Sinuspinde ng Land Transportation Franchising and Regulatory Board ang kompanyang Green and Smart Mobility Philippines, o Green GSM, sa loob ng tatlumpung araw matapos naging viral ang birthday prank na isinagawa ng YouTuber na si Nica Pauline Llamelo, o mas kilala bilang “Queen Manica Money.”
Nabatid na, sa video ni Llamelo, ginawa niyang kasabwat ang isang Green GSM taxi driver upang magpanggap na isa sa mga holdaper.
Matapos nito, tinakluban ng mga prankster ang ulo ng kanilang biktima saka idinala sa isang events place para sorpresahin ito, na noo’y nagdiriwang ng kaarawan.
Dahil dito, naglabas ng show cause order ang LTFRB sa Green GSM at sa may-ari ng sasakyang ginamit sa naturang prank.
Ayon kay LTFRB Chairman Vigor Mendoza, mapanganib ang isinagawang prank ni Llamelo at kanyang mga kapwa vlogger dahil maaari nitong ipaalam sa publiko na mapanganib mag-commute sa bansa.
Samantala, sinabi ni Llamelo na personal siyang humingi ng paumanhin sa kasabwat niyang driver dahil nadamay siya sa ginawang show cause order ng ahensiya.
Gayunman, ipinagtanggol ng vlogger na ang pagsasagawa ng mga prank ang paboritong paraan ng katatawanan ng kanyang mga kasamahan.
May permit din anya ang kanyang team upang isagawa ang prank at malapit lang umano sa pinangyarihan ng insidente ang destinasyon nilang events place.
Tiniyak din ni Llamelo at ng iba pang may kinalaman sa prank na walang ibang indibidwal na madadamay o maaabala sa insidente. | Sa panulat ni Anjo Riñon
