HOT STORIES OF THE WEEK

Naghain ng petisyon ang labor group na Bukluran ng Manggagawang Pilipino (BMP) para sa 750 pesos na national minimum wage.

Ayon kay BMP general-secretary Mike Garay, tugon ito sa patuloy na pagtaas ng presyo ng langis at pangunahing bilihin.

Inihain ang petisyon sa regional wage boards ng anim na rehiyon kabilang ang; Metro Manila, Central Luzon, Calabarzon, Western Visayas, Central Visayas at Eastern Visayas.

Sa kasalukuyan, ang minimum wage sa Metro Manila ay naglalaro lamang sa 500 hanggang 537 pesos kada araw.—sa panulat ni Abby Malanday

Walang tinutukoy na sinumang kandidato si Pangulong Rodrigo Duterte nang sabihin nito ang mga ideal na katangian ng kaniyang magiging successor.

Ayon kay Partido Demokratiko Pilipino–Lakas ng Bayan o PDP-Laban president Alfonso Cusi, wishlist lamang ng Pangulo na maging decisive, may good character, compassionate at isang abogado ang susunod na Pangulo.

Wala aniya itong pinatutungkulang kandidato.

Nabatid na sa sampung kandidato sa pagka-Pangulo, tanging si Vice President Leni Robredo at si Jose Montemayor lamang ang abogado.

Habang sa pagkabise-presidente ay si Davao City mayor Sara Duterte ang abogado.—sa panulat ni Abby Malanday

Posibleng maglaro na sa 3.5% hanggang 4.5 % ang inflation rate sa Pilipinas ngayong taon.

Dahil ito sa nagpapatuloy na kaguluhan sa pagitan ng Russia at Ukraine na nagbunsod ng malawakang taas-presyo sa langis.

Sa panayam ng DWIZ, sinabi ni professor Astro Del Castillo, isang financial analyst na inaasahan na nila ang malalang epekto ng oil price hike sa presyo ng bilihin.

Pinayuhan naman ni Del Castillo ang publiko na magtipid, iwasan ang pag-invest sa hindi kailangang bagay at maging wais sa paggastos.–-sa panulat ni Abby Malanday

Mariing binatikos ng election watchdog na National Movement for Free Elections (NAMFREL) ang hindi pagkakaroon ng observer, sa pag-imprenta ng balota ng Commission on Elections (Comelec) para sa Halalan 2022.

Sa panayam ng DWIZ, sinabi ni NAMFREL chairman August Lagman na nakakapagtakang hindi nasunod ang taunang kaugalian na pagkakaroon ng observer tuwing printing ng balota.

Bagama’t kasi walang naiisip na masama ang Comelec, hindi pa rin maaalis ang pagdududa ng publiko sa transparency ng election.

Aabot sa higit 75,000 indibidwal ang lumahok sa ginanap na Career Service Examination-Pen and Paper Test (CSE-PPT) ngayong araw.

Ayon kay CSC Commissioner Atty.Aileen, ginanap ang unang CSC exam ngayong taon sa pitumpu’t pitong testing centers sa iba’t ibang lugar sa bansa.

Aniya, mayorya sa mga examinees ay mga empleyado ng pribadong sektor na nagnanais na magtrabaho sa tanggapan ng gobyerno.

Batay sa monitoring ng CSC, 7,178 examinees ang mula sa Region o mula sa mga probinsya ng Batanes, Cagayan, Isabela, Quirino at Nueva Viscaya.

Nabatid na naging maayos din ang daloy ng pagsusulit sa ilan pang rehiyon sa bansa.

Samantala, kinakailangang magpakita ng original o digital copy ng patunay na vaccination card (VaxCert) bilang patunay na nakakumpleto na ng bakuna kontra COVID-19. —sa panulat ni Abie Aliño-Angeles

Aprubado na ng Food and Drug Administration ang bakuna ng Sinovac para sa pediatric vaccination.

Ito ay matapos ipalabas ng FDA ang aprubadong  emergency use authorization (EUA) para sa bakunang CoronaVac ng nasabing kompanya.

Dahil dito, ayon kay IP Biotech Group chairman Enrique Gonzales, maaari nang gamitin ang CoronaVac para sa mga batang edad anim pataas.

Aniya, ang pag-apruba sa kanilang bakuna ay malaking tulong para maprotektahan ang mga kabataan kontra COVID-19 at tiyak na magkaaroon ng mas malawak na access at vaccine equity ang bansa.

Nabatid na batay sa isinagawang pag-aaral sa Chile ng nasabing bakuna, nakitang epektibo ang Sinovac sa 74% ng 1.9 milyong batang edad anim hanggang 17.

Maliban dito, nasa  90% sa bata ang hindi na-ospital habang 100% naman ang hindi na dinala pa sa Intensive Care Unit (ICU) o ‘di kaya ay nasawi.

Matatandaang tanging ang mga bakuna lamang ng Pfizer at Moderna ang ginagamit ng pamahalaan para sa pediatric vaccination.—sa panulat ni Abie Aliño-Angeles

Asahan na ang kaunting bilang ng mga public utility jeepneys (PUJs) na bumibyahe sa mga susunod na araw.

Ayon kay 1-UTAK chair Atty. Vigor Mendoza II, ang tigil-pasada kasi ang nakikitang paraan ng ilang tsuper para hindi na malugi bunsod ng serye ng taas-presyo ng mga produktong petrolyo.

Aniya, kung mamamasada pa kasi ang ilan sa mga ito, tiyak na hindi na sila kikita dahil mauuwi lamang ang kanilang kinita sa pagpapakarga ng gasolina.

Iminungkahi rin ng Pinagkaisang Samahan ng mga Tsuper at Operator Nationwide (PISTON) na bawasan ang mga designated loading at unloading area.

Paliwanag ni Piston national president Mody Floranda, sa ganitong paraan ay mababawasan ang konsumo nila mula sa karaniwang tatlumpung litrong krudo.

Kaugnay nito, kinuwestiyon din ni Floranda ang lingguhang paggalaw n presyo sa produktong petrolyo dahil hindi naman daw lingguhan ang pag-angkat ng krudo ng bansa.

Giit nito, hindi dapat hinahayaan ng gobyerno na gawin ito ng mga oil company dahil batay sa datos, mayroong 30 hanggang 40 days na stock sa bansa.

Samanatala, sa 11 sunod na linggo, posibleng ipatupad ng mga oil company ang bigtime oil price hike na maglalaro sa 6 hanggang 12 piso ang dagdag sa kada litro ng produktong petrolyo. —sa panulat ni Abie Aliño-Angeles

Lumapag na sa bansa ang 22 Filipino seafarers na naiipit sa kaguluhan sa pagitan ng Russia at Ukraine.

Ang mga seafarers na ito ay pawang crew members ng oil tanker na MTM Rio Grande na nakadaong sa Nika-Tera port sa nasabing bansa.

Sinalubong ng mga opisyal ng Department of Foreign Affairs (DFA)at Overseas Workers Welfare Administration (OWWA) ang mga dumating na Pinoy.

Matatandaang nitong Lunes nang ipagutos ng pamahalaan ang sapilitang pagpapalikas sa mga Pinoy na sa Ukraine dahil sa umiigting na pag-atake ng Russia sa kanilang bansa. —sa panulat ni Abie Aliño-Angeles