Inirerekomenda ng Department of the Interior and Local Government ang pagpapalabas ng Hold Departure Order laban kay dating Ateneo basketball coach Tab Baldwin sa oras na maisampa ang kaso laban sa kanya.
Ayon kay Interior Secretary Jonvic Remulla, nasa ilalim na rin si Baldwin ng Immigration Lookout Bulletin Order o ILBO habang pinayuhan niya itong huwag munang umalis ng bansa, at sinagot naman aniya ng dating coach na wala siyang planong umalis ng bansa.
Batay sa ulat ng PNP–Criminal Investigation and Detection Group, nakaplano ang isinagawang sea water training ng koponan at batid ni Baldwin ang kondisyon ng high tide sa lugar kung saan isinagawa ang team building.
Si Baldwin ay kabilang sa labing-isang indibidwal na inirekomenda ng PNP-CIDG na sampahan ng kasong paglabag sa Anti-Hazing Act kaugnay ng pagkamatay nina student-athletes Rene Baterbonia at Divine Adili.—sa panulat ni Jordan Gutierrez
