Binabantayan ng PAGASA ang isang tropical cyclone sa silangan ng bansa na posibleng lumakas bilang super typhoon at magpalakas sa southwest monsoon o habagat sa susunod na linggo.
Sa oras na makapasok ito sa Philippine Area of Responsibility, tatawagin itong Bagyong Inday.
Ayon sa PAGASA, nasa mahigit 3,700 kilometro silangan ng Eastern Visayas ang bagyo at inaasahang lalakas habang tumatawid sa Pacific Ocean.
Inaasahang makararanas ng pag-ulan ang mga kanlurang bahagi ng bansa mula kalagitnaan ng susunod na linggo hanggang weekend.
Sa ngayon, patuloy na nakararanas ng kalat-kalat na pag-ulan ang Palawan at Mindoro, bunsod ng habagat, habang may tsansa rin ng mga thunderstorm sa hapon o gabi sa Metro Manila at iba pang bahagi ng bansa.
Pinapayuhan ang publiko na maging alerto at manatiling nakatutok sa mga susunod na abiso ng PAGASA. | Sa panulat ni Reabelle Medina
