HOT STORIES OF THE WEEK

Hindi pa rin umaalis ang ilang Filipino sa Ukraine sa gitna ng tumitinding pag-atake ng Russian Armed Forces.

Ayon sa Department of Foreign Affairs (DFA), 45 pang pinoy sa kabisera na Kiev ang tumangging lumikas kahit naka-umang na ang pagpasok ng lungsod ng napakalaking puwersa-militar ng Russia.

Kinumpirma rin ng DFA na isang pinay ang naiipit sa bakbakan sa Kharkiv, na ikalawang pinakamalaking lungsod sa Ukraine at kasalukuyang nagtatago sa bunker kasama ang employer nito.

Pitong barko at 87 pinoy crew naman ang stranded sa nasabing bansa dahil sa naval mines o bombang itinanim sa dagat, partikular sa Black Sea.

Nakikipag-ugnayan na ang kagawaran sa ship owners upang makuha ang pangalan ng lahat ng Filipino at mailatag ang hakbang kung paano sila masasaklolohan.

Sa datos ng DFA, 250 na ang nagpalista para sa repatriation subalit mahigit 100 ang hindi pa nagpapakita o nakikipag-ugnayan.

Umanib din ang Pilipinas sa 141 bansang tumutol sa pananakop ng Russia sa Ukraine.

Sa isang Emergency Special Session ng United Nations General Assembly kahapon, bumoto ng “yes” si Permanent Representative of the Philippines to the UN Enrique Manalo sa resolusyong kumokontra sa hakbang ng Russia.

Ayon kay Manalo, nananawagan ang gobyerno ng Pilipinas na itigil na ang bakbakan sa halip ay tutukan ang pagsaklolo sa mga sibilyan lalo’t unti-unting lumalawak ang humanitarian crisis.

Dapat din anyang matiyak na magkakaroon ng “safe access” sa humanitarian assistance ang lahat ng sa Ukraine.

Alinsunod sa resolusyon, iginigiit ng mayorya ng mga UN member sa Russia na paalisin na ang mga tropa nito sa Ukraine at kinundena rin ang desisyon ni Russian President Vladimir Putin na i-umang na ang kanilang mga armas nukleyar.

Sumampa na sa 885 ang nasawi sa ika-pitong araw ng sagupaan ng Russia at Ukraine.

Ayon sa United Nations Human Rights Office, kabilang sa mga namatay ang 227 sibilyan habang 525 ang nasugatan.

Karamihan sa casualties ay sanhi ng pagsabog ng mga missile, Rocket at Mortar.

Kinumpirma naman ng Ukraine na halos 120 ang nalagas sa hanay ng kanilang militar habang nasa 500 ang namatay sa panig ng Russian Armed Forces.

Sa kabila nito, naniniwala ang UN na maaaring lumobo pa ang casualties, lalo sa mga government-controlled area, dahil sa atrasadong pagdating ng mga impormasyon.

Kontrolado na ng Russian Army ang isa sa pinaka-mahalaga at strategic na lungsod sa Ukraine.

Sa ikapitong araw ng bakbakan, nakubkob ng mga Russo Ang Kherson City sa Southern Ukraine na nagdurugtong sa Crimea, na walong taon nang okupado ng Russia.

Ayon kay Russian Defence Ministry Spokesman Igor Konashenkov, pinalibutan ng mga sundalo ang lungsod at napasok ang sentro nito matapos ang ilang oras na sagupaan.

Maayos naman anyang nakipag-ugnayan ang mga lokal na opisyal ng Kherson sa Russian Army at nananatiling operational ang lahat ng public services habang sapat din ang supply ng pagkain at tubig sa lugar.

Gayunman, nanindigan ang alkalde ng Kherson na si Igor Nikolayevna nananatili sa ilalim ng Ukraine ang lungsod.

Tiniyak ni Energy Secretary Alfonso Cusi sa publiko na sapat ang supply ng produktong petrolyo sa bansa sa kabila ng nagpapatuloy na sagupaan ng Ukraine at Russia.

Ayon kay Cusi, sa Middle East naman kumukuha ng krudo ang Pilipinas pero may direktang epekto sa international oil market at presyuhan ng langis sa Pilipinas ang krisis sa Ukraine.

Ito, anya, ang dahilan kaya’t patuloy silang nananawagan sa bawat isa na magtipid sa paggamit ng krudo ngayong medyo kritikal ang sitwasyon.

Binigyang-diin naman ng kalihim ang kahalagahan ng pagiging energy sufficient at independent ng Pilipinas lalo’t nakaasa ang bansa sa mga oil import.

Samantala, kabilang din si Cusi sa nananawagan na amyendahan na ang Oil Deregulation Law at suspendihin ang Excise Tax sa langis.

Nasa 17 pang Pilipino mula sa Ukraine ang nakatakdang umuwi sa Pilipinas sa gitna ng tensyon doon sa pagitan ng Russia.

Ayon kay Department of Labor and Employment (DOLE) Secretary Silvestre Bello, III, nagmula ang mga ito sa Lviv na lumipad patungong Poland matapos sunduin ni Foreign Affrairs Secretary Teodoro Locsin Jr.

Nananatili naman sa Ivano-Fransivsk ang mga Pilipinong ayaw pang umuwi.

Nitong Pebrero a-18, nasa anim na Pilipino ang sumailalim sa repatriation. —sa panulat ni Abby Malanday

Tiniyak ni Pangulong Rodrigo Duterte na mabibigyan ng proteksyon ang mga refugees, stateless individuals at asylum seekers.

Ito’y matapos lagdaan ng pangulo ang Executive Order 163 kasunod ng sigalot sa pagitan ng Ukraine at Russia.

Alinsunod sa EO, kikilalanin na rin sa ilalim ng 1951 United Nations  Convention Relating to the Status of Stateless Person at 1961 Convention on the Reduction of Statelessness ang pagkakaloob ng kaukulang proteksiyon sa mga itinuturing na Persons of Concern (POC).

Nakasaad din dito ang pagbuo ng Inter-Agency Committee on the Protection of Refugees, Stateless Persons and Asylum Seekers upang matiyak na maibibigay ang serbisyong poprotekta sa POC.

Magsisilbi namang chairperson ng komite ang Department of Justice (DOJ) habang ang dswd ang Vice Chairperson, at magiging miyembro naman nito ang mga ahensya gaya ng DFA, DepEd, DOLE, DOH, DTI, DILG, DOTr, NHA, CHED, PCSO, PRC, PAO, Philippine Statistics Authority (PSA) at ang National Statistician and Civil Registrar General. —sa ulat ni Jopel Pelenio (Patrol 17)

Nakauwi na ang ikalawang batch ng mga Filipino mula Ukraine.

Pasado alas-10 kagabi nang dumating sa NAIA Terminal 3 ang 13 filipino lulan ng Emirates flight EK-2023 mula Chopin Airport, sa Warsaw, Poland.

Ayon sa Department of Foreign Affairs (DFA), kabilang ang mga repatriate sa 40 indibidwal na lumikas mula sa kabisera na Kyiv patungong Lviv sa gitna ng nagpapatuloy na paglusob ng Russia sa Ukraine.

Sa tulong ng Philippine Embassy sa Warsaw, tumawid ang mga nasabing Pinoy sa Polish Border.

Samantala, anim na Filipino pa ang nananatili sa Moldova, apat sa Romania at walo sa Hungary.

Pangungunahan ni Pangulong Rodrigo Duterte ang isang special meeting na ipinatawag nito ngayong araw para talakayin ang kaguluhan sa pagitan ng Russia at Ukraine.

Kasama sa nasabing pagpupulong ang mga cabinet members, pulis, militar at mga negosyante.

Ayon sa Punong Ehekutibo, mahalagang maipaalam sa mga Pilipino ang tunay na kaganapan sa sigalot na nangyayari sa Europa.

Itinalaga naman ng Pangulo si acting presidential spokesperson Karlo Nograles upang magsilbing tagapag-salita para maipabatid sa lahat ang mga bagay na may kaugnayan sa gagawing pagpupulong ngayong araw.—mula sa ulat ni Jopel Pelenio (Patrol 17)