HOT STORIES OF THE WEEK

Tatlumput tatlong milyong Pilipino na eligible na maturukan ng booster shots ang hindi pa nakakatanggap ng additional vaccine dose.

Ayon kay health undersecretary Maria Rosario Vergeire, 11.8 million pa lamang sa 45 milyong eligible individuals ang nabigyan na ng booster shots.

Aniya, nagsagawa ang Department of Health ng ilang mga pag-aaral o survey upang matukoy kung bakit hindi pa tumatanggap ng booster ang ilang fully vaccinated individuals.

Nabatid aniya ng ahensya na naniniwala ang ilan sa mga ito na may sapat na silang proteksyon laban sa COVID-19 at dahil na rin sa natural immunity mula sa coronavirus infection.

Gayunman, pinaalalahanan ni Vergeire ang publiko na humihina ang natural immunity, maging ang immunity mula sa mga bakuna.

Batay sa datos ng pamahalaan noong Huwebes, nasa 65.5 milyong Pilipino ang fully vaccinated na laban sa COVID-19.

Nadagdagan pa ang bilang ng mga indibidwal na inilikas mula sa kani-kanilang mga kabahayan kasunod ng muling pag-aalboroto ng bulkang Taal.

Sa panayam ng DWIZ, sinabi ni Kelvin John Reyes, Public Infrormation Officer ng Office of Civil Defense-Calabarzon, ang mga evacuee ay mula sa apat na bayan, kabilang ang Laurel at Agoncillo.

Batay aniya sa kanilang datos, mahigit 1,000 pamilya ang nananatili sa evacuation centers, at mahigit 200 pamilya ang mga nananatili sa kanilang mga kamag-anak.

Tiniyak naman ni Reyes na may nakahanda silang pagkain at malinis na tubig para sa mga evacuee.

Nakapagtala ng 3 pang phreatomagmatic burst sa main crater ng Taal volcano, sa Batangas, sa nakalipas na 24-hour monitoring period.

Ayon sa Philippine Institute of Volcanology and Seismology (Phivolcs), nakapagtala rin ng 8 volcanic earthquakes, kabilang ang volcanic tremor, na tumagal ng 5 minuto.

Nagbuga rin ito ng plumes na aabot ng 400 hanggang 800 meters ang taas at kabuuang 4273 tonelada ng sulfur dioxide.

Nagbabala naman ang ahensya sa posibleng panganib gayong nakataas pa rin ang alert level 3 sa taal, kabilang ang biglaang pagsabog, pyroclastic density currents o base surge, volcanic tsunami, ashfall, at accumulation ng lethal volcanic gas.

Nanindigan ang China sa umano’y soberanya nito sa Scarborough Shoal o Bajo De Masinloc matapos ang malapitang paglalayag ng isang Philippine at Chinese Coast guard vessels sa pinag-aagawang teritoryo.

Una nang iniulat ng PCG ang insidente ng “close distance maneuvering” ng isang chinese vessel habang nagpa-patrol ang BRP Malabrigo sa bahagi ng naturang karagatan noong March 2.

Iginiit ni Chinese foreign ministry spokesperson Wang Wenbin na nasa ilalim ng hurisdiksyon ng Tsina ang Huangyan Dao at karagatang nakapaligid dito.

Tila sinisi pa ni wang ang PCG sa paglapit umano nito sa Chinese Coast Guard.

Inihayag naman ni PCG commandant Artemio Abu na ang nasabing insidente ang ika-apat na beses na nagkaroon sila ng close encounter sa Chinese Coast Guard sa Scarborough.

Namemeligro ang negosyo ng mga landlord at mga may-ari ng mga pinarerentahang office space sa bansa.

Ito’y dahil sa posibilidad na hindi na magrenta ng mga office space ang mga kumpanya sakaling magpatuloy ang work-from-home set up sa gitna ng COVID-19 pandemic.

Ayon kay David Leechiu, chief executive ng real estate brokerage firm na Leechiu Property consultants o LCP, maaaring maganap ang nasabing scenario, tatlong taon mula ngayon kung hindi pa rin babalik sa mga opisina ang maraming kumpanya.

Maaari anyang i-terminate ng mga kumpanya, partikular ng mga business process outsourcing firm, ang kanilang mga lease.

Idinagdag ni Leechiu na mayroong mga multinational companies na nais nang magbalik ang kanilang mga empleyado sa mga opisina dahil sa maraming “security breaches”.

Partikular na iniulat ng LCP ang ilan sa mga empleyadong nag-re-resign na hindi na ibinabalik sa kumpanya ang kanilang work-from-home equipment, tulad ng laptop, na naglalaman ng mga confidential company data.

Mayroong posibilidad na muling sumabog ang Bulkang Taal kahit na walang naitalang volcanic earthquakes sa paligid nito simula noong linggo.

Ayon kay DOST Undersecretary at Phivolcs director Renato Solidum Jr., ang biglaang pagbaba ng sulfur dioxide emission noong linggo sa 1,140 tons ay maaaring resulta ng harang sa main crater.

Kapansin-pansin din anyang bumaba bigla ang sulfur dioxide gas o mahigit 1,000 tons na lamang at posibleng nagkaron ng pagbara sa daanan ng gas kaya nagkakaroon pa rin ng pressurization.

Ipinaliwanag ni solidum na kahit walang mga pagyanig ay patuloy sa pag-akyat sa bunganga ng bulkan ang mainit na volcanic fluid na lumilikha ng usok na may taas na 1,000 meters.

Wala ring time window kung kailan ibababa ang alert level at kapag nakakita na ang Phivolcs ng parametro na nagsasabing posibleng magkakaroon ng mas malalakas na pagsabog, maaari anyang itaas agad sa level 4.

Kasalukuyang nasa Alert level 3 ang Taal Volcano matapos ang pagsabog noong Sabado.

Ginisa ng mga senador ang Department of Agriculture at Bureau of Customs sa pagdinig ng Senate Committee of the Whole dahil sa hindi matigil na smuggling ng agricultural products, tulad ng gulay at karne, at magkaibang datos sa importasyon, indikasyong may iregularidad dito.

Kinuwestyon ni senator Ping Lacson kung bakit nakalulusot ang technical smuggling ng gulay gayong napakahirap kumuha ng import permit at akreditasyon.

Kataka-takang paulit-ulit na aniya ang accreditation ng mga importer na na-blacklist at bakit hindi interesado ang BOC na mag-automate o mag-computerize ng sistema habang taong 2018 pa nila ito inalok na bibigyan ng pondo.

Tinanong naman ni senate president Tito Sotto, chairman ng Komite kung bakit wala pang naisasampang kaso para sa nasabat na smuggled agricultural products.

Bilang tugon, inamin ni Customs deputy commissioner Vincent Maronilla na nangangalap pa sila ng mga dokumento para mapalakas ang kaso habang nagpapatuloy ang procurement para sa kanilang automation sa tulong ng World Bank.

Inihayag naman ni DA assistant secretary Federico Laciste Jr. na hindi sila tumitigil laban sa smuggling, pero katulad ng ibang krimen, gaya ng sugal at droga, nagbabago ang mga ito ng taktika para sila maikutan.

Hindi pa anya automated ang DA kaya’t wala silang real-time monitoring ng importasyon at kaya iba ang datos nila kumpara sa aduwana.—mula sa ulat ni Cely Ortega-Bueno (Patrol 19)

Ibinunyag ng isang opisyal ng Department of Agriculture na may mga “big-time” personalities na sangkot umano sa smuggling ang tumawag sa kanya kaugnay ng mga kasong ikinakasa laban sa kanila.

Kinumpirma ito ni DA assistant secretary Federico Laciste Jr. sa ikalawang hybrid hearing ng senate committee of the whole hinggil sa talamak na agricultural smuggling sa bansa.

Tinanong ni Benguet provincial board member Robert Namoro si Laciste kung ano ang nangyari sa pakikipag-usap nito sa mga magsasaka at opisyal ng Benguet mula sa Bureau of Plant and Industry at DA noong March 19.

Inihayag ni Namoro na umamin si Laciste na may mga big-time na mga indibidwal na sangkot sa smuggling ang panay ang tawag sa kanya para sa mga pabor, kabilang ang ilang politiko.

Nilinaw naman ng DA official kay senate president Tito Sotto na wala siyang binigyan ng pabor at itinuloy niya pa rin ang pagsasampa ng mga kaso.

Bagaman tinanong kung maaaring pangalanan ni laciste ang mga tumawag sa kanya, hiniling ng opisyal na gawin na lamang ito sa executive session pero sa halip ay hiniling ni Sotto na isulat ang pangalan ng mga sangkot at isumite sa senate panel.—mula sa ulat ni Cely Ortega-Bueno (Patrol 19)

Mahigpit ang pagbabantay ng Batangas Provincial Police Office sa mga barangay na iniwan ng mga residente dahil sa pag-alboroto ng Bulkang Taal.

Ayon kay Batangas Provincial Police Director police colonel Glicerio Cansilao, nagpapatuloy ang regular patrol sa walong barangay na nagkaroon ng evacuation.

Ito ay para mapigilan ang pagkakaroon ng nakawan sa mga naiwang bahay, maliban pa sa seguridad na ipinatutupad sa mga evacuation centers.

Batay sa datos ng Batangas PPO, may 1,228 pamilya na katumbas ng 4,143 indibidwal ang inilikas dahil sa pag-aalboroto ng bulkan na hanggang ngayon ay nasa Alert level 3.

Kinabibilangan ito ng; barangay ng Banyaga at Bilibinwang sa Agoncillo; Buso-Buso, Gulod at Bugaan East sa Laurel; Palsara sa Balete; Quilling sa Talisay at Don Juan sa bayan ng Cuenca.—mula sa ulat ni Jaymark Dagala sa panulat ni Abby Malanday

Malaki ang naging lugi ng mga lokal na magsasaka dahil sa smuggling.

Ayon kay Agot Balanoy, Public Relations Officer ng the League of Associations sa La Trinidad vegetable trading areas, naglalaro sa 2.5 milyong piso ang lugi ng mga magsasaka at pagbaba sa 40% ng orders.

Ngayong araw, nagsimula na muli ang imbestigasyon ng Senado hinggil sa smuggling ng agricultural products sa bansa.

Unang isinagawa ang hearing noong December 2021 kung saan pinag-uusapan din ang smuggled na Chinese vegetables. —sa panulat ni Abby Malanday