HOT STORIES OF THE WEEK

Dinumog ng mga nais magpa-full tank ang ilang gasolinahan kagabi bunsod ng pagtaas ng presyo ng mga produktong petrolyo.

Hindi inalintana ng maraming motorista ang haba ng pila para makatipid, gaya sa Imelda Avenue at Ortigas Avenue extension sa Cainta, Rizal na nag-mistulang prusisyon.

Sa pag-iikot ng DWIZ, pinilahan din ang ilan pang gasolinahan sa Metro Manila, tulad sa Pasig, Caloocan at Quezon cities.

Dahil sa price hike, maglalaro na sa 66 hanggang 85 pesos ang kada litro ng gasoline; 58 hanggang 73 pesos ang diesel.

Ipinanawagan na ng ekonomistang si House Ways and Means Committee chairman at Albay 2^nd district Rep. Joey Salceda kay Pangulong Rodrigo Duterte ang pagdedeklara ng economic emergency.

Sa harap ito ng hindi maawat na pagtaas ng presyo ng mga produktong petrolyo.

Ayon kay Salceda, obligasyon ni Pangulong Duterte na tugunan ang lumulobong presyo ng oil products na may napakalaking epekto sa ekonomiya ng bansa na nagsisimula pa lamang bumangon mula sa krisis na idinulot ng COVID-19 pandemic.

Inihirit ni Salceda ang naturang hakbang matapos ang hearing ng ad HOC House Committee na tumalakay sa oil prices habang nagkasundo ang mga mambabatas na irekomenda sa Pangulo na magpatawag ng special session ang kongreso.

Kung magdedeklara anya ng State of Economic Emergency ay maaaring gamitin ng local government units ang kanilang calamity funds upang matugunan ang epekto ng tumataas na presyo ng krudo.

Kabilang sa mga maaaring tatalakayin sa special session ang  pagsuspinde sa excise tax sa oil products at pagrebisa sa oil deregulation law.

Ipinag-utos na ng Department of Foreign Affairs (DFA) ang mandatory evacuation para sa lahat ng Pilipinong nasa Ukraine, sa gitna ng kaguluhan doon dahil sa Russia.

Sa inilabas na pahayag ng DFA, itinaas na sa Alert level 4 ang crisis alert level sa Ukraine dahil sa mapanganib na gulo.

Sa ilalim ng Alert level 4, sapilitan na ang pagpapauwi sa mga Pilipino sa pamamagitan ng pondo ng gobyerno.

Tutulong sa pagpapauwi ang Philippine Embassy sa Poland at ang rapid response team.

Patuloy naman na imo-monitor ng DFA ang political at security development sa Ukraine.—sa panulat ni Abby Malanday

Bibigyan ng parusa ng Commission on Elections o Comelec ang sinumang kandidato na hindi dadalo sa nalalapit na presidential at vice-presidential debate na kanilang inorganisa.

Ayon kay Comelec acting spokesperson Socorro Inting, hindi na magagamit ng mga kandidato ang opisyal na E-rally channels ng Comelec sa buong election period, kung hindi ito dadalo sa debate.

Nakapaloob ito sa kasunduang inihanda ng comelec sa pagitan ng mga kandidato.

Samantala, magkakaroon ng walang empty podium ang kandidatong hindi lalahok sa debate.—sa panulat ni Abby Malanday

Nagpatupad na ng taas-pasahe ang ilang drivers ng Public Utility Vehicles (PUVs) kahit wala pang pormal na kautusan para rito.

Sa gitna ito ng ikasampung beses na taas-presyo ng langis sa bansa dahil sa kaguluhan sa pagitan ng Russia at Ukraine.

Sa panayam sa DWIZ, sinabi ni Ka Lando Marquez, presidente ng Liga ng mga Transportasyon at Operator ng Pilipinas (LTOP) na itinuturing itong survival kung saan buhay na ng kanilang pamilya ang nakataya.

Patuloy naman ang panawagan ni Marquez sa gobyerno na tuluyan nang aprubahan ang kanilang panawagang taas-pasahe para sa kapakanan ng mga drivers.–-sa panulat ni Abby Malanday

Tutol ang National Center for Commuter Safety and Protection sa isinusulong na itaas sa 15 piso ang minimum na pamasahe sa mga Public Utility Vehicles (PUVs).

Bunsod ito ng taas-presyo ng langis sa bansa na nasa ika-sampung sunod nang umaarangkada, dahil sa nagpapatuloy ng kaguluhan sa pagitan ng Russia at Ukraine.

Sa panayam sa DWIZ, sinabi ni Elvira Medina, chairperson ng National Center for Commuter Safety and Protection na maraming Pilipino ang maaapektuhan nito lalo’t naghihirap ang karamihan dahil sa COVID-19 pandemic.

Imbes na magtaas-pasahe, inirekomenda ni Medina ang paghahanap ng solusyon at iba pang sources na pagkukunan ng langis.—sa panulat ni Abby Malanday

Posible nang makapagdaos ang mga paaralan ng in-person graduation ceremonies para sa School Year 2021-2022, kung magpapatuloy ang paghusay ng COVID-19 pandemic situation sa bansa.

Ayon kay DepEd undersecretary Nepomuceno Malaluan, posible ring mas maagang magsimula ang pagbubukas ng S.Y 2022-2023 kung magtutuluy-tuloy na ang pagganda ng sitwasyon sa bansa.

Sinabi rin ni Malaluan na magsasagawa sila ng rekomendasyon at plano base sa kanilang desisyon, habang ang susunod na administrasyon na ang magsasagawa ng mga kaukulang adjustments kung kailan magsisimula ang susunod na school year.

Matatandaang ang School Year 2021-2022 ay nagsimula noong September 13, 2021 dahil sa pandemya at mayroong 25 million na estudyanteng nag-enroll para dito.—sa panulat ni Mara Valle

MISMONG si re-electionist Masbate Gov. Antonio Kho ang nagpahayag  na ang kanilang buong probinsiya ay todo suporta sa tambalan nina presidential candidate Ferdinand ‘Bongbong’ Marcos Jr. at running-mate na si Inday Sara Duterte, kasabay ng pagsasabing malaki ang tiwala nilang ipagpapatuloy nina Bongbong at Sara ang legasiya ng kanilang mga ama na kapwa itinuturing na pinakamahuhusay na mga presidente ng bansa.

Sa panayam bago ang pagdating ni Marcos sa Masbate Airport para sa ‘campaign sortie’ nitong Sabado, sinabi ni  Kho na ang kanilang local leaders at mga kababayang Masbateno ay naniniwalang tutumbasan nina BBM at Sara ang kapwa kagalingan nina dating Pangulong Ferdinand Marcos Sr. at Pangulong Rodrigo Duterte.

“BBM kasi ngayon lang na-realize ng mga tao, in my own personal analysis, na ang ginawa ng ama ni Bongbong Marcos ngayon lang na-realize, tama pala ang ginagawa,” ani Kho.

“BBM will continue the legacy that his father has started. Same with Sara, Sara will continue the legacy of his father,” sabi pa ng gobernador.

Isang simple at maikling dayalogo ang isinagawa sa Airport matapos ipakilala ni Kho si Marcos sa mga local officials ng probinsiya.

Ayon sa opisyal, 17 sa 21 mayor sa kanilang probinsiya ang “all-in” para sa UniTeam.

“With the political machineries that we have. We are now in full-battle gear and ready to work to give our full support,” dagdag pa ni Kho.

Kasabay nito, tiniyak ng mga local leaders ang “landslide victory” sa kanilang probinsiya ni BBM.

“Sinabi ko kay BBM kung wala nang oras ‘wag nang pumunta ng Masbate dahil tatlong presidentiable na ang naipanalo natin dito na hindi na pumunta … Ramos, Estrada and GMA. We made history when GMA won because his rival is Roco na taga Region 5,” wika pa ni Kho.

“This is another history in the making dahil BBM’s rival (Leni Robredo) is also from the region. Pero bago ako mapahiya may itatanong ako sa inyo? Kaya ba nating i-maximize ang boto for BBM?” tanong ng gobernador sa mga chief local executives ng lalawigan.

“Kaya!” sama-samang sigaw at tinig ng mga lokal na opisyal bilang sagot sa tanong ni Kho.

Ang Masbate ay may tatlong ‘congressional districts,’ 20 ‘municipalities’ at isang lungsod na may kabuuang 600,000 registered voting population noong taong 2019.

Si Kho rin ang kauna-unahang Bicolano governor na nagdeklara ng todo suporta sa UniTeam, bagay na sinasabi ng mga eksperto na malabo nang ma-solid ni Leni Robredo ang buong Bicolandia.

Nagpahayag na rin ng kanyang suporta si Catanduanes Gob. Joseph Cua para sa BBM-Sara UniTeam.

Si Camarines Norte Governor Edgar Tallado ay nag-endorso na rin sa BBM-Sara UniTeam noong Pebrero 8 kasabay ng pagdiriwang ng “Sara para sa Barangay” sa Daet City.

Inaasahang darating na ng Pilipinas ang nasa 21 Filipino seafarers na inilikas sa barko na nasa Odessa, Ukraine sa Martes, Marso a-8.

Ang mga seafarers na ito ay lulan ng MV S-Breeze na naipit sa kasalukuyang gulo sa Ukraine mtapos itong sakupin ng Russia.

Ayon sa Department of Foreign Affairs (DFA), ang mga naturang seafarers ay nakatawid na ng Moldova noong Pebrero a-bente siyete at nakarating sa Romania noong Marso a-primero.

Sa ngayon, mayroon pang labingtatlong seafarers na kasalukuyang nasa Moldova at nahihintay na ma-repatriate.—sa panulat ni Abie Aliño-Angeles