HOT STORIES OF THE WEEK

Ikinukunsidera na ng mga Overseas Filipino Worker (OFW) na umalis na ng Russia dahil sa kaliwa’t kanang international economic sanctions laban sa naturang bansa.

Ito ang kinumpirma ng Philippine Overseas Employment Administration (POEA) sa gitna ng nagpapatuloy na digmaan sa pagitan ng Russia at Ukraine.

Ayon kay POEA Administrator Bernard Olalia, nahihirapan na ang OFW sa Russia dahil sa pagliit ng halaga ng kanilang kinikita indikasyon na ume-epekto na ang ipinataw na sanctions ng Europa at US.

Karamihan anya sa mga naturang Pinoy ay nagpa-plano nang maghanap ng trabaho sa ibang bansa.

Nakikipag-ugnayan na ang POEA sa philippine Overseas Labor Office at Philippine Consulate, na may hurisdiksyon sa Russia upang mabatid ang eksaktong bilang ng mga OFW na nais ng lumipat ng ibang bansa.

Makabubuting ipaubaya na sa ibang ahensya, sa halip na sa Philippine National Police (PNP), ang imbestigasyonsa pagkawala ng mahigit 30 sabungero.

Ito, ayon kay Senador Bong Go, aykung may mga pulis na sinasabing sangkot sa pagdukot sa mga biktima.

Dapat anyang matiyak na magiging patas at mabigyan ng katarungan ang pamilya ng mga nawawala.

Una nang inatasan ni Pangulong Rodrigo Duterte ang PNP at National Bureau of Investigation na tutukan ang kaso.

Sa pagdinig ng senado noong Lunes, kinumpirma mismo ng PNP- Criminal Investigation and Detection Group na mga pulis ang nasa 10 suspek sa pagdukot sa isang E-Sabong master agent sa San Pablo City, Laguna.

May mga sabungero ring tumestigo at nagsabing may ilang pulis na nagbanta sa kanilang buhay dahil sa kanila umanong pani-niyope o pandaraya sa E-Sabong. —sa ulat ni Cely Ortega-Bueno (Patrol 19)

Labindalawa pang Filipino seafarers mula Ukraine ang nakauwi na sa gitna ng tumitinding pag-atake ng Russia.

Kinumpirma ni Foreign Affairs Undersecretary for Migrant Workers Affairs Sarah Lou Arriola na dumating ang mga Pinoy crew ng MV Filia Joy at MV Filia Glory sa Clark Airport, Pampanga, kagabi.

Ayon kay Arriola, inilikas ang mga mandaragat sa pamamagitan ng Philippine Honorary Consulate sa Chisinau, Moldova sa pakikipag-tulungan ng Philippine Embassy sa Budapest, Hungary.

Dahil dito, umabot na sa 382 Filipino sa Ukraine ang natulungan ng Department of Foreign Affairs (DFA).

Kabilang na rito ang 330 Pinoy na ini-repatriate hanggang nitong March 21.

Gumagawa na ng paraan ang gobyerno upang itaas ang buwanang subsidiya para sa mahihirap na pamilyang apektado ng mataas na presyo ng mga bilihin bunsod ng pagsipa ng presyo ng langis.

Una nang inatasan ni Pangulong Rodrigo Duterte ang Department of Finance (DOF) na maghanap ng pondo para itaas ang ayuda sa 500 mula sa orihinal na 200 pesos.

Ayon kay Acting Presidential Spokesman Martin Andanar, naghahanap ang gobyerno ng posibleng mapagkukunan ng pondo para sa karagdagang 300 pesos.

Sinabi rin anya ng pangulo na ang susunod na administrasyon na ang mangangasiwa kung paano pababayaran ang pondo.

Samantala, inihayag ni DSWD Spokesperson Irene Dumlao na nakikipag-ugnayan na sila sa DOF hinggil dito at agad sisimulan ang pamamahagi ng subsidiy sa oras na matanggap ang pera mula sa Department of Budget and Management (DBM).

Mananatiling siyento porsiyentong ligtas ang May 9 National at Local Election sa kabila ng umano’y security breach sa system ng service provider nitong smartmatic.

Ito ang tiniyak ni Smartmatic spokesman, Atty. Christopher Ocampo sa pagdinig ng House Committee on Suffrage and Electoral Reforms kahapon.

Ayon kay Ocampo, maayos namang pinangangasiwaan at kontrolado ng Commission on Elections ang source code at software ng automated election system.

Nilinaw ng opisyal na magkahiwalay at magkaiba ang server at imprastraktura ng Comelec at Smartmatic.

Hindi naman anya magka-konekta ang server at infrastructure ng poll body sa kanilang server at infrastructure at hindi rin ibinabahagi ng Comelec ang electoral data sa Smartmatic.

Binigyang-diin ni Ocampo na siniguro rin ng Comelec sa publiko na “secured” at walang hacking o penetration sa kanilang system.

Posibleng sa Mayo pa o sa Hunyo mailabas ng Department of Labor and Employment (DOLE) ang desisyon sa mga petisyong dagdag-sweldo.

Ito ay ayon kay labor undersecretary Benjo Benavidez, may mga petisyon na ring naihain sa regional wage boards para sa umento sa minimum na sahod na aniya’y dadaan pa sa mga pagdinig at public consultation.

Nasa P537 ang kasalukuyang minimum wage sa Metro Manila.

Una nang hiniling ng Trade Union Congress of the Philippines (TUCP) na dagdagan ito ng 470 pesos para maging 1,007 pesos ang minimum na sweldo sa NCR.

Inaasahang malalaman na ngayong araw ang desisyon ni Pangulong Rodrigo Duterte hinggil sa suhestiyon ng National Economic and Development Authority (NEDA).

Ito ‘yung  rekomendasyong 4-day work week at work from home set-up para makatipid bunsod ng taas-presyo sa langis.

Ayon kay acting presidential spokesperson Martin Andanar, ngayon malalaman kung pagtitibayin o hindi ang mungkahi ng NEDA.

Sa ngayon naipaliwanag na sa Pangulo ang magiging benepisyo ng mungkahi tulad ng tipid sa oras, pagkain, pamasahe at iba pa.—sa panulat ni Abby Malanday

Kailangan pang dumaan sa Comelec En Banc ang mga kandidatong sasali sa kanilang inorganisang Pilipinas Debates 2022.

Paglilinaw ni Commission on Elections (COMELEC) commissioner George Garcia, bukas naman ang kanilang pintuan sa mga nagbago ng isipan at nais pa ring dumalo o umatras sa debate.

Pero ito ay kailangang dumaan sa wastong proseso dahil may mga deadlines silang sinusunod para sa attendance.

Para naman sa mga dadalong kandidato, may inihandang kwarto ang COMELEC sa mga ito.

Sa ngayon, pakiusap ni Garcia sa mga kandidato na magsabi ng maaga para mapagdesisyunan din ito ng COMELEC En Banc.—mula sa panulat ni Abby Malanday

Hinikayat ni Senator Richard Gordon ang publiko na magtipid  sa konsumo sa langis sa harap ng walang patid na pagtaas ng presyo nito.

Payo ni Gordon sa bawat pamilya, mag-carpool na lang sa halip na magdala ng kanya-kanyang sasakyan.

Mainam din para kay Gordon, kung bawat tahanan ay mamumuhunan sa mga renewable energy sources.

Para naman sa mga magsasaka, makatutulong kung pagsasabay-sabayin na nila ang paghahatid o pagbyahe ng kanilang mga produkto patungo sa mga pamilihan.

Hiniling naman ni Gordon sa gobyerno na humanap ng paraan para mapataas ang imbak na langis dahil isa ang Pilipinas sa nakikipagkumpentensya ngayon sa buong mundo  para makakuha ng sapat na suplay ng produktong petrolyo.