HOT STORIES OF THE WEEK

Isinasapinal pa ng pamahalaan ang petsa ng pamamahagi ng P500 ayuda para sa mga mahihirap na pamilya sa bansa.

Ayon kay Department of Social Welfare and Development (DSWD) Spokesperson Irene Dumlao, katuwang dito ang Department of Finance at Department of Budget and Management na inaasahang magtatagal ng 3 buwan.

Nitong Biyernes, nakipagpulong na ang DSWD sa mga economic managers para matukoy ang mga ilalatag na panuntunan at saan magmumula ang pondo.

Unang iniutos ni Pangulong Rodrigo Duterte na itaas ang ayudang ibibigay sa mga mahihirap na pilipino sa P500 mula sa naunang P200 pesos. —sa panulat ni Abby Malanday

Daan-daang residente na nakatira sa paligid ng Bulkang Taal ang nagsimula nang lumikas kasunod ng pag-alboroto ng bulkan kaninang umaga, Marso 26.

Ayon sa National Disaster Risk Reduction and Management Council spokesperson Mark Timbal, mula ito sa mga barangay ng Banyaga at Bilibinwang  sa bayan ng Agoncillo; Boso-Boso at Bugaan East sa Laurel at Gulod sa Calatagan.

Anila, batay sa huling tala,  nasa 160 pamilya na o katumbas ng 800-900 indibidwal ang dinala  sa limang eskwelahan at isang covered court sa Agoncillo.

Nasa 81 pamilya o 222 indibidwal naman ang nailikas mula sa bayan ng Laurel.

Ang mga nabanggit na barangay ay nasa loob ng seven-kilometer danger zone mula sa bunganga ng bulkan.

BALIK-PASADA na sa EDSA ang mga provincial buses.

Ito ang inihayag ng Metropolitan Manila Development Authority o MMDA kasunod ng pagpapatupad ng mas maluwag na COVID-19 restrictions sa Metro Manila.

Ayon kay MMDA Chairman Romando Artes, ang mga provincial buses ay maaari nang bumiyahe sa pagitan ng alas-dies ng gabi at alas-singko ng umaga.

Sa kasalukuyan, nagsasagawa na ng dalawang linggong dry-run ang MMDA upang ma-assess ang bagong polisiya.

Binigyang-diin ng Malakanyang na hanggang ngayon ay wala pa ring iniendorsong kandidato sa pagka-presidente si Pangulong Rodrigo Duterte para sa 2022 Elections.

Ito ang inihayag ng communications undersecretary Kris Ablan, kasunod ng naganap na pulong sa pagitan ng Pangulo at ni dating senator Ferdinand “Bongbong” Marcos, Jr.

Sinabi pa ng opisyal, na nagkaroon lamang ng pagpupulong ngunit hindi aniya ito nangangahulugan ng pag-endorso sa naturang kandidato.

Magugunitang, sinabi ni Pangulong Duterte, na wala siyang susuportahan sa presidential race, maliban na lamang kung mayroong rason na makapagpapabago ng kanyang desisyon.

Nasa halos siyam na milyong kabataan na sa Pilipinas ang nakakumleto ng bakuna kontra COVID-19 sa edad 12 hanggang 17 taong gulang.

Ito ay batay sa datos ng Department of Health (DOH).

Ayon kay health undersecretary Maria Rosario Vergeire na target umano ng kagawaran na mabakunahan ang 12 milyon  na kabataan mula sa nasabing age group.

Samantala, muling nanawagan si Vergeire sa mga magulang na pabakunahan na ang mga kabataan na hindi pa nababakunahan laban sa COVID-19 upang mabigyan ng karagdagang proteksyon sa virus.

Inihain na ng Trade Union Congress of the Philipines (TUCP) ang petisyon para sa hiling na itaas sa 814 pesos ang minimum wage sa Davao Region.

Nagtungo ang TUCP sa tanggapan ng Regional Tripartite Wages and Productivity Board (RTWPB) sa Davao kung saan kanilang inihirit na dagdagan ng 418 ang kasalukuyang 396 pesos na arawang sahod ng mga manggagawa sa rehiyon.

Ayon kay TUCP President Raymond Mendoza, hindi na sapat ang kinikita ng mga manggagawa sa nabanggit na rehiyon bunsod ng pagtaas ng presyo ng mga bilihin sa gitna ng walang prenong oil price hike.

Posibleng abutin ng isang buwan bago makapaglabas ng desisyon ang RTWPB sa petisyon.

Una nang naghain ng petisyon ang grupo para sa 470 pesos na dagdag-sahod sa Metro Manila at 340 pesos sa Central Visayas.

Inaasahang tataas pa ang global at domestic prices ng krudo dahil sa nagpapatuloy na gulo sa pagitan ng Russia at Ukraine na magtutulak sa inflation na malampasan ang target range ng gobyerno na 2% hanggang 4%.

Ayon sa Bangko Sentral ng Pilipinas (BSP), inaasahang sisipa sa 4.3% ang inflation rate sa bansa kumpara sa 3.7% outlook sa isinagawang Monetary Board Policy meeting noong Pebrero.

Inihayag ni BSP Governor Benjamin Diokno na itinaas din sa 3.6% mula sa 3.3% ang pagtaya sa inflation para sa susunod na taon.

Maaari anyang maapektuhan ng nagpapatuloy na digmaan ang ekonomiya ng Pilipinas sa pamamagitan ng mataas na presyo ng mga bilihin.

Ang Russia at Ukraine ay major exporters ng basic commodities gaya ng langis, natural gas, harina, aluminum at abono o pataba.

Sa ikalawang sunod na araw, muling tumaas ang presyo ng krudo sa international market

Ito’y sa gitna ng ikinakasang embargo o pagbabawal sa Russian oil at gas imports kaugnay sa nagpapatuloy na digmaan sa Ukraine.

Mula sa 114 dollars noong Lunes, balik sa 120 dollars ang presyo ng kada bariles ng Brent Crude, na International Benchmark o batayan ng presyo ng lahat ng mga produktong petrolyo.

Ibinabala naman ni Russian Deputy Prime Minister Alexander Novak na kung ipagbabawal sa merkado ang kanilang oil products, na malaki ang demand sa Europa, magreresulta ito sa pagbagsak ng energy market ng mundo.

Samantala, inihayag ni Russian President Vladimir Putin na magdedeliver lamang sila ng langis sa “unfriendly countries” kung Russian Ruble ang ibabayad sa kanila sa halip na dolyar.