HOT STORIES OF THE WEEK

Inamin ng Department of Finance (DOF) na wala ng sapat na pondo ang pamahalaan upang makapamahagi ng subsidiya sa minimum wage earners sa bansa.

Ayon kay Finance Assistant Secretary at spokesperson Paola Alvarez tinitingnan na ng kanilang ahensiya ang panukala ng labor department na 24 billion pesos wage subsidy sa gitna ng pagtaas sa presyo ng langis at mga pangunahing  bilihin.

Nabatid na bukod sa 200 pesos relief sa mga piling tahanan na magmumula sa 33 billion pesos budget allocation, ang makatatanggap lamang ng ayuda ay ang mga nasa transport at sa agricultural sectors.

Matatandaang inaprubahan ni Pangulong Rodrigo Duterte ang panukala na mamahagi ng unconditional cash transfers na  nagkakahalaga ng 200 pesos kada buwan sa “bottom 50%” ng mga pamilya sa bansa. —sa panulat ni Mara Valle

Ibinasura ng Land Transportation and Franchising and Regulatory Board (LTFRB) ang petisyon kaugnay sa pisong umento sa singil sa pamasahe sa jeepney.

Nakasaad sa resolusyon na inilabas ng LTFRB na mananatili sa siyam na piso ang minimum fare sa naturang pampublikong sasakyan.

Nabatid na kabilang sa mga grupo na naghain ng petisyon ang mga PUJ drivers at operators ng Pasang Masda, ALTODAP at ACTO.

Magugunitang, isinumite ng mga transport groups ang petisyon na itaas ang pasahe sa jeepney dahil pa rin sa patuloy na pagtaas ng presyo ng produktong petrolyo sa bansa. —sa ulat ni Jaymark Dagala (Patrol 9), sa panulat ni Mara Valle

Asahan na rin ang pagsipa ng presyo ng bigas sa susunod na linggo kasunod ng patuloy na pagtaas sa presyo ng produktong petrolyo.

Paliwanag ng Samahang Industriya ng Agrikultura (SINAG), anim na porsyento ng kanilang production cost ang napupunta sa krudo dahil sa paggamit ng traktora at patubig sa kanilang pananim.

Ayon kay SINAG Chairman Rosendo So, maliit ang ayuda ng gobyerno para matulungan ang lahat ng magsasaka at mangingisda sa Pilipinas, na aniya’y nasa 10 milyon.

Iginiit ni So na mainam na suspindihin ng tatlong buwan ang Excise Tax sa langis at VAT.

Kahapon nang simulang ipamahagi ng Department of Agriculture (DA) ang 3,000 pesos na fuel subsidy para sa mga magsasaka ng mais at mangingisda sa Tacloban, Leyte.

Bahagyang bumaba sa 99 dollars at 91 cents ang presyo ng produktong petrolyo, partikular ang Brent Crude, na global benchmark sa kabila ng sagupaan sa pagitan ng Russia at Ukraine.

Ito na sa ngayon ang pinaka-mababang presyo ng kada bariles ng krudo simula noong Pebrero.

Unti-unting bumaba ang presyo ng langis makaraang magpatupad ng malawakang lockdown dahil sa panibagong COVID-19 outbreak sa China, na nangungunang oil importer.

Bumaba naman sa 99 dollars at 44 cents ang kada bariles ng West Texas Intermediate Crude, na US benchmark habang nasa 113 dollars at 35 cents ang dubai crude, na inaangkat ng Pilipinas.

Tutol ang mga oil company sa ilang amendments ng Kongreso sa Oil Deregulation Law sa gitna ng walang puknat na pagtaas ng presyo ng krudo.

Kabilang na rito ang unbundling ng presyo at probisyon na nag-aatas sa refiners, importers at bulk distributors na panatilihin ang minimum inventory requirement sa loob ng 30 araw.

Iginiit ni Fernando Martinez, Pangulo ng Independent Philippine Petroleum Companies Association (IPPCA) na hindi solusyon ang price unbundling upang matapyasan ang lokal na presyo ng oil products.

Magkakaiba anya ang halaga ng ginagastos ng mga oil company depende sa lugar kaya’t nagbabago ang presyo ng kanilang mga produkto.

Kabilang sa tinukoy ni Martinez na dahilan ng price distortion ay ang distansya mula ng isang fuel depot sa retail location, real estate cost at gastos sa permits.

Samantala, inihayag naman ni Phoenix Petroleum Philippines Senior Vice-President Raymond Zorrilla na bagaman hindi pa nila nakikita ang kopya ng substitute bill sa Kamara nag-aamyenda sa Deregulation Law, patuloy ang kanilang pagtalima sa batas.

Mas pabor ang gobyerno na magpatupad ng targeted subsidy sa halip na suspendihin ang Excise Tax sa oil products.

Ito, ayon kay Finance Undersecretary Paola Alvarez, ay dahil sa long-term negative impact ng suspensyon ng Fuel Excise Tax sa kita ng gobyerno at ekonomiya.

Kung tutuusin anya ay ang mga medyo naka-aangat sa buhay ang mayroong pinaka-malaking fuel consumption na aabot sa 48.8% habang ang mga nasa lower income households ay mayroon lamang 13.8%.

Aminado si Alvarez na mas pabor sa mga nasa higher income bracket kung sususpendihin ang Excise Tax sa langis.

Gayunman, masama ang magiging epekto nito sa gobyerno sa pamamagitan ng mababang tax collection, na maka-aapekto naman sa mahihirap dahil mababawasan ang pondo ng pamahalaan para sa social services program.

Sa ngayon ay dalawang bill sa kongreso ang nananawagan ng pansamantalang suspensyon ng Excise Tax sa mga produktong petrolyo.

Lusot na sa House Committee on Energy ang Substitute Bill na nagsusulong ang Republic Act 8479 o Oil Deregulation Law.

Sa online meeting ng Kumite, mabilis na ipinasa ang substitute bill ‘subject to form and style’.

Alinsunod sa bill, inatasan ang lahat ng oil refiners, importers at bulk distributors na panatilihin ang Minimum Inventory Requirement (MIR) sa kada kumpanya, depot at produkto.

Kabilang sa MIR ang pagtiyak sa sapat na suplay ang diesel, gasoline, kerosene, household LPG, auto-LPG, fuel oil at aviation fuel.

Obligado naman ang mga refiner, importer at distributor na magkaroon ng 30 araw na supply at ang presyo ng mga finished petroleum products ay iba-base sa imbentaryo ng crude oil.

Layunin ng panukala na hindi maisama ng oil companies sa taas-presyo ang mga produktong petrolyo na nabili sa murang halaga o tinatawag na unbundling.

Panahon na para repasuhin ng Kongreso ang Oil Deregulation Law.

Ito ang inihayag ng Malakanyang bunsod ng patuloy na pagtaas ng presyo ng mga produktong petrolyo at global supplies na apektado ng nagpapatuloy na sagupaan ng Russia at Ukraine.

Ayon kay Acting Cabinet Secretary Melvin Matibag, nakatakda nang talakayin ng Departments of Energy (DOE) at Finance kay Pangulong Rodrigo Duterte ang panawagan na suspendihin ang Fuel Excise Tax.

Maaari rin anyang magpatawag si Pangulong Duterte ng emergency session para sa kongreso upang talakayin o amyendahan ang ilang batas bilang tugon sa problema.

Kahapon inilarga ng mga kumpanya ng langis ang kanilang ika-11 sunod na linggong dagdag presyo, na pinaka-malaking oil price increase sa kasaysayan ng bansa.

Inihayag ng Department of Health (DOH) na nakapagtala ang tatlong mga bansa sa Europe ng kaso ng Deltacron o pinagsamang Delta at Omicron variant.

Sinabi ni health undersecretary Maria Rosario Vergeire, kabilang dito ang France, Denmark at the Netherlands.

Batay aniya sa obserbasyon wala naman silang nakikitang kaibahan nito sa mga nauna nang lumabas na variants.

Dagdag ni Vergeire, patuloy na pinag-aaralan ito ng mga eksperto.

Samantala, sa ngayon aniya ay wala pa namang naitatalang kaso ng  Deltacron sa Pilipinas