Drew Nacino

Namemeligro ng kapusin pa ang budget pang-noche buena ng mga Pilipino, lalo ang mga “uring manggagawa”, mahigit dalawang linggo bago mag-pasko.

Ito’y makaraang sumirit pa ang presyo ng karneng baboy sa 380 pesos ngayong linggo mula sa dating 320 pesos kada kilo noong mga nakaraang araw batay sa monitoring ng SUKI Consumer Network.

Ayon kay SUKI Consumer Network spokesperson Amihan Mabalay, bukod sa baboy, nananatiling mataas ang presyo ng carrot kahit pa tiniyak ng Department of Agriculture na may mga imported na paparating.

Karamihan din anya sa mga nanay na kanilang tinanong ay pawang pork menudo ang posibleng ihanda sa tradisyunal na noche buena pero nanganganib na tipirin nila ito dahil sa mahal na karne at sangkap.

Maliban sa karne’t gulay, tinukoy din ni Mabalay na nananatiling mahal ang bigas sa kabila ng pagpupursige ni Pangulong Ferdinand Marcos Junior na pababain sa 20 pesos ang presyo nito bilang bahagi ng kanyang pangako noong 2022 presidential elections.

Isa naman sa nakikitang solusyon ng nasabing consumer group ang pagtanggal sa value added at excise taxes, na makatutulong upang mapababa ang presyo ng mga pagkain, lalo ang karne at gulay.

Nanumpa na bilang bagong Ombudsman si dating Justice Secretary Jesus Crispino Remulla.

Pasado alas-diyes ng umaga nang dumating si Remulla sa Korte Suprema sa Padre Faura, Maynila, kung saan pinangasiwaan ni Supreme Court Senior Associate Justice Marvic Leonen ang kanyang panunumpa.

Bago italaga bilang Justice Secretary, nagsilbi si Remulla bilang Kinatawan ng 3rd District ng Cavite mula 2004 hanggang 2010, at ng 7th District mula 2010 hanggang 2013.

Naging Gobernador din ng Cavite si Remulla mula 2016 hanggang 2019, at muling nahalal bilang Kinatawan ng 7th District bago italaga sa Department of Justi

Niyanig ng magnitude 4.4 na lindol ang lalawigan ng La Union kaninang alas-10:30 ng umaga.

Ayon sa PHIVOLCS, natunton ang sentro ng pagyanig sa layong 3 kilometro hilagang-silangan ng bayan ng Pugo at may lalim na 23 kilometro.

Naramdaman ang Intensity IV sa Pugo at Tubao, La Union at Baguio City;

Intensity III naman sa Itogon, Benguet; Villasis, Pangasinan; at San Fernando, La Union.

Tectonic ang origin ng lindol, at walang inaasahang aftershocks o pinsala matapos ang pagyanig.

Tiniyak ng Department of Public Works and Highways na walang substandard o ghost flood control projects sa Muntinlupa City at lahat ng proyekto ay aprubado ng Central Office.

Tugon ito ng DPWH sa liham ng Sangguniang Kabataan Federation sa pangunguna ni Councilor Jonas Abadilla, SK Federation President ng Muntinlupa, na humiling ng paglilinaw sa mga flood control projects sa kanilang lungsod — partikular ang dalawang proyekto sa Barangay Poblacion na nagkakahalaga ng ₱143.5 milyon.

Sa kanilang liham na ipinadala noong Setyembre 25, mula sa Barangay Poblacion at Southville 3, tinanong ng mga kabataan kung sino ang nagpapasya sa pagpili ng mga proyekto, ano ang mga batayan sa pagpapatupad, at kung kabilang ba ang Muntinlupa sa mga proyekto na iniimbestigahan ng kagawaran.

Kabilang sa kanilang binanggit na proyekto ay ang ₱49-milyong flood control project sa Barangay Poblacion at ₱94.5-milyon sa Southville 3.

Pinuri naman ng DPWH District Engineering Office ang SK sa pagiging mapagmatyag at ipinaliwanag na ang project identification at implementation ay pinangangasiwaan ng kagawaran, katuwang ang local government units at district representatives.

Gayunman, ang DPWH Central Office pa rin ang may final approval sa ilalim ng General Appropriations Act na ipinapasa ng Kongreso.

Ayon sa DPWH, tinutukoy ang flood control projects batay sa community vulnerability, technical studies, at proteksyon ng umiiral na imprastraktura.

Naniniwala si ICC assistant to counsel, Atty. Kristina Conti na oras na lamang ang hinihintay para maglabas ng arrest warrant ang International Criminal Court laban kina Senador Ronald Dela Rosa at dating Justice Secretary Vitaliano Aguirre.

Kaugnay ito sa kinakaharap na kasong crimes against humanity laban kay dating Pangulong Rodrigo Duterte.

Ayon kay Atty. Conti, maka-ilang beses nang binanggit sina Dela Rosa at Aguirre sa mga court documents partikular sa public redacted version na ipinost sa website ng pre-confirmation brief ng prosekusyon ng I.C.C.

Batid naman na anya marahil ng senador na maaari siyang ipa-aresto ng korte lalo’t siya ang naging hepe ng Philippine National Police nang ilunsad ang giyera kontra droga.

Gayunman, aminado si Conti na ang tanging tanong na lamang ay kailan ilalabas ang mandamyento de aresto.

Una nang inihayag ng mambabatas na nakahanda siya sakaling maglabas ng warrant of arrest ang ICC laban sa kanya kaugnay sa mga kinakaharap na kaso ni dating Pangulong Duterte.

Bubusisiin na rin ng Department of Public Works and Highways ang posibleng kaugnayan ng fake o “ghost” insurance bonds sa libu-libong flood control projects.

Aminado si Public Works and Highways Secretary Vince Dizon na kung ikinukunsidera bilang “ghost” ang isang proyekto, maaaring iligal din ang insurance coverage nito.

Ayon sa kalihim, makikipag-usap sila sa Insurance Commission lalo’t napakaraming maaaring habulin sakaling mapatunayang dinaya rin ang insurance coverage ng mga flood control project.

Dapat anyang magsumite ang mga contractor ng retention money bonds sa pamamagitan ng insurance companies, na mag-i-issue naman ng certification na kailangan para maipagpatuloy ang isang proyekto.

Gayunman, inamin ni Dizon na may posibilidad na ilang insurance firms ang bahagi ng modus sa pamamagitan ng pag-issue ng fake certifications nang walang actual payments.

Bukod dito, pinag-aaralan na rin ng D.P.W.H. kung maaari pang marekober ang bonds para sa mga mas lumang proyekto, lalo kung ang saklaw ng warranties ay limang taon o higit pa.

Mariing itinanggi ni Public Works and Highways Secretary Manuel Bonoan ang kumakalat na alegasyon sa social media na anim na mambabatas ang nakakuha ng 800 billion pesos na halaga ng mga proyekto para sa flood control.

Sa pagharap ng kalihim sa pagdinig ng House Committee on Public Accounts, tinawag ni Bonoan ang naturang paratang bilang “preposterous” o lubhang katawa-tawa at walang anumang batayan, sa pagtalakay ng mga programa ng ahensya.

Binanggit naman ni Senior Deputy Speaker David “Jay-Jay” Suarez ang isyu, na tumukoy sa isang viral Facebook post na nagsasabing may ilang kongresista umanong nagmaniobra ng pondo para sa sariling interes.

Para sa kapakanan ng katotohanan, tinanong ni Suarez ang kalihim hinggil sa malisyosong post habang sinegundahan ito ni Ako Bicol Party-list Rep. Alfredo Garbin at inalam kung may umiiral bang 800 billion pesos na alokasyon ang DPWH para sa anim na kongresista.

Gayunman, pinabulaanan ni Bonoan ang isyu at iginiit na wala ito sa kanilang record.

Samantala, nilinaw ni Committee Chair at Bicol Saro Party-list Rep. Terry Ridon na hindi galing sa lehitimong media outlet ang alegasyon kundi mula lamang sa isang blog post sa Facebook.

Kinondena ni Zambales 1st District Rep. Jay Khonghun si Vice President Sara Duterte kaugnay ng pahayag nito na peke ang kabaitan ni Pangulong Ferdinand Marcos Junior at nakipagsabwatan umano ito sa International Criminal Court para arestuhin ang kanyang ama na si dating Pangulong Rodrigo Duterte.

Ayon kay Khonghun, walang basehan ang pahayag ng Bise Presidente, hindi totoo at iresponsable.

Iginiit ng kongresista mula Zambales, isa sa mga pinuno ng Young Guns bloc sa Kamara, na malinaw ang paninindigan ni Pangulong Marcos na huwag makialam sa ICC kaugnay ng kaso ng dating Pangulo, na nahaharap sa kasong crimes against humanity kaugnay ng madugong kampanya ng administrasyon nito kontra sa iligal na droga.

Hindi lamang aniya katawa-tawa ang teorya ng sabwatan ni VP Duterte kundi isa ring mapanganib na tangkang linlangin ang publiko at mag-udyok ng kaguluhan sa bansa.

Itinanggi rin ng mambabatas na nagkukubli si Pangulong Marcos sa kabaitan, sa halip ay pinamumunuan nito ang bansa nang may kahinahunan, prinsipyo at respeto sa batas taliwas sa mga lider na kailangang sumigaw, manakot at magsinungaling para mapansin.

Nananawagan na rin ang Alliance of Transport Operators and Drivers Association of the Philippines (ALTODAP) na aprubahan na ang matagal na nilang hiling na provisional fare increase sa jeep.

Bunsod pa rin ito nang walang prenong oil price increase na sumirit pa dahil sa bakbakan ng Israel at Iran.

Ayon kay ALTODAP President Boy Vargas, matagal nang nagpapakahirap ang mga jeepney driver sa patuloy na pagsirit ng presyo ng krudo habang hinihintay ang desisyon ng gobyerno sa hiling na dagdag pasahe na tatlong taon ng naka-tengga.

Kung hindi naman anya ibibigay ang fuel subsidy ay maiging pagbigyan na lamang ang kanilang hirit na fare increase na tila kinakalawang na sa LTFRB.

Nitong Martes nang ipatupad ng mga oil companies ang unang sigwada ng kanilang bigtime price increase na sinundan ng ilan pang kumpanya kanina habang bukas magpapatupad ang iba pa.