NATIONAL NEWS

Isinusulong ni Quezon Representative Mike Tan ang House Bill No. 4554 o Tulong Pangkabuhayan para sa mga Mangingisda Program Act na nagkakahalaga ng 3,000 kada buwan na maaaring mabago kada taon depende sa inflation rate.

Layon nito na suportahan ang mga mangingisdang apektado tuwing may kalamidad at tuwing “closed fishing season” alinsunod sa deklarasyon ng Department of Agriculture’s Bureau of Fisheries and Aquatic Resources (DA-BFAR).

Bukod pa dito ay ang pagbibigay ng kabuhayan, pang-medikal  at iba pang social protection assistance para sa mga karapat-dapat na benepisyaryong mangingisda.

Magsasagawa ang lokal na pamahalaan ng Malabon at Valenzuela ng malawakang job fair sa Huwebes, September 22 na gaganapin sa Oreta Sports Complex.

Magsisimula ang job fair ng alas-8:00 ng umaga hanggang alas-4:00 ng hapon.

Dahil dito, pinaghahanda nila ang mga first time job seekers at iba pang naghahanap ng trabaho na magdala ng updated resume, valid ID at vaccination card at mag-register sa isang link.

Papalo sa 70 partner companies ng Public Employment Service Office (PESO) ang makikilahok sa naturang gawain.

Samantala gaganapin naman sa Wes Arena sa Brgy. Punturin ang Mega Job Fair sa Valenzuela sa September 30 mula alas-8:00 ng umaga hanggang alas-3:00 ng hapon.

Nakiisa ang mga Overseas Filipino Workers (OFWs) sa Hong Kong sa panawagang dagdag sahod at food allowance.

Maliban sa mga Pinoy, kabilang din sa mga lumahok ang mga migrant workers mula sa Indonesia, Thailand at Nepal.

Inihihirit nila ang 6,014 Hong Kong dollars na sweldo kada buwan at 3,023 Hong Kong dollars food allowance.

Mahigit 7,000 trabaho ang naghihintay sa mga Pinoy jobseekers sa pagbubukas ng kauna-unahang job fair ng Department of Tourism (DOT) at Department of Labor and Employment (DOLE).

Ayon kay DOT Secretary Christina Garcia Frasco, idaraos sa Maynila, Cebu, at Davao mula September 22 hanggang 24 ang “Trabaho, Turismo, Asenso! Philippine Tourism Job Fair.”

Isasagawa naman ang pre-registration online habang ang job fair naman ay gagawin sa SMX Convention Center Manila, SM City Cebu, at Abreeza Mall Davao.

Sa 7,510 job vacancies, aabot sa mahigit 3,000 trabaho sa National Capital Region, CALABARZON, at MIMAROPA ang iaalok sa Manila Leg ng employment program.

Mahigit 1,600 at 2,500 job opportunities naman sa Visayas at Mindanao ang bubuksan para sa Cebu at Davao Leg ng naturang job fair.

Hindi na dapat magpatumpik-tumpik pa ang Malakanyang at kongreso sa pagpapahinto sa operasyon ng Philippine Offshore Gaming Operators (POGO) sa bansa.

Ito ang iginiit ni senate minority leader Koko Pimentel sa gitna nang mga pahayag ni senador Imee Marcos na pinag-iisipan na ni Pangulong Bongbong Marcos ang ban sa POGO.

Ayon kay Pimentel, dapat ay agad ding ipag-utos ang total ban sa mga POGO, lalo’t mapanganib para sa bansa ang patuloy na operasyon nito.

Katumbas anya ito sa pagkakanlong ng mga posibleng kriminal at gangster na maaaring maka-apekto sa peace and order, lalo pa ngayong sunud-sunod ang insidente ng kidnapping sa bansa na may kaugnayan sa POGO.

Idinagdag ni Pimentel na dapat agad pakinggan ng Palasyo ang panawagan dahil nagiging playground ang bansa ng mga hindi kanais-nais na mga dayuhan.—mula sa ulat ni Cely Ortega-Bueno (Patrol 19)

Pinamamadali na ni senate majority leader Joel Villanueva ang pagpapatibay sa panukala na layong ipagbawal ang anumang uri ng online gambling activities sa bansa.

Isinusulong sa Senate Bill 1281 o “Anti-Online Gambling Act” ng senador na gawing labag sa batas ang lahat ng uri ng sugal sa online o internet kasama ang mga online gambling na may taya at pusta.

Ayon kay Villanueva, lubha nang malala ang kinahinatnan ng online gambling sa bansa na nauwi na sa pagkasira ng buhay at pamilya kaya hindi ito dapat baliwalain.

Bukod dito, naging dahilan din anya ang mga online gambling ng pagka-bangkarote at mga criminal activities.

Sa oras na maging ganap na batas, ang mga lalabag ay maaaring mabilanggo nang hanggang limang taon at pagmumultahin nang hanggang 500,000 pesos.

Mahaharap naman sa maximum penalty kung ang lalabag ay isang public officer bukod pa sa tuluyang pag-disqualify sa paghawak ng anumang posisyon sa gobyerno.—mula sa ulat ni Cely Ortega-Bueno (Patrol 19)

Suportado rin ni dating Tesda head, senate majority leader Joel Villanueva ang pasya ni Pangulong Bongbong Marcos na ilipat ang TESDA sa pangangasiwa ng Department of Labor and Employment mula sa Department of Trade and Industry.

Ayon kay Villanueva, tama ang naging hakbang ng Pangulo dahil nakasaad sa charter ng TESDA na ang labor secretary ang chair ng TESDA board.

Sa pamamagitan anya nito ay matitiyak ang mahusay na estratehiya para sa job generation ng pamahalaan at matutugunan ang isyu sa job skills mismatch.

Bukod kay Villanueva, sinuportahan din ni senate minority leader Koko Pimentel ang pagbabalik ng TESDA sa DOLE.

Ipinunto ni Pimentel na mahalagang magkatrabaho at magkatuwang ang mga nasabing ahensya sa pagtugon sa problema ng kawalan ng trabaho.—mula sa  ulat ni Cely Ortega-Bueno (Patrol 19)

Suportado ng Department of Trade and Industry ang pagbabalik ng Technical Education and Skills Development Authority (TESDA) sa Department of Labor and Employment.

Alinsunod sa Executive Order 5 ni Pangulong Bongbong Marcos, inilipat ang TESDA sa DOLE mula sa DTI.

Ayon kay trade secretary alfredo pascual, naging attached agency ng DTI ang TESDA para sa policy at program coordination.

Inilabas anya ang EO 5 bilang pormal na pagbabalik ng TESDA sa mother agency nitong DOLE.

Taong 1994 nang itatag ang TESDA sa ilalim ng Republic Act 796 bilang attached agency ng nasabing kagawaran.

Gayunman, ipinag-utos ni dating Pangulong Rodrigo Duterte na isailalim ang ahensya sa pangangasiwa ng cabinet secretary noong 2016 hanggang sa ilipat sa DTI noong 2018.