NATIONAL NEWS

Tinitingnan din ng Department of Justice ang posibilidad na hindi lamang simpleng kaso ng bullying ang nangyaring pamamaril sa San Jose National High School sa Tacloban City.

Ayon kay Justice Spokesman Polo Martinez, inaalam nila kung may kaugnayan sa violent extremism ang insidente, katulad ng mga naganap na pag-atake sa ibang bansa.

Lumabas sa paunang imbestigasyon ng mga pulisya na bullying ang posibleng motibo sa karumal-dumal na pamamaril na ikinasawi ng tatlong estudyante.

Iginiit ni Martinez na madaling maimpluwensyahan ang mga kabataan, lalo na sa mga nakikita nila sa social media.—sa panulat ni Jordan Gutierrez

Ipinauubaya na ng Department of Justice sa Kongreso ang usapin ng pagpapababa sa minimum age of criminal responsibility sa bansa.

Kasunod ito ng panawagan na ibaba ang edad ng criminal responsibility para mapanagot ang mga kabataang lumalabag sa batas, matapos ang insidente ng school shooting sa Tacloban City.

Ayon kay Justice Spokesman Polo Martinez, hindi maaaring magbigay ng komento ang kagawaran tungkol sa usapin dahil bahagi ito ng ehekutibong sangay ng pamahalaan at hindi ng lehislatura.

Gayunman, mayroon na anyang mga umiiral na mekanismo sa ilalim ng Juvenile Justice and Welfare Act upang matukoy ang maaaring pananagutan ng mga menor de edad, depende sa kanilang edad at sa mga ebidensiyang makakalap sa imbestigasyon.—sa panulat ni Jordan Gutierrez

Naghain ng resolusyon si House Deputy Majority Leader at Pampanga 3rd District Rep. Mica Gonzales, para isulong ang pagtatalaga ng mga barangay tanod sa lahat ng pampublikong paaralan sa bansa upang mapalakas ang seguridad sa mga guro at mag-aaral.

Batay sa House Resolution No. 1145, inirekomenda ni Gonzales sa Department of the Interior and Local Government o DILG katuwang ang mga lokal na pamahalaan sa pagtatalaga ng mga barangay tanod sa panahon ng school hours upang tugunan ang kakulangan ng security guards sa bawat campus.

Maglalaan din ng security and first-responder trainings sa mga tanod na pangungunahan ng Philippine National Police o PNP.

Layon nitong maiwasan ang krimen at karahasan matapos ang magkakasunod na insidente sa mga paaralan partikular ang madugong pamamaril sa mga estudyante sa San Jose National High School sa Tacloban City na ikinasawi ng tatlong mag-aaral at ang pananaksak ng isang estudyante sa kapwa niya mga estudyante sa isang paaralan sa Cavite City.

Dahil dito, paiigtingin narin maging ang screening protocols o inspeksiyon at pagbabantay sa mga pasukan at labasan ng campus.

Nakikipagtulungan narin ang Department of Education sa mga barangay upang maiwasan at maharang ang pagpasok ng mga armas sa loob ng paaralan.

Ayon kay Gonzales, mahalagang magkaroon ng agarang hakbang at pangmatagalang reporma upang matiyak ang proteksiyon at kaligtasan ng mga mag-aaral at guro sa loob ng mga paaralan. | via Geli Mendez/DWIZ Patrol

Nilinaw ng Malacañang na hindi lang si dating Ako Bicol party-list Rep. Zaldy Co ang sentro ng imbestigasyon sa umano’y iregularidad sa flood control projects.

Ayon kay Palace Press Officer Undersecretary Claire Castro, mas malawak ang iniimbestigahan at posibleng marami pang ibang indibidwal ang sangkot sa kontrobersiya.

Dagdag niya, hindi pa tapos ang pagbusisi sa mga proyekto at may mga ulat din ng posibleng anomalya mula 2018 hanggang 2020.

Sinabi rin ng Palasyo na patuloy ang imbestigasyon upang matukoy ang lahat ng may pananagutan sa isyu.

Isinusulong ni House Speaker Bojie Dy ang isang panukalang batas na layong pigilan ang mga political dynasty at conflict of interest sa party-list system.

Sa ilalim ng House Bill 9906 o New Party-list System Act, bawal nang maging party-list nominee ang mga malalapit na kamag-anak ng mga kasalukuyang mambabatas, gayundin ang mga opisyal ng gobyerno at mga kontraktor nito.

Ayon kay Dy, ang layunin ng party-list system ay palawakin ang representasyon ng iba’t ibang sektor, hindi ang palakasin ang kapangyarihan ng iilang pamilya.

Nanawagan si Vice President Sara Duterte na paigtingin pa ang seguridad sa mga paaralan matapos ang malagim na insidente sa San Jose National High School sa Tacloban City.

Ayon sa Bise Presidente, dapat maging “wake-up call” ang nangyaring trahedya upang mas mapabuti ng pamahalaan ang pagprotekta sa mga estudyante at ang maagang pagtukoy sa mga banta o panganib sa loob ng paaralan.

Giit niya, mahalaga ang mas mahigpit na safety measures upang matiyak ang kaligtasan ng mga mag-aaral at guro sa buong bansa.

“The continuing loss of young lives should serve as a wake-up call to this administration. The government must act now to make our schools safer and to better protect our learners,” — VP Sara