HOT STORIES OF THE WEEK

Bumuhos ang pagbati para kay Pangulong Rodrigo Duterte na nagdiriwang ng kaniyang ika-77 kaarawan ngayong araw.

Mula ito sa alyansa ng Pangulo kung saan karamihan ang ninanais ang mabuting kalusugan at kapayapaan para sa Pangulo.

Ayon kay speaker Lord Allan Velasco, isang karangalan ang maging kaalyansa at kaibigan ni Pangulong Duterte.

Habang sa ngalan din ng buong hanay ng Kamara at mga Pilipino, malaki ang pasasalamat ni Velasco sa Pangulo dahil sa nagawa nito sa bansa na malaking tulong sa susunod na henerasyon.

Maliban kay Velasco, nagpaabot din ng pagbati sa Pangulo si house majority leader Martin Romualdez at ang Department of Transportation (DOTR) dahil sa malaking nagawa ng Pangulo sa bansa.

Gaganapin ang simpleng selebrasyon ng kaarawan ng Pangulo sa Davao City.—sa panulat ni Abby Malanday

Ramdam na ng mga negosyanteng Pinoy sa Europa ang matinding epekto ng pagtaas ng mga bilihin at produktong petrolyo sa gitna ng bakbakan sa pagitan ng Russia at Ukraine.

Ayon kay Carlo Isip, may-ari ng isang restaurant, sapul ng nasabing pagsirit ng presyo ang kaniyang delivery service maging ang mga sangkap na gamit sa kanilang negosyo.

Sinabi naman ni Dennis Lunar, isang hotdog manufacturer sa Switzerland na naapektuhan din ang kanilang pagde-deliver ng mga produkto sa mga karatig-bansa.

Samantala, walang kasiguraduhan kung kailan matatapos ang naturang giyera pero tiyak na nakamba ang inflation na mas lalong magpapahirap sa mga mamamayan.—sa panulat ni Airiam Sancho

Nagpahayag ng pagtutol ang isang grupo ng mga manggagawa sa call center hinggil sa mandato ng gobyerno na on-site duties para sa Business Process Outsourcing (BPO).

Ayon sa inter-call center association of workers, dapat na ikonsidera ng pamahalaan ang unti-unting pagbabalik ng trabaho sa mga opisina.

Paliwanag pa ng grupo, kung may isang empleyado na nagka-ubo o sipon ay may ilan nang nahahawa ng kaparehong sintomas dahil sa impeksyon.

Ang mga headset din anila na ginagamit ng mga empleyado ay isang paraan kung saan ang COVID-19 ay maaaring madaling maipasa sa 100% fully operational na sitwasyon.

Una nang tinanggihan ng Fiscal Incentives Review Board (FIRB) ang mga kahilingan ng mga kumpanya na palawigin ang remote work arrangement pagkatapos ng March 31, 2022 kung saan dapat na bumalik ang mga manggagawa sa opisina simula April 1, 2022.—sa panulat ni Airiam Sancho

Sa kabila ng bahagyang pagkalma, mananatili pa rin sa Alert Level 3 ang Bulkang Taal.

Sa panayam ng DWIZ kay Philippine Institute of Volcanology and Seismology (PHIVOLCS) Director Renato Solidum Jr., sinabi nitong may posibilidad pa rin na sumabog ang bulkan.

Paliwanag nito, kapag bulkan kasi ang pinag-uusapan, mahirap sabihing tuloy-tuloy na ang magiging paghupa nito kaya’t mas makakabuti na i-monitor muna bago ibaba ang alert level sa loob ng dalawang linggo.

Sa ganitong paraan, maiiwasan ang atras abanteng desisyon.- sa panulat ni Abbie Aliño-Angeles

Tinatayang higit kumulang isang libong pamilya na apektado ng pag-alburoto ng Bulkang Taal ang lumikas na sa kani-kanilang tahanan.

Ayon kay Batangas Provincial Social Welfare and Development Office head Joy Montalbo, naabot na sa 498 na pamilya o katumbas ng 1,767 indibidwal ang lumikas na mula sa bayan ng Agoncillo.

Batay naman kay Municipal Disaster Risk Reduction and management Office Public Information Officer Jerwin Tambogon ng bayan ng Laurel, 479 pamilya o 1,616 indibidwal ang lumikas na.

146 pamilya o 429 indibidwal rito ang tumungo sa kanilang mga kaanak.

Paliwanag ni Montalbo, papayagan lamang ang mga evacuees na makabalik sa kanilang tahanan sa oras na ibaba na sa alert level 2 ang estado ng bulkan. – sa panulat ni Abbie Aliño-Angeles

Naglabas ng public health advisory ang Department of Health (DOH) kaugnay sa nangyaring pagbuga ng abo at sulfur dioxide ng Bulkang Taal, dahilan upang isailalim ito sa alert level 3 matapos ang naging pag-aalburuto nito na tinawag na “short-lived phreatomagmatic burst.”

Ayon sa DOH, maaring magdulot ng pinsala sa respiratory system at posibleng mahirapang huminga ang sinumang indibidwal na makalalanghap o ma-exposed sa sulfur dioxide.

Dahil dito, pinapayuhan ang mga residente na naninirahan malapit sa bulkan na kung muli itong magpapakita ng pag-aalburuto, iwasan nang lumabas ng bahay kung wala namang importanteng pupuntahan, isara ang mga pinto at bintana, higit sa lahat laging magsuot ng facemask at protective gear na para sa mata, at tiyakin ding matatakpan ang buong katawan upang hindi direktang sumayad sa balat ang asupre na mula sa Taal.

Sakali namang ma-exposed sa sulfur dioxide, agad na makipag-ugnayan sa mga poison control centers o hospitals na malapit sa kanilang lugar.

Babala ng DOH, mapanganib ang ashfall na galing sa bulkan dahil maari itong magresulta sa pagkakaroon ng problema sa kalusugan.

Bunsod nito pinaalalahanan naman ang mga mayroong bronchitis, emphysema o asthma na iwasang ma-exposed sa volcanic ashfall.

Samantala, inirekomenda narin ng DOH ang agarang paglikas ng mga residenteng naninirahan sa mga itinuturing na high risk areas o malapit sa bulkang taal.

Magpapatupad ang Metropolitan Manila Development Authority (MMDA) ng 30-minute “heat stroke break” para sa lahat ng kanilang field personnel simula April 1, 2022.

Ayon sa MMDA, nais nilang masiguro ang kaligtasan at proteksyon ng mga traffic enforcers at street sweepers laban sa heat stroke at cramps o pulikat ngayong summer season.

Pahayag ng ahensya, ipatutupad ang heat-stroke break tuwing 10 am to 10:30 am o 10:30 am to 11am para sa mga 5am to 1pm shift, habang 11am to 11:30am o  11:30am to 12nn naman para sa mga 6am to 2pm shift.

Doon naman sa mga MMDA personnel na naka­-duty ng 1pm to 9pm, itinakda ang kanilang heat stroke break ganap na 2:30pm hanggang 3 p.m. O 3pm hanggang 3:30pm, at 3pm to 3:30pm o 3:30pm to 4pm naman ang break para sa mga papasok ng 2pm hanggang 10pm.

Samantalang 12nn to 1pm naman ang break ng mga nakaduty ng 7am to 4pm, habang 2:30pm to 3pm o 3pm to 3:30pm naman para sa mga may pasok ng 11am to 7pm.

Bunsod nito, inamin naman ng ilang MMDA field worker, na talagang naghahanap sila ng masisilungan kapag matindi ang init ng panahon upang maiwasan ang heat stroke.

Kahapon pumalo sa 33.4 degrees celsius ang init ng panahon sa lunsod ng quezon.

Kaya naman payo ng Department of Health (DOH) sa publiko na uminom ng maraming baso ng tubig at magsuot o magdala ng panggalang sa matinding init ng sikat ng araw.

Nakauwi na sa Pilipinas ang 142 pilipino mula sa  Ho Chi Minh City (HCMC) sa Vietnam.

Sa pamamagitan ito ng chartered sweeper flight nitong March 24 sa tulong ng Department of Foreign Affairs (DFA) at Embahada ng Pilipinas sa Hanoi.

Ayon sa embahada, kabilang sa na-repatriate ang ilang distressed filipinos na nawalan ng trabaho at ilang naka-tourist visa na hindi pa nakaalis ng Vietnam, bago ang itinakdang automatic extension ng Immigration department noong January 15.

52 sa mga ito ay dinaanan ng sweeper flight mula Bangkok sa Thailand bago lumapag sa HCMC.

Libre naman ang pagsailalim sa rt-pcr tests na sinagot din ng embahada. —sa panulat ni Abby Malanday

Covid-19 free na ang lahat ng tauhan ng Bureau of Immigration (BI) sa mga paliparan sa buong bansa.

Kasabay ito ng pagbubukas ng mga airports na nagsimula noong Pebrero a-diyes.

Ayon sa BI, wala nang aktibong kaso ng covid-19 sa nasa walong-raang personnel sa kanilang hanay.

Sa nasabing bilang, 622 sa mga ito ay nakatalaga sa  Ninoy Aquino International Airport (NAIA) terminals, habang ang iba ay naka-destino sa Mactan, Clark at sa Davao.

Sa ngayon, mas naging maayos na ang pagbibigay serbisyo ng BI sa mga paalis at paparating na pasahero.—sa panulat ni Abby Malanday