Hinatulan ng korte sa South Korea ng pitong taong pagkakakulong si dating First Lady Kim Keon Hee matapos mapatunayang nagkasala sa pagtanggap ng mamahaling alahas at iba pang regalo kapalit ng umano’y pabor sa mga appointment sa trabaho.
Ayon sa korte, tumanggap si Kim ng mga mamahaling gamit na bihirang makuha ng karaniwang mamamayan bilang kapalit ng impluwensya sa pagtatalaga ng mga opisyal.
Kabilang sa mga ebidensyang iniharap laban sa dating first lady ang mga alahas na nagkakahalaga ng nasa 67-thousand dollars, kabilang ang kwintas ng Van Cleef & Arpels, brotsa ng Tiffany, at hikaw ng Graff.
Napatunayan din siyang tumanggap ng gintong figurine at mamahaling Vacheron Constantin na relo mula sa iba pang personalidad kapalit ng umano’y mga pabor.
Matatandaang ang kanyang asawa na si dating South Korean President Yoon Suk Yeol ay nakapiit din kaugnay ng bigong pagtatangkang magpatupad ng martial law noong 2024.—sa panulat ni Jordan Gutierrez
