HOT STORIES OF THE WEEK

Ipagpapatuloy ng Commission on Elections (COMELEC) ang kanilang Oplan Baklas.

Nilinaw ni COMELEC Spokesman, Director James Jimenez na isasagawa lamang ang operasyon sa mga pampublikong lugar alinsunod sa batas.

Ang pagbaklas lamang anya sa iligal na campaign materials sa private properties ang sinuspinde ng Supreme Court.

Martes nang maglabas ng TRO ang Korte Suprema laban sa Oplan Baklas ng poll body bilang tugon sa petisyon ng ilang indibidwal.

Binigyan naman ng SC ang COMELEC ng 10 araw upang makapaghain ng kanilang komento.

Pinag-iisipan na ng ilang jeepney operators at drivers na maglunsad ng tigil-pasada dahil sa walang prenong pagtaas ng presyo ng mga produktong petrolyo.

Ayon kay Liga ng Transportasyon at Operators sa Pilipinas, President Orlando Marquez, nagpulong sila ng ilang jeepney operators at drivers at inihayag ng mga ito na plano nilang tumigil muna ng operasyon kung hindi tutulungan ng pamahalaan.

Kabilang sa mga nagpa-planong mag-tigil-pasada ang mga driver at operator sa Aparri, Cagayan; La Union, Ilocos Sur, Mountain Province, Cordiller, ilang bahagi ng Visayas at Mindanao.

Umaabot na anya sa mahigit 70 ang presyo ng krudo sa mga nabanggit na lugar kaya’t kakarampot na lamang ang kinikita ng mga operator at tsuper.

Hindi ipahihinto ng Malacañang ang operasyon ng E-Sabong hangga’t wala pang pinal na report ang mga otoridad sa isinasagawa nitong imbestigasyon sa 34 na mga nawawalang sabungero.

Base sa nilagdaang memorandum ni Executive Secretary Salvador Medialdea kahapon, kailangan na magsagawa pa ng mas malalim na pagsisiyasat ang National Bureau of investigation (NBI) at Philippine National Police (PNP) hinggil sa kaso kung saan dapat na maihain nila sa tanggapan ng pangulo at Department of Justice  ang kanilang official report sa loob ng 30 araw.

Pinatitiyak din ng palasyo sa Philippine Amusement and Gaming Corporation (PAGCOR) ang pagsasagawa ng imbestigasyon sa posibleng mga paglabag sa ipinatutupad na E-Sabong licensees na nakapaloob sa terms of agreement.

Nais din ng Malacañang na malaman kung naipatutupad sa mga operasyong ito ang security at surveillance requirements na nakasaad sa regulatory framework ng e-sabong off cockpit betting station, kung saan lahat ng game sites nito ay dapat na mayroong CCTV.  —sa ulat ni Jopel Pelenio (Patrol 17)

Malamig si Energy Secretary Alfonso Cusi sa panawagang magdeklara na si Pangulong Rodrigo Duterte ng State of Economic Emergency dahil sa hindi maawat na pagtaas ng presyo ng oil products.

Una nang inihirit ni Albay 2nd District Rep. Joey Salceda sa Ad Hoc Committee Hearing noong Lunes na isailalim ang bansa sa State of Economic Emergency upang mapabilis ang pamamahagi ng fuel subsidy.

Gayunman, iginiit ni Cusi na hindi na kailangan ang nasabing deklarasyon dahil ginagawa naman ng gobyerno ang lahat ng paraan upang maibsan ang matinding epekto ng oil price increase.

Kailangan anya ang tulong ng lahat upang masolusyonan ang problema sa napakamahal na presyo ng mga produktong petrolyo.

Samantala, umaasa naman ang kalihim na hindi magtatagal ang problema at maipatutupad sa lalong madaling panahon ang mga hakbang upang mabawasan ang mabigat na pasanin ng taumbayan.

Aabot na sa 200 Filipino sa Ukraine ang inilikas ng Department of Foreign Affairs (DFA) sa harap ng nagpapatuloy na pag-atake ng Russia.

Ayon kay Foreign Affairs Undersecretary Sarah Lou Arriola, kabilang sa mga inilikas ang 63 Pinoy na nakauwi na ng Pilipinas.

73 naman ang dinala sa Romania, 33 sa Moldova, 15 sa Hungary, siyam sa Austria habang anim sa Poland na pawang malapit lamang sa Ukraine.

Samantala, 21 filipino crew members ng nabalahaw na M/VS-Breeze sa Port of Ilyichevsk sa Black Sea ang nakauwi na rin.

Nito lamang lunes itinaas ng DFA ang crisis alert level status sa alert level 4 sa Ukraine, nangangahulugang mandatory o sapilitan na ang paglilikas.

Maaaring pumalo sa 100 pesos ang kada litro ng gasolina sa mga susunod na linggo depende kung hindi mapipigilan ang pagsirit ng presyo sa international market.

Ito ang inamin ni Energy Secretary Alfonso Cusi sa gitna ng walang prenong oil price increase.

Ayon kay Cusi, sa ngayon ay nasa 125 dollars na ang kada bariles ng Dubai Crude na pangunahing inaangkat ng Pilipinas habang ang retail price ng gasolina ay sumasampa na sa 70 pesos kada litro.

Sa kabila nito, umaasa at nananalangin anya sila na hindi na tataas pa ang presyo ng Dubai Crude sa world market.

Nanganganib sumirit sa otso hanggang dose pesos ang kada litro ng dagdag presyo sa mga produktong petrolyo sa susunod na linggo kung hindi huhupa ang price increase sa international market.

Sa hearing ng Fuel Crisis Ad Hoc Committee sa Kamara, inihayag ni Jesus Suntay, President at CEO ng Cleanfuel Group of Companies na umakyat na sa 124 dollars ang kada bariles ng Dubai Crude.

Ang Dubai Crude anya ang pangunahing oil product na inaangkat ng Pilipinas mula United Arab Emirates at kung aalagwa pa ang presyo nito ay tiyak na mayroon itong epekto sa local oil industry.

Dahil dito, posibleng sumampa sa 12 pesos 72 centavos ang dagdag sa kada litro ng Diesel habang 8 pesos 28 centavos sa Gasolina sa susunod na linggo.

Batay ito sa Mean of Platts Singapore (MOPS), na ginagamit ng local oil industry sa daily average ng lahat ng trading transactions sa pagitan ng mga buyer at seller ng petroleum products.

Gayunman, ang mga nasabing price adjustment ay naka-depende pa sa trading results sa susunod na apat na araw.

Nakauwi na sa bansa ang panibagong batch ng mga Pilipino na na-repatriate mula Ukraine.

Dumating nitong umaga sa Ninoy Aquino International Airport (NAIA) terminal 1 ang 21 tripulanteng Pinoy crew members ng M/V S-Breeze sa pamamagitan ng  commercial flight ng philippine airlines flight PR-659 mula Moldova, Europe.

Sinalubong naman sila ng Overseas Workers Welfare Administration  (OWWA) at Department of Foreign Affairs (DFA).

Ayon sa mga Pinoy, napagdesisyunan nilang lisanin ang Ukraine upang hindi maipit sa sigalot sa pagitan nito at ng Russia.

Nakatakdang tumanggap ng tig-10,000 pesos na cash assistance mula sa gobyerno ang mga Filipino repatriate.—mula sa ulat ni Raoul Esperas (Patrol 45)

Nanumpa na kay Pangulong Rodrigo Duterte si acting presidential spokesman at cabinet secretary Karlo Nograles bilang Ad interim chairman ng Civil Service Commission (CSC).

Nilagdaan ni Pangulong Duterte ang appointment paper ni Nograles noong Marso 4 at magtatapos naman ang termino sa Pebrero 2, 2029.

Ang pagkakatalaga sa palace official ay alinsunod sa probisyon ng Section 16, Article 7 ng 1987 Constitution at umiiral na mga batas.

Pinalitan naman ni Nograles si dating CSC chairman Alicia Dela Rosa-Bala na nagretiro noong Pebrero 2.

Samantala, tikom ang Malakanyang kung sino ang papalit kay nograles bilang acting spokesman at cabinet secretary.

Sinimulan nang ipatupad ng mga kumpanya ng langis ang pinaka-malaking dagdag – presyo sa kanilang mga produkto.

Alas-12:01 kaninang hatinggabi, buena manong inilarga ng Caltex ang dagdag na P3.60 sa kada litro ng gasolina, P5.85 sa diesel habang P4.10 sa kerosene.

Umarangkada rin ang kahalintulad na price hike ng Petron, Flying V,  Phoenix Petroleum, PTT Philippines, Jetti Petroleum, Shell, Petrogazz at Seaoil, kaninang ala-6 ng umaga.

Mamayang alas-4 naman ng hapon ipatutupad ng Cleanfuel ang kanilang increase.

Ito na ang ika-sampung sunod na linggong nagpatupad ng dagdag-presyo sa mga produktong petrolyo bunsod ng nagpapatuloy na giyera sa pagitan ng Russia at Ukraine.