HOT STORIES OF THE WEEK

Pumalo na sa P3-T ang kabuuang halaga ng nalugi sa ekonomiya ng bansa bunsod ng dalawang taong paghihigpit ng restriksiyon dahil sa COVID-19 pandemic.

Ayon kay socio-economic planning secretary Karl Chua, posible sanang pumalo sa P25.3-T ang halaga ng magiging kita ng ekonomiya kung hindi tumama ang pandemya sa bansa.

Nabatid na umabot sa P1.3-T halaga ng household income ang nawala o ‘yung halaga ng kikitain sana ng mga Pilipino sa kanilang pagtatrabaho habang P2.2-T naman ang corporate income o ang naging kita sa mga negosyo.

Sinabi ni Chua na ngayong inilagay na sa Alert level 1 ang National Capital Region (NCR), kailangang makabawi ng ekonomiya matapos ding mawala ang tatlong daang bilyong piso sa indirect taxes.

Hindi pa rin makapag-pasya ang mga Filipina na nakapag-asawa ng mga Ukrainian kung lilisanin na o hindi ang Ukraine sa gitna ng patuloy na pag-atake ng Russia.

Inihayag ni Philippine ambassador to Poland Leah Basinang-Ruiz na ginagawa nila ang lahat ng paraan upang saklolohan ang mga nalalabi pang Filipino sa Ukraine.

Ayon kay Ruiz, bagaman walang problema ang mga babaeng Ukrainian matapos mabigyan ang mga ito ng visa, hindi naman agad makaalis ang ilang Pinay na nais makapiling ang kanilang mga asawang Ukrainian.

Alinsunod sa martial law na ipinatupad ng Ukainianian government, pinagbabawalang lumabas ng bansa ang mga lalaking edad 18 hanggang 60 upang magsilbi sa army at ipagtanggol ang kanilang bansa laban sa Russian forces.

Sa kabila nito, hinimok naman ng philippine embassy sa warsaw, poland ang lahat ng Filipino na nananatili sa ukraine na magpasya na sa lalong madaling panahon upang masaklolohan ang mga ito.

Epektibo na simula ngayong araw ang mas maluwag na Alert level 1 sa Metro Manila at 38 iba pang lugar bunsod ng patuloy na pagbaba ng COVID-19 cases sa bansa.

Bukod sa National Capital Region, kabilang sa mga isinailalim sa Alert level 1 ang Abra, Apayao, Baguio City, Kalinga, Dagupan City, Pangasinan, Ilocos Norte, Ilocos Sur, La Union, Batanes, Cagayan;

Santiago City sa Isabela, Quirino, Angeles City, Aurora, Bataan, Bulacan, Olongapo City, Pampanga, Tarlac, Cavite, Laguna, Marinduque, Puerto Princesa City at Romblon;

Naga City, Catanduanes, Aklan, Bacolod City, Capiz, Guimaras, Siquijor, Biliran, Zamboanga City, Cagayan De Oro City, Camiguin at Davao City.

Sa ilalim ng Alert level 1, tinanggal na ng Inter-Agency Task Force ang restrictions sa indoor at outdoor capacities habang puwede na rin ang intrazonal at interzonal travel para sa lahat ng edad at kahit may comorbidities.

Sa susunod na dalawang linggo pa makikita ang resulta ng pagsailalim ng Metro Manila at iba pang lugar sa Alert level 1 sa mga arawang kaso ng COVID-19.

Sa panayam sa DWIZ, sinabi ni OCTA research fellow Dr. Guido David na sa mga panahong ito malalaman kung gumanda o naging masama ang epekto ng pagbaba ng restriksyon.

Pero payo ni David sa publiko, panatilihin pa rin ang pagsunod sa mga health protocols at magpabakuna upang maging ligtas sa virus.

Nitong Pebrero 26, nasa 4% na lamang ang positivity rate sa National Capital Region (NCR) at low risk classification na rin sa COVID-19.—sa panulat ni Abby Malanday

Umaasa ang Department of Tourism (DOT) na sisigla pa ang sektor ng turismo sa bansa sa oras na ilagay na sa Alert level 1 ang Metro Manila at iba pang lugar simula bukas.

Ayon kay tourism secretary Bernadette Romulo-Puyat, tulong ang mas mababang restriksyon upang mas gumanda ang travel at tourism activities sa gitna ng pandemya.

Ilan sa mga travel destination na pinadali na ang pagbiyahe ay ang; Baguio, Boracay, Ilocos Region, Aurora, Batanes, Laguna, Puerto Princesa City, Bacolod, Guimaras, Camiguin, at Davao City.

Bagama’t hindi na required ang health declaration forms sa mga nasabing lugar, reuired pa rin ang proof of vaccination kung papasok sa mga establisimyento ang mga edad 18 pababa.–-sa panulat ni Abby Malanday

Walo pa sa 181 Pilipinong nasa Ukraine ang nag-aalangan pa ring sumailalim sa repatriation sa kabila ng tensyon sa pagitan ng nabanggit na bansa at ng Russia.

Ayon kay Department of Labor and Employment (DOLE) secretary Silvestre Bello III, nananatili ang 8 ito sa command center at wala pang desisyon kung tuluyan nang uuwi.

Sa bilang naman sa 181, higit sa isang daan o 106 sa mga ito ay overseas Filipino workers (OFWs), 30 ang kasal at 50 ang dependents.

Hanggang kahapon, February 27 ay nasa 38 Pilipino na ang nagtungo sa Poland mula sa Kyiv, siyam ang nagtungo sa Austria at siyam ang humingi na ng tulong sa grupo ni Pastor Apollo Quiboloy.

Para matulungan ang mga Pilipino, binigyan ito ng DOLE ng dalawang dolyar kada isa at hiwalay pa ang food at medical assistance.—sa panulat ni Abby Malanday

Posibleng sampahan ng kasong kidnapping ang saksi sa pagkawala higit 30 sabungero sakaling hindi pa sila makipag-ugnayan sa otoridad.

Ayon kay Año, dapat ay boluntaryo nang makipag-ugnayan ang mga ito sa otoridad dahil posibleng makasuhan din sila ng 31 counts ng kidnapping at mauwi sa pagkakabilanggo.

Kabilang sa pinatutungkulan ni Año ang mga security guards at manggagawa sa loob ng mga sabungan.

Paliwanag niya, ang mga ito ang susi para maresolba na ang nasabing kaso sa lalong madaling panahon.

Giit nito buhay ng mga pamilya ng biktima ang apektado rito na posibleng hindi nakakatulog ng maayos sa gabi.

Kaugnay nito, inihayag ni Lucky 8 Star Quest Inc. president Angelo Niño Santos na dadalo sa susunod na pagdinig ng senado ang mga security personnel ng Manila cockfight arena. —sa panulat ni Abie Aliño-Angeles