NATIONAL NEWS

Magbibigay ang Canada ng 12 million canadian dollars o 519 million pesos sa Pilipinas upang pondohan ang climate change activities at isulong ang economic growth sa mga conflict area sa Mindanao.

Inanunsyo ito ni Canadian Trade Minister Mary Ng sa kanyang official visit sa Maynila.

Ayon kay Ng, gagamitin ang pondo sa tatlong proyekto na magpapalakas sa climate finance ng bansa, suportahan ang women’s empowerment at buhayin ang mga komunidad na apektado ng armed conflict sa Mindanao.

Sa idinaos na aktibidad ng Minister of International Trade, Export Promotion, Small Business and Economic Development, binigyang-diin ni ng ang interes ng Canada na pagtibayin ang economic ties sa Pilipinas.

Umaasa rin anya ang Canada na tulungan ang Pilipinas na makapagtayo ng mga kalsada, tulay at ospital habang lumilikha ng lokal na hanapbuhay.

Pinayagan na ng Social Security System (SSS) ang isang taon o isang bagsakang bayad ng kontribusyon ng mga magsasaka, mangingisda at iba pang informal sector workers.

Ayon sa SSS, “seasonal” lamang o hindi regular ang malakihang kita ng mga nasabing manggagawa kaya’t niluwagan ang polisiya.

Batay sa datos ng ahensya, mahigit siyam na milyon ang manggagawa sa Agriculture sector bukod pa ito sa libu-libong nasa informal sector na karamiha’y hindi regular ang kita, ani, huli at benta.

Ipinaliwanag ni SSS president at CEO Michael Regino na sa ilalim ng patakaran, maaaring bayaran ng mga mangingisda, magsasaka o mga tindero ang buong isang taon na hindi nababayarang kontribusyon kapag kumita nang malaki.

Nanawagan naman si Regino sa mga Local Government Unit na tulungan ang kanilang job order workers sa pamamagitan ng pagbibigay subsidiya sa kanilang statutory benefits, tulad ng SSS.

Kahit anya mga land-based OFW at Job Order Worker sa pamahalaan ay target din anyang gawing self-employed member sa hiwalay pang programa ng nasabing government owned and controlled corporation.

Aabot sa 40 milyon ang miyembro ng SSS pero lagpas 14 na milyon lang ang aktibong nagbabayad ng kontribusyon.

Aprubado na nga sa ikatlo at huling pagbasa sa Kamara ang House Bill 4673 o ang panukalang batas na ipagpaliban ang December 5, 2022 Barangay at Sangguniang Kabataan election.

Sa botong 264 na Yes, anim na No at 3 Abstain tuluyan nang nakalusot ang naturang panukalang isagawa na lamang ang nasabing eleksyon sa unang lunes ng December 2023.

Unanimous ang naging desisyon ng Kamara sa pagpa-apruba sa pinagsama-samang 43 panukalang batas na inihain ng nasa 82 mambabatas

Kabilang sa mga bumoto ng no ang grupong makabayan at si Albay Representative Edcel Lagman dahil labag aniya ito sa konstitusyon at mismong COMELEC na aniya ang nagsabing handa ito na isagawa ang nasabing halalan at higit na gagastos ang pamahalaan kung ito ay ipagpapaliban.

Nabatid na sakaling tuluyang maisasabatas, ang mga kasalukuyang opisyal ng barangay at SK ay mananatili sa kanilang posisyon maliban na lamang kung mas maagang maalis o masuspinde ang mga ito.

Muling nagmahal ang puting asukal o primera sa mga palengke sa Metro Manila.

Batay sa monitoring ng Department of Agriculture, balik sa P98 hanggang P106 ang kada kilo ng primera sa Marikina Public Market habang P98 hanggang P105 sa mega Q-Mart sa Quezon City.

Inihayag naman ng kinatawan ng Sugar Board na nasa P38 hanggang P46 ang kada kilo ng millgate price ng raw sugar noong nakaraang panahon ng gilingan o milling season sa Crop Year 2021 hanggang 2022.

Gayunman, sumirit sa P60 ang kada kilo ng millgate price ng raw sugar sa Crop Year 2022 hanggang 2023.

Ipinaliwanag ni Mitzi Mangwag, board member ng Sugar Board Millers Representative, na ang pagtaas ng presyo ay bunsod ng mataas na production cost, partikular ang mahal na krudo.

Una nang tiniyak ng Sugar Regulatory Administration na sa Nobyembre pa magsisimulang bumaba ang presyo ng asukal dahil sa ganitong panahon ay fully operational na ang mas malalaking mills sa Negros.

Mahigit 1,400 kilo ng double dead na karne o botcha at iba pang frozen meat products ang nasabat sa palengke sa Tarlac City.

Sa loob ng apat na araw, isinagawa ang operasyon ng mga personnel ng City Veterinary Office at Public Order and Safety office bilang bahagi ng pinaigting na hakbang kontra African Swine Fever.

Ayon kay Tarlac City veterinarian, Dr. Noel Soliman, nagmula ang mga karne sa iba pang lalawigan.

Mahaharap anya ang ilang meat traders sa mga kasong paglabag sa meat inspection code.

Gayunman, nagpulasan ang mga nagtitinda ng karne nang mag-inspeksyon ang mga otoridad.

Samantala, agad namang idinispose ang mga nakumpiskang karne.