saan pinangasiwaan ni Supreme Court Senior Associate Justice Marvic Leonen ang kanyang panunumpa.

Bago italaga bilang Justice Secretary, nagsilbi si Remulla bilang Kinatawan ng 3rd District ng Cavite mula 2004 hanggang 2010, at ng 7th District mula 2010 hanggang 2013.

Naging Gobernador din ng Cavite si Remulla mula 2016 hanggang 2019, at muling nahalal bilang Kinatawan ng 7th District bago italaga sa Department of Justi

Niyanig ng magnitude 4.4 na lindol ang lalawigan ng La Union kaninang alas-10:30 ng umaga.

Ayon sa PHIVOLCS, natunton ang sentro ng pagyanig sa layong 3 kilometro hilagang-silangan ng bayan ng Pugo at may lalim na 23 kilometro.

Naramdaman ang Intensity IV sa Pugo at Tubao, La Union at Baguio City;

Intensity III naman sa Itogon, Benguet; Villasis, Pangasinan; at San Fernando, La Union.

Tectonic ang origin ng lindol, at walang inaasahang aftershocks o pinsala matapos ang pagyanig.