NATIONAL NEWS

Hindi pa nakikita ng isang eksperto na malapit nang matapos ang paglaban ng bansa sa COVID-19 pandemic, taliwas sa naging pahayag ng World Health Organization (WHO).

Ayon kay Infectious Diseases Expert Dr. Rontgene Solante, nananatili pa rin kasing panglima ang Pilipinas sa mga bansa na may naitatalang mga namamatay dahil sa virus.

Mayroon din aniyang mga naitatala pang kaso ng community transmission sa bansa at nananatili parin ang BA.5 subvariant sa kabila nang pagbaba ng kaso ng COVID-19 cases.

Kaya naman posible ani Solante na hindi pa matatapos sa susunod na dalawa o tatlong buwan ang laban kontra virus.

Ngunit siniguro ni Dr. Solante na nananatiling mababa ang healthcare utilization rate sa buong bansa. –  sa ulat ni Jopel Pelenio (Patrol 17)

Tinitingnan ng Commission on Election na magsagawa ng special elections sa 7th Congressional District ng Cavite para punan ang nabakanteng pwesto ni Justice Secretary Jesus Crispin Remulla sa unang bahagi ng 2023.

 Binanggit ito ni COMELEC Chairman George Garcia matapos umapela sa kongreso na pansamantalang hawakan ang pag-apruba sa panukalang batas na mag-require ng plebisito dahil maaari itong makaapekto sa paghahanda ng ahensya sa 2025 midterm polls.

 Noong Hulyo, pinagtibay ng House of Representatives ang isang resolusyon na nananawagan sa COMELEC na magsagawa ng special election sa naturang distrito matapos itilaga si Remulla, ang nahalal na kongresista bilang justice secretary.

Natapos na ng Department of Public Works and Highways (DPWH) ang flood control project sa Dinalupihan, Bataan.

 Ayon kay DPWH Secretary Manuel Bonoan, makatutulong ang flood control structure sa tabi ng Colo River para maiwasan ang pagbaha sa nasabing lugar bunsod ng malakas na pag-ulan.

 Sinabi naman ni DPWH Regional Office 3 Director Roseller Tolentino na magbibigay din ito ng proteksyon sa mga residente at upang mabawasan ang posibleng danyos sa mga ari-arian dahil sa pag-apaw ng tubig.

Inihayag ng Philippine National Police (PNP) na bahagi ng pagsisikap ng gobyerno ang pagsugpo sa ilegal na aktibidad ng Phillipine Offshore Gaming Operators (POGO) para mapanatili ang safe business climate sa bansa.

 Ayon kay PNP Chief General Rodolfo Azurin Jr. kabilang sa hakbang na ito ang sugpuin ang POGO workers na overstaying, walang dokumento at may expired na visa o working permits.

 Paliwanag niya, kailangan kasi ng mga foreign worker ang clearance mula sa National Bureau of Investigation (NBI) na nagpapatunay na hindi sila wanted o nahaharap sa anumang kasong kriminal.

 Tiniyak naman ni Azurin na walang paglabag sa batas sa bansa at ang mga kriminal na gumagawa ng iligal na aktibidad ay dapat lamang kasuhan.

Inihayag ni Senate Committee on Public Services Chairman Senator  Grace Poe na kapag naisabatas na ang mandatory Sim Registration Bill ay aatasan nito ang Telecommunications Companies (TELCO) na mahigpit na ingatan ang personal na detalye ng mga subscriber nito.

Ayon kay Poe, kailangang protektahan ng mga TELCO ang personal information ng suscribers sa isang database —  na hindi nila pwedeng ibahagi maliban kung utos ng korte, o competent authority at kung may waiver ang subscriber.

Kada taon, sasailalim ang TELCO sa audit ng National Telecommunications (NTC) para makita kung tumutupad sa utos na ingatan ang datos ng subscribers.

Ibig sabihin nito, hindi nila pwedeng ibahagi ang hawak nilang datos sa mga nagpapadala ng unsolicited text messages at lalong hindi dapat makuha ng mga scammers.

Sa Senate Bill 1310 o Mandatory Sim Registration Bill na inaprubahan ng senado sa second reading kagabi, magmumulta ng 300,000 libong piso  hanggang isang milyong piso ang TELCO para sa bawat paglabag sakaling maglabas ito ng impormasyon ng mga subscriber.

Mahigit 72 milyong pilipino na ang nakapagparehistro sa Philippine Identifaction System (PhilSys).

Batay sa pinakahuling datos ng Philippine Statistics Authority (PSA), umabot sa 78.6% o katumbas ng 72,348, 546 ang nakakumpleto na sa kanilang PhilSys step 2 registration mula sa target na 92 million para sa taong ito.

Kabilang dito ang pagkuha ng biometric information tulad ng fingerprints, iris at front-facing photographs.

Itinuturing naman ni PSA Undersecretary Dennis Mapa na resulta ng pagsisikap ng psa regional at provincial field offices ang naturang bilang ng mga nagpatala.

Walang naitalang Pilipinong nasaktan sa naganap na lindol sa Taiwan noong weekend.

Ito ang sinabi ni Manila Economic and Cultural Office (MECO) Chairman Silvestre Bello III dahil maraming nasirang bahay, gusali, kalsada at nadiskaril na riles ng tren sa Taiwan.

Handa naman ang kanilang opisina at ang Department of Migrant Workers (DMW) na tumulong sa mga Pilipinong naapektuhan ng nasabing lindol.

Matatandaang niyanig ng magnitude 6 point 8 na lindol ang Taiwan noong linggo.

 Halos kalahating porsyento ng populasyon ng Pilipinas ang naapektuhan ng mga nagdaang bagyo na naganap lamang sa loob ng isang dekada.

 Ito ang lumabas sa pag-aaral na ginawa ng Asian Development Bank (ADB) at Internal Displacement Monitoring Centre (IDMC).

 Sa pag-aaral na pinamagatang “Disaster Displacement in Asia and the Pacific: A Business Case for Investment in Prevention and Solutions,” nakasaad na 49.3% ng mga Pilipino ang naapektuhan ng bagyo mula 2010 hanggang 2021.

 Mas malaki ito sa naging tala sa Central at West Asia at kung isasama pa ang Pacific.

 Ang Typhoon Haiyan o bagyong Yolanda noong 2013 ang pinakamalakas na bagyo na tumama sa Pilipinas, na nakaapekto sa 5.1 milyong indibidwal hindi lamang sa bansa kundi maging sa Palau, China at Vietnam.

 Maliban sa haiyan, malaki rin ang naging epekto sa Pilipinas ng Typhoon Rai o bagyong Odette na naganap noong 2021.

Hinimok ng mga stakeholders ng industriya ng sardinas ang gobyerno na manguna na ng pagpupulong, upang pag-usapan ang posibleng maging kakulangan ng suplay ng sardinas sa bansa.

 Ayon kay Francisco Buencamino, Executive Director ng Canned Sardines Association of the Philippines, dapat nang gumawa ng aksyon at mekanismo ang gobyerno para matiyak na magiging sapat ang suplay ng sardinas.

 Isa sa mga problemang nakita ni Buencamino kaya nagiging kaunti ang suplay ay ang epekto ng climate change at limitasyon ng mga mangingisda sa karagatan.

 Sa ngayon, dalawang solusyon ang inilatag ni Buencamino para masolusyunan ang banta kabilang ang pagbuo ng kasunduan sa mga municipal fishers at paghingi ng approval mula sa mga LGUs para mapayagang makapasok sa 10.1 kilometers mula sa dalampasigan ang mga mangingisda.

Naresolba na ng Philippine National Police (PNP) ang 9 sa 17 kaso ng kidnapping na ini-uugnay sa kontrobersiyal na Philippine Offshore Gaming Operations (POGO).

 Ayon kay PNP Chief, Police General Rodolfo Azurin Jr., naitala ang mga kasong ito mula pa noong Enero.

 Isa sa mga kidnapping cases ang na-marked na ng PNP bilang clear, habang kasalukuyang iniimbestigahan ng Camp Crame-based na Anti-Kidnapping Group (AKG) ang pitong iba pa.

 Matatandaang noong nakaraang linggo, mahigit 40 indibidwal ang nailigtas ng AKG sa Mabalacat City, Pampanga.

 Hiwalay pa ito sa 70 dayuhang na-rescue sa isang POGO site sa Rizal kung saan karamihan ay mga Chinese.