NATIONAL NEWS

Inihayag ni DSWD Secretary Rex Gatchalian na tatagal pa ng ilang taon ang rehabilitasyon ng 14-anyos na lalaki, isa sa dalawang suspek sa insidente ng pamamaril sa loob ng isang paaralan sa Tacloban City.

Para naman sa 15-anyos na suspek, sinabi ni Gatchalian na tinutukoy pa ng mga awtoridad kung mayroon itong sapat na pag-unawa o “discernment” sa kanyang ginawa.

Siniguro naman ng DSWD chief sa mga pamilya ng mga biktima na mananatili ang mga suspek sa mga pasilidad ng gobyerno at hindi rin agad makababalik sa kanilang komunidad.

Ibinunyag ng kampo ni Vice President Sara Duterte na mayroon silang ipi-prisentang mga ‘surprise witness’ para sa impeachment trial na hindi pa isinasapubliko ang pagkakakilanlan.

Ayon kay Defense Counsel Atty. Michael Poa, kapwa ang depensa at prosekusyon ay may mga testigong hindi muna pinapangalanan, kabilang ang ilan na hindi inilalantad dahil sa mga usaping panseguridad.

Wala anya silang nakikitang problema kung kakailanganing isiwalat ang mga pangalan ng mga naturang testigo alinsunod sa mga patakaran ng impeachment court.

Nilinaw ni Atty. Poa na mismong ang depensa pa ang humiling ng disclosure ng mga testigo upang maging malinaw ang proseso para sa magkabilang panig.—sa panulat ni Jordan Gutierrez

Iimbestigahan na ng Senado sa July 1 ang nangyaring pamamaril sa isang paaralan sa Tacloban City na ikinamatay ng tatlong estudyante.

Pangungunahan ni Senate Committee on Women, Children, Family Relations, and Gender Equality Chairperson Risa Hontiveros ang imbestigasyon kung saan kasama rin sa sisilipin ang lumalaking banta ng online radicalization sa mga kabataan.

Ayon kay Senador Hontiveros, muling bubuksan ang pagdinig kung saan sisiyasatin ng komite kung may papel ang mga online platforms para ma-brainwash at ma-radicalize ang mga kabataan para magkagawa ng karahasan.

Tinukoy ng senador ang naunang imbestigasyon noong April 14 kung saan nabunyag na ang mga online platforms at gaming spaces ay nagagamit sa pag-groom, pagmanipula, at pag-radicalize ng kaisipan ng mga kabataan sa karahasan.

Tiniyak ni Senador Hontiveros na kanilang bubusisiin kung may sapat na ginagawa ang lahat ng online platforms para hindi mapagsamantalahan ang mga kabataan.—sa panulat ni Jordan Gutierrez

Isinusulong sa Kamara ni Akbayan Party-list Rep. Perci Cendaña ang House Bill 9929 o panukalang batas na magpapadali sa pagpapalit ng pangalan at gender marker ng mga transgender, intersex, at non-binary Filipinos sa kanilang mga legal na dokumento.

Sa ilalim ng panukalang “Lived Identities and Recognition Act” o mas kilala bilang “Sharmaine Bill,” gagawing simple at accessible ang administrative process para sa mga trans at intersex.

Kung saan, maaari nang ihanay ang legal documents sa katauhang nais nila, partikular sa pangalan at kasarian, nang hindi na kailangan ng magastos at mahabang court proceedings.

Ayon kay Cong. Cendaña, maraming transgender at intersex Filipinos ang pinagtatawanan, nakararanas ng pangungutya at diskriminasyon dahil hindi tumutugma ang kanilang legal na pangalan sa kanilang pagkakakilanlan.

Ginawa anya ang panukala matapos mag-viral ang pangalang “Sharmaine,” na iniugnay ng mga netizen sa isang orange fruit sa social media.

Iginiit ni Cong. Cendaña na kung madaling nauunawaan ng publiko ang naturang biro, mas dapat anyang maunawaan at kilalanin ang tunay na identity ng mga transgender at intersex na Pilipino.—sa panulat ni Jordan Gutierrez

Rerepasuhin na ng Department of Education ang mga umiiral na hakbang sa seguridad sa mga paaralan kasunod ng pamamaril sa San Jose National High School sa Tacloban City.

Ayon kay Education Secretary Sonny Angara, kailangan pang paigtingin ang koordinasyon sa mga law enforcement agency at pagbutihin ang mga school emergency protocol para sa mga aktibong banta, katulad ng mga isinasagawang earthquake at fire drills.

Nangangamba rin ang kalihim sa posibilidad ng mga “copycat” o panggagayang insidente at iginiit na dapat managot ang may-ari ng baril na napunta sa mga menor de edad na suspek.

Binigyang-diin ni Secretary Angara ang kahalagahan ng police visibility sa paligid ng mga paaralan upang makatulong sa pagpigil ng karahasan at iba pang iligal na aktibidad.—sa panulat ni Jordan Gutierrez

Tinitingnan din ng Department of Justice ang posibilidad na hindi lamang simpleng kaso ng bullying ang nangyaring pamamaril sa San Jose National High School sa Tacloban City.

Ayon kay Justice Spokesman Polo Martinez, inaalam nila kung may kaugnayan sa violent extremism ang insidente, katulad ng mga naganap na pag-atake sa ibang bansa.

Lumabas sa paunang imbestigasyon ng mga pulisya na bullying ang posibleng motibo sa karumal-dumal na pamamaril na ikinasawi ng tatlong estudyante.

Iginiit ni Martinez na madaling maimpluwensyahan ang mga kabataan, lalo na sa mga nakikita nila sa social media.—sa panulat ni Jordan Gutierrez

Ipinauubaya na ng Department of Justice sa Kongreso ang usapin ng pagpapababa sa minimum age of criminal responsibility sa bansa.

Kasunod ito ng panawagan na ibaba ang edad ng criminal responsibility para mapanagot ang mga kabataang lumalabag sa batas, matapos ang insidente ng school shooting sa Tacloban City.

Ayon kay Justice Spokesman Polo Martinez, hindi maaaring magbigay ng komento ang kagawaran tungkol sa usapin dahil bahagi ito ng ehekutibong sangay ng pamahalaan at hindi ng lehislatura.

Gayunman, mayroon na anyang mga umiiral na mekanismo sa ilalim ng Juvenile Justice and Welfare Act upang matukoy ang maaaring pananagutan ng mga menor de edad, depende sa kanilang edad at sa mga ebidensiyang makakalap sa imbestigasyon.—sa panulat ni Jordan Gutierrez

Naghain ng resolusyon si House Deputy Majority Leader at Pampanga 3rd District Rep. Mica Gonzales, para isulong ang pagtatalaga ng mga barangay tanod sa lahat ng pampublikong paaralan sa bansa upang mapalakas ang seguridad sa mga guro at mag-aaral.

Batay sa House Resolution No. 1145, inirekomenda ni Gonzales sa Department of the Interior and Local Government o DILG katuwang ang mga lokal na pamahalaan sa pagtatalaga ng mga barangay tanod sa panahon ng school hours upang tugunan ang kakulangan ng security guards sa bawat campus.

Maglalaan din ng security and first-responder trainings sa mga tanod na pangungunahan ng Philippine National Police o PNP.

Layon nitong maiwasan ang krimen at karahasan matapos ang magkakasunod na insidente sa mga paaralan partikular ang madugong pamamaril sa mga estudyante sa San Jose National High School sa Tacloban City na ikinasawi ng tatlong mag-aaral at ang pananaksak ng isang estudyante sa kapwa niya mga estudyante sa isang paaralan sa Cavite City.

Dahil dito, paiigtingin narin maging ang screening protocols o inspeksiyon at pagbabantay sa mga pasukan at labasan ng campus.

Nakikipagtulungan narin ang Department of Education sa mga barangay upang maiwasan at maharang ang pagpasok ng mga armas sa loob ng paaralan.

Ayon kay Gonzales, mahalagang magkaroon ng agarang hakbang at pangmatagalang reporma upang matiyak ang proteksiyon at kaligtasan ng mga mag-aaral at guro sa loob ng mga paaralan. | via Geli Mendez/DWIZ Patrol