HOT STORIES OF THE WEEK

Nakaamba ang muling pagsirit sa presyo ng produktong petrolyo sa ika-sampung linggong pagtaas bunsod ng kaguluhan sa pagitan ng Russia at Ukraine.

Ang pagtaas sa presyo ng diesel ng maglalaro ayon sa ulat ng P5.30 centavos  hanggang P5.50 centavos habang sa gasolina ay P3.50 centavos hanggang P3.70 centavos kada litro, pinakamataas na dagdag-presyo sa krudo sa nagdaang isang dekada.

Nabatid na gumagamit ang local oil industry ng mean of platts Singapore, isang trading transactions sa pagitan ng buyers at sellers ng petroleum products.

Samantala, ang presyo ng Unioil Petroleum Philippines, sa darating na trading week ngayong March 8 hanggang 14 ay nagpapakita ng pagtaas ng presyo ng diesel sa P4 kada litro at P3 naman per liter sa gasolina. —sa panulat ni Mara Valle

Tumaas ang family living wage o sahod na kailangan kada araw ng pamilyang may limang miyembro sa National Capital Region (NCR).

Lumabas sa pag-aaral ng Ibon Foundation, na ang pamilyang mayroong limang miyembro ay kailangan ng mahigit P25,000 kada buwan upang mabili ang lahat ng kanilang pangunahing pangangailangan.

Ayon sa naturang foundation, malayo ang naturang halaga sa basic minimum wage sa NCR na P537 kada araw.

Dahil na rin sa pagtaas ng presyo ng iba’t-ibang bilihin at serbisyo nabatid na 1,072 pesos ang kailangan kada araw o P25,252 kada buwan upang mabili ng pamilya na may limang miyembro ang kanilang pangangailangan.

Samantala, kabilang sa mga ikinonsiderang arawang gastusin ng pamilyang pilipino ang pagkain, renta sa bahay, ipon, tubig, huryente, gas, transportasyon at edukasyon. —sa panulat ni Mara Valle

Minamadali ng Department of Transportation (DOTr) na matapos ang pagtatayo ng common station para sa 3 railway system sa bansa sa katapusan ng Marso ngayong taon.

Ayon kay DOTr Secretary Arthur Tugade, makalipas ang mahigit labing limang taon mula nang aprubahan ng National Economic and Development Authority (NEDA) ang proyekto noong 2006 ay nakatakda nang makumpleto ang ipinagagawang common station sa North Avenue, Quezon City.

Layon ng naturang estasyon na pagdudugtungin ang apat na major railway line sa National Capital Region na LRT-1, MRT-3, MRT-7 at ang itatayo pa lamang na Metro Manila Subway.

Dagdag pa ni Tugade, target ng gobyerno na simulan ang operasyon ng common station Hulyo ngayong taon at tiniyak rin nito na sa kabila nang pagpapabilis dito ay sisiguruhin nila na magiging maayos at dekalidad ang proyekto. —sa panulat ni Mara Valle

Inihayag ni Pangulong Rodrigo Duterte na haharapin niya ang nakahaing reklamo laban sa kanya sa International Criminal Court (ICC) kahit wala na ito sa puwesto.

Ayon sa pangulo, ipinangako niya ang law and order bago maupo sa puwesto at hindi niya papayagang masira ang bansa dahil sa illegal na droga.

Pero nanindigan ang presidente na hindi siya papayag na mamayagpag ang sindikato ng droga habang siya ang nakaupo sa puwesto dahil tiyak na hindi uubra sa kanya ang mga ito.

Samantala, binigyang-diin naman ng pangulo na dalawang buwan na lamang at siya ay aalis na sa puwesto at malugod niyang isasalin ang kapangyarihan sa sinumang magiging susunod na mamumuno sa bansa. —sa panulat ni Mara Valle

Ipinahayag ng National Task Force (NTF) against Covid-19 na mamimigay ang Pilipinas ng mga covid vaccine sa mga karatig-bansa sa timog-silangang Asya.

Ayon kay NTF Medical Adviser Dr. Ted Herbosa, ito raw ay dahil sobra ang suplay ng bakuna sa bansa.

Dagdag pa ni Herbosa, ang problema na lamang ay ang vaccine hesitancy ng mga pilipino, partikular sa mga liblib na lugar.

Nabatid na mahigit 63.8 milyong katao na ang naturukan ng unang dalawang dose ng covid vaccine, habang mahigit 10.4 million naman ang nakatanggap na ng booster shot. —sa panulat ni Mara Valle

Muling nanawagan ang mga magsasaka sa National Food Authority (NFA) na bilhin ang mga palay ng lokal na magsasaka sa bansa.

Ayon kay Bantay Bigas Spokesperson Cathy Estavillo, matatabunan muli ang kanilang ani sakaling dumating na ang mga inangkat na bigas.

Aniya, taliwas ito sa ipinagmamalaki ng Department of Agriculture na tumaas sa labing siyam na  metrikong tonelada ang lokal na produksyon ng mga magsasaka.

Pero natabunan ito ng dalawa punto siyamnapu’t walong milyong metrikong tonelada inangkat na bigas ng pamahalaan.

Dahil dito, posibleng mas bumaba pa ang presyo ng palay dahil aminado itong hindi kayang makipagsabayan ng mga magsasaka sa presyong itatakda sa inangkat na bigas.—sa panulat ni Abie Aliño-Angeles

Umaaray na ang ilang magsasaka matapos sumadsad sa 12 hanggang 17 pesos ang farmgate price ng palay.

Ayon kay Bantay Bigas Spokesperson Cathy Estavillo, sa probinsya ng Mindoro, aabot lamang sa 17 pesos ang kada kilo ng palay gayundin sa Isabela at Masbate.

Maliban dito, idinadaing na rin ng mga ito ang mataas na presyo ng pataba o fertilizer matapos umakyat sa 3,000 pesos ang kada bag ng pataba na mas mataas ng 200% kumpara sa presyo nito noong Agosto 2021.

Dagdag pa ni Estavillo, sapul din ang kanilang sektor sa serye ng taas-presyo sa produktong petrolyo.

Tinawag din ng grupong Bantay Bigas ‘band-aid solution’ lamang ang tulong na ibinibigay ng gobyerno sa mga magsasaka dahil sa pagsadsad ng farmgate price ng palay.

Aniya, ang 5,000 pesos na ayuda ng Department of Agriculture (DA) sa mga magsasaka ay hindi sapat para makabawi sila mula sa pagkalugi.—mula sa panulat ni Abie Aliño-Angeles

Naresolba na ang kaso na idinulog sa tanggapan ng POLO o Philippine Overseas Labor Office sa Hong Kong kaugnay sa muntik nang pagkaka-terminate o pagkakatanggal sa trabaho ng tatlong overseas Filipino workers o OFWs na nagpositibo sa COVID-19.

Ayon kay POLO Hong Kong labor attachè Melchor Dizon, nang matanggap nila ang mga reklamo ay kaagad nilang tinawagan ang mga employer ng tatlong OFW.

Aniya, nakarating sa gobyerno ng Hong Kong ang nasabing problema, kaya’t kaagad silang nagpadala ng official communication sa Philippine Consulate General, upang tiyakin sa pamahalaan ng Pilipinas na tutulong sila sa pagresolba ng kasong ito.

Nagbigay rin ng warning ang Hong Kong government sa mga employer na isang paglabag sa employment ordinance ang pag-terminate sa mga worker na tinamaan ng COVID-19.—mula sa ulat ni Jopel Pelenio (Patrol 17)

Mahigit 100 Pilipino pa ang nananatili sa Ukraine.

Ipinabatid ito ni DFA Undersecretary Sarah Lou Arriola na nagsabi ring nasa halos 200 Pinoy seafarers ang stranded sa Black Sea sa gitna na rin ng patuloy na pagsakop ng Russia sa Ukraine.

Ayon kay Arriola, 27 Pinoy kabilang ang 21 seamen ang nakausad na pa-Moldova at nakatawid na sa Bucharest sa Romania para makauwi na ng Pilipinas.

Nasa 15 Pinoy aniya ang nasa Hungary na, siyam sa Austria at apat sa Romania kaya’t nasa loob pa ng Ukraine ang 116 pang Pilipino.

Sinabi ni Arriola na 19 na Pinoy na ang nakauwi ng Pilipinas habang ilang Pinoy na may mga asawang Ukrainian nationals ay nasa nasabing bansa pa rin sa kabila ng krisis dito.

Nagbabadya na naman ang bigtime oil price hike sa susunod na linggo.

Ayon sa Department of Energy (DOE), posibleng maglaro sa mahigit piso hanggang tatlong piso ang dagdag presyo sa kada litro ng gasolina, diesel at kerosene.

Inihayag naman ni DOE Undersecretary Gerardo Erguiza na sakaling abutin ng tres pesos ang dagdag-presyo, pag-aaralan nila kung ire-request sa mga kumpanya ng langis na utay-utayin ito.

Ito na ang magiging ika-10 sunod na linggong magpapatupad ng dagdag-presyo sa mga produktong petrolyo sa gitna ng lumiliit na supply sa international market na pinalala ng hidwaan ng Ukraine at Russia.

Sa datos ng DOE-Oil Industry Management Bureau, ang presyo ng diesel sa bansa ay naglalaro sa 52 hanggang 65 pesos kada litro;

Gasolina, 60 hanggang 83 pesos kada litro at kerosene, 61 hanggang 68 pesos kada litro.