Pansamantalang sarado ang Culiat Bridge sa kahabaan ng Congressional Avenue sa Quezon City matapos ang naganap na sunog noong June 11.
Ayon sa Quezon City Local Government Unit, mananatiling sarado ang tulay habang isinasagawa ng Quezon City Department of Engineering ang structural inspection katuwang ang Traffic and Transport Management Department, Department of Public Order and Safety, Task Force Disiplina, at Quezon City Police District.
Layunin nitong matiyak na ligtas ang tulay bago ito muling buksan sa publiko na maaaring magdulot ng mabagal na daloy ng trapiko sa lugar.
Samantala, payo ng lokal na pamahalaan sa mga motorista na humanap muna ng alternatibong ruta habang isinasagawa ang inspeksiyon at pagkukumpuni ng tulay, planuhin ang kanilang biyahe at sundin ang mga traffic advisory upang maiwasan ang matinding pagsisikip ng daloy ng sasakyan. | Sa panulat ni Reabelle Medina
