Isang Filipino-American ang napatay sa San Lorenzo, California dahil sa umano’y insidente ng road rage shooting.
Naganap ito sa Intersection of Hesperian Boulevard at Lewelling Boulevard kahapon.
Kinilala ng Alameda County Sheriff’s Office ang biktima na si Reinheart Asuncion na kakakasal lamang sa kaniyang asawa sa Pilipinas noong Mayo.
Nagtamo ng tama ng baril sa katawan si Asuncion at kalauna’y idineklara na ring patay ng mga tumugong paramedics.
Hindi naman nahuli ang suspek sa pamamaril.
Malaking hamon sa Bureau of Immigration (BI) ang limitadong kapasidad ng mga detention facility, sa gitna ng pagdami ng mga dayuhang nahuhuli sa bansa.
Ayon kay Immigration Spokesperson Dana Sandoval, sobra na ang bilang ng mga detainees na nasa Bicutan Detention ng BI, kung saan mahigit 300 na ang nakakulong mula sa 200 dapat na kapasidad.
Dumagdag sa bilang ang 91 foreign national na nahuli noong Biyernes sa Pasig City at 41 pa noong Sabado sa Angeles City.
Sa ngayon, nakikipag-ugnayan na ang BI sa mga local enforcement units at agencies para sa pansamantalang paglilipat ng detention facility ng mga nahuling dayuhan.
Tumaas pa ang weekly positivity rate sa National Capital Region (NCR).
Ayon kay OCTA Research Fellow Guido David, sumirit ito sa 15.6% noong September 19 mula sa 13.3% noong September 10 at 14.6 noong September 14.
Ang pag sirit ng kaso ng COVID-19 ay maaaring dulot ng panunumbalik ng face-to-face classes.
Tumaas rin ang positivity rate sa ilang bahagi ng Luzon tulad ng Bulacan, Cavite, Rizal, at Laguna.
Bumaba naman ang positivty rate sa nalalabing probinsya sa Pilipinas gaya ng Cebu at Davao. – sa panulat ni Hannah Oledan
Humiling si Senador Sherwin Gatchalian sa mga lokal na pamahalaan na paigtingin pa ang pagbabakuna para sa mga sanggol.
Kasabay ito ng ulat ng Department of Health (DOH) na may isang milyong sanggol na wala pang isang taong gulang ang hindi pa bakunado kontra vaccine preventable diseases gaya ng tigdas.
Binigyan-diin ni Gatchalian ang mahalagang papel ng mga Local Government Unit (LGU) sa pagpapatupad ng mga vaccination program at sa pagpapakalat ng impormasyon tungkol sa Mandatory Infant And Children Health Immunization Act of 2011 o Republic Act 10152.
Batay sa DOH, isa ang Pilipinas sa 10 bansa na may pinakamababang immunization rate sa buong mundo. – sa panulat ni Hannah Oledan
Binalaan ng Bureau of Jail Management and Penology (BJMP) sa kanilang mga tauhan na agad itong sisibakin sa pwesto sakaling madawit sa illegal drug trade sa mga kulungan.
Ayon kay Chief Director Allan Iral, walang puwang sa kanilang hanay ang mga tiwali at mapang-abuso dahil dala nila ang pangalan ng ahensya sa karangalan at kahihiyan.
Una nang nagbilin si Department of the Interior and Local Government (DILG) Secretary Benjamin Abalos Jr. sa BJMP na maging mapagmatyag sa mga posibleng pagpasok ng ilegal na droga sa mga jail facilities sa Pilipinas.
Samantala, nagbabala rin si Iral sa mga jail warden na mahaharap ito sa kaukulang parusa sa oras na magkaroon ng illegal drug trade sa kanilang mga kulungan alinsunod sa kautusan ni Abalos. – sa panulat ni Hannah Oledan
Aprubado na ng House Committee on Labor and Employment sa pamumuno ni Rizal Rep. Fidel Nograles ang panukalang batas na magsusulong sa social at economic welfare ng mga media workers, kabilang ang kanilang living and working conditions.
Saklaw ng panukala ang tamang pasahod, security of tenure, hazard at overtime pay, at iba pang mga benepisyo gaya ng SSS, Philhealth at Pag-IBIG.
Sa ilalim ng panukala, makakatanggap ng minimum wage compensation ang mga mamamahayag na itatakda ng national wages and productivity commission o ng regional tripartite wages and productivity boards.
Bukod sa mga protective equipment, makakatanggap din ng karagdagang limandaang piso kada araw ang mga miyembro ng media na aatasang mag-cover sa mga delikadong sitwasyon o lugar sa ilalim ng panukala.
Makakatanggap din ang mga ito ng 200,000 pisong death and disability benefits at 100,000 pisong medical insurance benefit.
Samantala, ipinag-uutos din ng panukala ang pagbuo ng news media tripartite council sa ilalim ng Department of Labor and Employment (DOLE). sa panulat ni Hannah Oledan
Natagpuang patay ang isang critically-enedangered Philippine Eagle o Haribon sa Maasim, Sarangani kahapon.
Ayon sa Department of Environment and Natural Resources (DENR) – Soccsksargen, tinatayang humigit-kumulang apat o limang oras nang patay ang agila bago natagpuan.
Ipinadala na ang labi nito sa Philippine Eagle Center sa Davao City para sa autopsy habang inaalam pa ang sanhi ng pagkamatay nito.
Pinangalanang pambansang ibon ng Pilipinas ang Philippine Eagle o agila noong 1995 at itinuturing na isa sa mga pinakapambihirang ibon dahil sa populasyon nitong wala pang 500.
Sa kasalukuyan, nasa 400 pares ng Haribon na lamang ang natitira sa kagubatan ng Pilipinas. – sa panulat ni Hannah Oledan
Umangat pa ang ranking ng Pilipinas sa pinakahuling Speedtest Global Index ng Ookla.
Pahayag ng Ookla, kapwa kasi bumuti ang datos ng fixed broadband median download speed at mobile median download speed sa bansa.
Nabatid na ang fixed broadband median speed ay tumaas sa 78.33Mbps mula sa 75.62Mbps.
Sinasabing ang mobile median speed naman ay naitala sa 22.35Mbps.
Binanggit din ng Ookla na ang Pilipinas ay pang-45 na mula 182 na mga bansa pagdating sa fixed broadband at pang-82 mula sa 140 na mga bansa pagdating naman sa mobile.
Maliban dito, napag-alaman na sa 50 Asian countries, ang bansa ay pang-14 sa fixed broadband at pang-29 sa mobile.
Nasa ika-12 na pwesto naman ang Pinas sa fixed broadband at pang-17 sa mobile sa Asia Pacific.
Nakikita na ang pagbuti ng internet speed sa bansa ay kasunod ng mas pinabilis na proseso sa pag-iisyu ng LGU permits na nagbigay-daan para mapabilis ang pagtatayo ng cellular towers at paglalatag ng fiber optic network ng mga telco.
Kasabay nito, binanggit na malaki ang naitutulong ng pagpasok sa bansa ng satellite-based Starlink internet service ni Elon Musk.
Sa susunod na anim na taon, inaasahan na magiging available na ang serbisyo ng Starlink na high speed low latency satellite internet service na mayroong download speed na nasa 100Mbps-200Mbps.
Walang dahilan para mag-angkat ang Department of Agriculture ng bigas hanggang sa susunod na taon.
Ito ay ayon kay senator Imee Marcos kung saan maganda ang produksyon ng mga lokal na magsasaka at sosobra pa ito sa domestic supply.
Bukod dito, wala nang natitirang valid sanitary at phytosanitary import clearances para mabigyang katwiran o maidepensa ang importasyon ng bigas sa taong ito.
Paliwanag pa ng senadora na ang inaasahang 5.13 million metric tons na lokal na produksyon ng bigas sa third quarter ay sosobra pa sa pangangailangan ng bigas na nasa 3.7 million metric tons at makapagtatabi pa ng 1.43 million metric tons sa katapusan ng Setyembre.
Sa ika-apat na quarter, inaasahang papalo sa 6.24 million metric tons ang supply ng bigas na lampas pa sa pangangailangan na 4.02 million metric tons para sa karagdagang buffer stock na 2.22 million metric tons sa katapusan ng Disyembre.
Lalabas na ang mga maaani sa ikatlo at ika-apat na quarter ang magbibigay sa bansa ng kabuuang buffer stock na 3.65 million metric tons sa katapusan ng taon, na tatagal ng 55 hanggang 66 na araw.—mula sa ulat ni Cely Ortega-Bueno (Patrol 19)
Maayos na serbisyo.
Apela ito ng Lawyers for Commuters Safety and Protection (LCSP) sa mga driver at operator ng mga pampublikong sasakyan.
Kasunod na rin ito nang pagtataas sa singil sa pasahe simula sa October 4.
Binigyang diin ni Atty. Ariel Inton ng LCSP na dapat tapatan ng PUV drivers at operators ang dagdag pasahe.
Kadalasan aniyang reklamo ng commuter ang matagal na paghihintay, siksikan sa loob ng mga sasakyan at kulang na jeep, bus at maging taxi.