Umaasa ang House Prosecution Panel na papayagan ng Senate Impeachment Court ang pagbubukas ng selyadong kahon ng Bureau of Internal Revenue na sinasabing naglalaman ng income tax records ni Vice President Sara Duterte at kanyang mister na si Atty. Mans Carpio.
Kasunod ito ng pagtutol ng depensa na mabuksan at mamarkahan bilang ebidensya sa impeachment case ni VP Sara ang mga laman ng naturang selyadong kahon.
Ayon kay lead prosecutor at Batangas Rep. Gerville Luistro, mahalaga ang mga dokumentong ito sa Articles of Impeachment na tumatalakay sa hindi maipaliwanag na yaman ng bise presidente.
Paliwanag ni Luistro, hindi binuksan ng Kamara ang BIR box nang matanggap ito sa pagdinig ng House Committee on Justice bilang paggalang sa kapangyarihan ng Senate Impeachment Court.
Umaasa ang prosecution team na papaboran ng korte ang kanilang hiling upang malaman ang lehitimong kita ng pangalawang pangulo bago o sa mismong pagsisimula ng impeachment trial sa Hulyo a-sais.—sa panulat ni Jordan Gutierrez
