Drew Nacino

Tiniyak ng Department of Public Works and Highways na walang substandard o ghost flood control projects sa Muntinlupa City at lahat ng proyekto ay aprubado ng Central Office.

Tugon ito ng DPWH sa liham ng Sangguniang Kabataan Federation sa pangunguna ni Councilor Jonas Abadilla, SK Federation President ng Muntinlupa, na humiling ng paglilinaw sa mga flood control projects sa kanilang lungsod — partikular ang dalawang proyekto sa Barangay Poblacion na nagkakahalaga ng ₱143.5 milyon.

Sa kanilang liham na ipinadala noong Setyembre 25, mula sa Barangay Poblacion at Southville 3, tinanong ng mga kabataan kung sino ang nagpapasya sa pagpili ng mga proyekto, ano ang mga batayan sa pagpapatupad, at kung kabilang ba ang Muntinlupa sa mga proyekto na iniimbestigahan ng kagawaran.

Kabilang sa kanilang binanggit na proyekto ay ang ₱49-milyong flood control project sa Barangay Poblacion at ₱94.5-milyon sa Southville 3.

Pinuri naman ng DPWH District Engineering Office ang SK sa pagiging mapagmatyag at ipinaliwanag na ang project identification at implementation ay pinangangasiwaan ng kagawaran, katuwang ang local government units at district representatives.

Gayunman, ang DPWH Central Office pa rin ang may final approval sa ilalim ng General Appropriations Act na ipinapasa ng Kongreso.

Ayon sa DPWH, tinutukoy ang flood control projects batay sa community vulnerability, technical studies, at proteksyon ng umiiral na imprastraktura.

Naniniwala si ICC assistant to counsel, Atty. Kristina Conti na oras na lamang ang hinihintay para maglabas ng arrest warrant ang International Criminal Court laban kina Senador Ronald Dela Rosa at dating Justice Secretary Vitaliano Aguirre.

Kaugnay ito sa kinakaharap na kasong crimes against humanity laban kay dating Pangulong Rodrigo Duterte.

Ayon kay Atty. Conti, maka-ilang beses nang binanggit sina Dela Rosa at Aguirre sa mga court documents partikular sa public redacted version na ipinost sa website ng pre-confirmation brief ng prosekusyon ng I.C.C.

Batid naman na anya marahil ng senador na maaari siyang ipa-aresto ng korte lalo’t siya ang naging hepe ng Philippine National Police nang ilunsad ang giyera kontra droga.

Gayunman, aminado si Conti na ang tanging tanong na lamang ay kailan ilalabas ang mandamyento de aresto.

Una nang inihayag ng mambabatas na nakahanda siya sakaling maglabas ng warrant of arrest ang ICC laban sa kanya kaugnay sa mga kinakaharap na kaso ni dating Pangulong Duterte.

Bubusisiin na rin ng Department of Public Works and Highways ang posibleng kaugnayan ng fake o “ghost” insurance bonds sa libu-libong flood control projects.

Aminado si Public Works and Highways Secretary Vince Dizon na kung ikinukunsidera bilang “ghost” ang isang proyekto, maaaring iligal din ang insurance coverage nito.

Ayon sa kalihim, makikipag-usap sila sa Insurance Commission lalo’t napakaraming maaaring habulin sakaling mapatunayang dinaya rin ang insurance coverage ng mga flood control project.

Dapat anyang magsumite ang mga contractor ng retention money bonds sa pamamagitan ng insurance companies, na mag-i-issue naman ng certification na kailangan para maipagpatuloy ang isang proyekto.

Gayunman, inamin ni Dizon na may posibilidad na ilang insurance firms ang bahagi ng modus sa pamamagitan ng pag-issue ng fake certifications nang walang actual payments.

Bukod dito, pinag-aaralan na rin ng D.P.W.H. kung maaari pang marekober ang bonds para sa mga mas lumang proyekto, lalo kung ang saklaw ng warranties ay limang taon o higit pa.

Mariing itinanggi ni Public Works and Highways Secretary Manuel Bonoan ang kumakalat na alegasyon sa social media na anim na mambabatas ang nakakuha ng 800 billion pesos na halaga ng mga proyekto para sa flood control.

Sa pagharap ng kalihim sa pagdinig ng House Committee on Public Accounts, tinawag ni Bonoan ang naturang paratang bilang “preposterous” o lubhang katawa-tawa at walang anumang batayan, sa pagtalakay ng mga programa ng ahensya.

Binanggit naman ni Senior Deputy Speaker David “Jay-Jay” Suarez ang isyu, na tumukoy sa isang viral Facebook post na nagsasabing may ilang kongresista umanong nagmaniobra ng pondo para sa sariling interes.

Para sa kapakanan ng katotohanan, tinanong ni Suarez ang kalihim hinggil sa malisyosong post habang sinegundahan ito ni Ako Bicol Party-list Rep. Alfredo Garbin at inalam kung may umiiral bang 800 billion pesos na alokasyon ang DPWH para sa anim na kongresista.

Gayunman, pinabulaanan ni Bonoan ang isyu at iginiit na wala ito sa kanilang record.

Samantala, nilinaw ni Committee Chair at Bicol Saro Party-list Rep. Terry Ridon na hindi galing sa lehitimong media outlet ang alegasyon kundi mula lamang sa isang blog post sa Facebook.

Sinalungat ng Kamara ang pahayag ni Vice President Sara Duterte na nakabatay sa tsismis ang kasong kinakaharap ng kanyang ama na si dating Pangulong Rodrigo Duterte.

Giit ni House Spokesperson, Atty. Princess Abante, nakabatay sa matitibay na ebidensya at sinumpaang salaysay ng mga saksi ang kasong kinakaharap ng dating pangulo sa International Criminal Court.

Buwelta ni Atty. Abante na naka-ugat sa isang “international legal process” na sinusuportahan ng dokumentaryong ebidensya at testimonya ng mga biktima ang kaso sa I-C-C at hindi sa sabi-sabi o ingay sa pulitika.

Binigyang-diin pa ng tagapagsalita ng Kamara na bilang isa ring abugado, dapat alam ni VP Sara kung paano gumagana ang mga internasyonal na hukumang panghudikatura at sa tamang forum dapat ihain ang mga legal na remedyo tulad ng motion to dismiss.

Muli ring nilinaw ni Atty Abante na hindi naki-alam at nakiki-alam ang mababang kapulungan sa mga pagdinig ng I.C.C., bilang isang hiwalay o independent mula sa international court.

Kinondena ni Zambales 1st District Rep. Jay Khonghun si Vice President Sara Duterte kaugnay ng pahayag nito na peke ang kabaitan ni Pangulong Ferdinand Marcos Junior at nakipagsabwatan umano ito sa International Criminal Court para arestuhin ang kanyang ama na si dating Pangulong Rodrigo Duterte.

Ayon kay Khonghun, walang basehan ang pahayag ng Bise Presidente, hindi totoo at iresponsable.

Iginiit ng kongresista mula Zambales, isa sa mga pinuno ng Young Guns bloc sa Kamara, na malinaw ang paninindigan ni Pangulong Marcos na huwag makialam sa ICC kaugnay ng kaso ng dating Pangulo, na nahaharap sa kasong crimes against humanity kaugnay ng madugong kampanya ng administrasyon nito kontra sa iligal na droga.

Hindi lamang aniya katawa-tawa ang teorya ng sabwatan ni VP Duterte kundi isa ring mapanganib na tangkang linlangin ang publiko at mag-udyok ng kaguluhan sa bansa.

Itinanggi rin ng mambabatas na nagkukubli si Pangulong Marcos sa kabaitan, sa halip ay pinamumunuan nito ang bansa nang may kahinahunan, prinsipyo at respeto sa batas taliwas sa mga lider na kailangang sumigaw, manakot at magsinungaling para mapansin.

Nananawagan na rin ang Alliance of Transport Operators and Drivers Association of the Philippines (ALTODAP) na aprubahan na ang matagal na nilang hiling na provisional fare increase sa jeep.

Bunsod pa rin ito nang walang prenong oil price increase na sumirit pa dahil sa bakbakan ng Israel at Iran.

Ayon kay ALTODAP President Boy Vargas, matagal nang nagpapakahirap ang mga jeepney driver sa patuloy na pagsirit ng presyo ng krudo habang hinihintay ang desisyon ng gobyerno sa hiling na dagdag pasahe na tatlong taon ng naka-tengga.

Kung hindi naman anya ibibigay ang fuel subsidy ay maiging pagbigyan na lamang ang kanilang hirit na fare increase na tila kinakalawang na sa LTFRB.

Nitong Martes nang ipatupad ng mga oil companies ang unang sigwada ng kanilang bigtime price increase na sinundan ng ilan pang kumpanya kanina habang bukas magpapatupad ang iba pa.

Nanawagan ang isang Ekonomistang Mambabatas para sa mas matatag na preparasyon ng ekonomiya ng Pilipinas sa gitna nang posibleng epekto sa mundo ng bakbakan ng Israel at Iran.

Ayon kay Albay 2nd District Rep. Joey Salceda, Chairman ng House Committee on Ways and Means, namemeligrong maapektuhan ang presyo at supply ng krudo, exchange rate, labor market at import costs na pangunahing nagpapatakbo sa ekonomiya ng Pilipinas.

Dapat anyang ikunsidera ang mga ganitong scenario lalo’t isinasapinal na ng mga ahensya ang kanilang 2026 budget proposals.

Ibinabala rin ng mambabatas na ang anumang disruption sa Strait of Hormuz, na daanan ng dalawampung porsyentong oil supply sa mundo, ay lubhang maka-aapekto sa presyo ng inaangkat na krudo ng Pilipinas.

Kagaya ng inaasahan, sinalubong ng mga karaniwang problema ang ilang paaralan, lalo sa Metro Manila ngayong unang araw ng balik-eskwela.

Halimbawa na lamang nito sa President Corazon Aquino Elementary School (PCAES) isa sa mga may pinaka-malaking populasyon ng mga mag-aaral sa Quezon City.

Ayon kay PCAES Principal Gerry Isip, nasa walong libo limandaang estudyante ang nag-enroll para sa academic year 2025–2026.

Gayunman, nananatili anyang hamon ang espasyo partikular sa mga silid-aralan ng grades 1 hanggang 3, na mayroong 35 hanggang 38 mag-aaral bawat section.

Para mapangasiwaan ang volume ng mga estudyante, kailangang magpatupad ng morning at afternoon class shifts.

Umaasa naman si Isip na makapagpapatayo pa ng karagdagang mga gusali upang ma-decongest ang bilang ng mga mag-aaral kada classroom.

Handa na ang Department of Migrant Workers para sa mass evacuation ng mga Overseas Filipinos sa Israel.

Sa gitna ito ng tumitinding bakbakan ng Iran at Israel na nagresulta na sa pagkamatay ng mahigit dalawandaan katao simula noong Biyernes.

Ayon kay Migrant Workers Secretary Hans Leo Cacdac, maingat nilang tinatansa ang sitwasyon kabilang ang air space para makarating sa tamang tiyempo.

Hinimok naman ng kalihim ang mga pamilya sa Pilipinas na i-check ang kanilang mga kamag-anak sa israel sa pamamagitan ng DMW hotlines.

May inorganisa anyang help desk na may hotlines na naka-post online simula pa noong June 14 o isang araw matapos maglunsad ng missile at airstrikes ang Israel sa Iran.

Aabot sa tatlumpung libong Pilipino ang naninirahan o nagtatrabaho sa Israel habang tatlumpu lamang sa Iran.