HOT STORIES OF THE WEEK

Umabot na sa 313 na unibersidad sa Pilipinas ang nakapagsagawa na ng face-to-face classes.

Ayon kay Commission on Higher Education (CHED) Chairman Prospero De Vera III, bagama’t kaunti pa lamang ang bilang, inaasahang madadagdagan pa ito sa school year 2022-2023.

Nitong Enero, karamihan sa mga unibersidad ay nakatutok sa online classes dahil sa pagsipa ng kaso ng covid-19.

Sa ilalim ng alert level 1, pinapayagan na ang face-to-face classes gamit ang 100% ng mga silid-aralan. —sa panulat ni Abby Malanday

May nakita nang lead ang National Bureau of Investigation (NBI) kaugnay sa pagkawala ng mahigit 30 sabungero sa bansa.

Pero ayon kay Department of Justice (DOJ) Secretary Menardo Guevarra, wala pang ibang impormasyong ibinibigay ang NBI hinggil dito.

Naniniwala naman si Guevarra na malapit nang maglabas ng resulta ang Philippine National Police (PNP) at ang NBI sa ginagawang parallel investigation sa kaso.

Una nang dumulog sa mga otoridad ang pamilya ng mga biktima matapos maglaho ang kanilang kamag-anak. —sa panulat ni Abby Malanday

Gagawing swimming pool o paliguan para sa turista ang isang bahagi ng Manila Baywalk Dolomite Beach.

Ayon kay DENR Acting Sec. Jim Sampulna,  dito na nakatuon ang ahensya para hindi na lalayo pa sa Metro Manila ang mga residente ng rehiyon para lamang mamasyal.

Sa ngayon aniya, nasa finishing touches na lamang sila at posibleng buksan na ito pagtapos ng mahal na araw na perfect din sa pagsisimula ng tag-init sa bansa.

Maliban dito, nakalatag na rin ang pagsasapinal ng Memorandum of Agreement sa pagitan ng DENR at Department of National Defense (DND) at Philippine Veterans Affairs Office (PVAO) para sa planong cannon replica ng Corregidor Island na ginamit noong ikalawang digmaang pandaigdig.—sa panulat ni Abie Alño-Angeles

Maaga pa para tuluyang tanggalin ang mandatoryong pagsusuot ng face mask kahit napag-uusapan na ang pagbaba ng ilang lugar sa alert level 0 dahil sa bumababang kaso ng COVID-19.

Ayon kay OCTA Research Fellow Dr. Guido David, walang magiging pagkakaiba ang alert level 0 sa alert level 1 kung luluwagan pa ang restriksyon at maraming negosyo ang magbubukas.

Pero kung sakali aniyang tatanggalin na ang pagsusuot ng mask sa bagong ipapatupad na restriksyon, sinabi ni David na hindi pa handa ang bansa.

Sa 598 na bagong nahawa sa COVID-19 na naitala ng DOH kahapon, mas mababa na ito sa projection ng OCTA na nasa 650.

149 sa bagong naitala ay nanggaling sa NCR, 90 sa CALABARZON at 66 sa Western Visayas. —sa panulat ni Abby Malanday

Ligtas na mula sa kaguluhan sa Ukraine laban sa Russia, ang nasa mahigit 250 pilipinong naroon.

Ayon kay Department of Foreign Affairs (DFA) Undersecretary Sarah Lou Arriola, 259 sa mga pilipinong ito ay nakalikas na, 169 ang nasa iba’t ibang ligtas na borders at 90 ang na-repatriate.

Umabot naman sa 55 napauwing Pinoy ay mga seafarers.

Bagama’t aniya nahihirapan na ilikas ang mga seafarers partikular yung mga na-stranded sa Black Sea, tiniyak ni Arriola na mino-monitor ng Philippine Overseas Employment Administration (POEA) ang lagay ng mga ito upang tuluyan nang mapauwi. —sa panulat ni Abby Malanday

Inaasahan ang pagkakasa ng gobyerno ng total deployment ban sa Ukraine.

Ayon ito kay OWWA Administrator Hans Leo Cacdac sa gitna na rin nang patuloy na kaguluhan sa Ukraine matapos lusubin ng Russia.

Sinabi ni Cacdac na posibleng sa mga susunod na araw ay mag isyu na ng total deployment ban ang POEA matapos na ring itaas ng DFA sa alert elvel 4 ang sitwasyon sa Ukraine na nangangahulugan ng mandatory repatriation.

Binalaan ng Commission on Elections (COMELEC) ang mga national at local candidate sa pagsasagawa ng mga raffle sa gitna ng kampanya.

Ayon kay COMELEC Spokesman, Director James Jimenez, ipinagbabawal ang mga raffle kapag nagsimula na ang mismong campaign season dahil maaaring makasuhan ang mga kandidato.

Pebrero a–8 nang umarangkada ang kampanya para sa national candidates habang sa Marso a–25 lalarga ang para sa mga local candidate.

Maaari anyang humantong sa vote buying kung magsasagawa ng raffle kaya’t mas makabubuting huwag na lamang ituloy ang mga ganitong aktibidad.

Makatitiyak ang publiko na pinakikinggan ni Pangulong Rodrigo Duterte ang lahat ng suhestiyon kung paano maiibsan ang epekto ng walang prenong pagtaas ng presyo ng mga produktong petrolyo.

Kabilang sa mga suhestiyon ay suspendihin ang Excise Tax sa fuel products at magdeklara ng State of Economic Emergency.

Ayon kay Acting Presidential Spokesman at Communications Secretary Martin Andanar, bukas si Pangulong Duterte sa mga payo ng mga eksperto.

Ilang mambabatas na rin anya ang sumusuporta sa suspensyon ng Excise Tax sa fuel products bilang panandaliang ginhawa sa gitna ng nagpapatuloy na oil price hike na pinalala ng giyera sa pagitan ng Ukraine at Russia.

Gayunman, tinanggihan ng Department of Budget and Management (DBM) ang panukala at nagbabalang maaaring magkaroon ito ng epekto sa pagpopondo sa social services ng gobyerno.

Magpapatupad ng aabot sa 63 sentimos kada kilowatt hour na umento ang kumpaniyang Manila Electric Company o MERALCO ngayong buwan ng Marso.

Batay sa abiso ng MERALCO, ito’y dahil sa mataas na generation charge bunsod na rin ng pagmahal ng bentahan ng kuryente sa wholesale electricity spot market (WESM).

Bukod pa rito, marami ring biniling kuryente ang MERALCO dahil sa nakatakdang maintenance ng Quezon Power at First Gas – San Lorenzo plant.

Ipinaliwanag pa ng power distributor na nakaapekto rin sa panibagong umento ang paghina ng halaga ng piso kontra dolyar.

Dahil dito, 13 pesos ang madaragdag sa monthly bill ng mga kumokonsumo ng 100 kilowatt per hour habang 31 pesos naman para sa mga kumukonsumo ng 500 kilowatt per hour.

Bago iyan, dalawang beses munang nagpatupad ng bawas singil sa kuryente ang MERALCO. —sa ulat ni Jaymark Dagala (Patrol 9)