NATIONAL NEWS

Tumanggi magbigay ng komento ang kampo ni Vice President Sara Duterte kaugnay ng hiling ng House prosecution panel na buksan ang kahon mula sa Bureau of Internal Revenue na naglalaman ng mga tax records ng bise presidente.

Ayon kay Defense Spokesman Atty. Michael Poa, magsusumite na lamang sila ng pormal na tugon o reply sa nasabing manifestation na inihain ng prosekusyon.

Gayunman, tiniyak ni Atty. Poa na agad nilang tutugunan ang isyu sa tamang proseso sa impeachment court, pero hindi pa anya matukoy kung kailan eksaktong maisusumite ang kanilang sagot.

Nilinaw din ng depensa na magkaiba ang kanilang posisyon sa usapin ng assets ni Vice President Duterte at sa kahon ng BIR records.—sa panulat ni Jordan Gutierrez

Naghain ng resolusyon si House Committee on Public Order and Safety Chairperson at Manila 2nd District Rep. Rolando Valeriano upang paimbestigahan ang mga insidente ng karahasan sa paaralan, kabilang ang naganap na pananaksak sa Cavite at pamamaril sa Tacloban City.

Sa inihain na House Resolution No. 1146 ni Valeriano, magiging sentro ang naganap na madugong pamamaril sa San Jose National High School sa Tacloban at mga pananaksak sa isang eskwelahan sa Cavite.

Paliwanag ni Valeriano, inilantad ng mga insidenteng ito ang matagal nang kakulangan sa seguridad ng mga paaralan na nagresulta sa pagkamatay at pagkasugat ng ilang mag-aaral.

Aniya, dahil sa kakulangan ng mga trained security personnel at mahihinang sistema ng seguridad, mas madaling nakapapasok sa mga campus ang mga taong may dalang armas na nagiging mitsa ng krimen.

Iginiit din ng mambabatas na dapat matutukan ang kakulangan ng mga paaralan sa guidance counselors, school nurses, at mga programa para sa mental health na makatutulong upang maagapan ang mga posibleng marahas na insidente.

Nanawagan din si Valeriano sa mga lokal na pamahalaan na maglaan ng pondo para sa seguridad at kaligtasan sa bawat paaralan.

Kasabay nito, hiniling ng mambabatas na agarang panagutin ang mga may-ari ng mga baril na ginamit sa Tacloban school shooting at imbestigahan ang posibleng kapabayaan ng mga taong may responsibilidad sa mga suspek.

Bukod pa dito, dapat din na maimbestigahan ang school principal at city schools superintendent.

Binigyang-diin ni Valeriano na kinakailangan ang agarang reporma upang maprotektahan ang mga estudyante at guro at maiwasan ang pag-ulit ng mga kahalintulad na trahedya sa hinaharap. | via Geli Mendez (Patrol 30)

Nanindigan ang Juvenile Justice and Welfare Council na hindi ang pagpapababa ng age of criminal liability ang sagot sa lumalalang karahasan na kinasasangkutan ng mga menor de edad.

Ayon kay JJWC Executive Director Tricia Oco, mas mahalagang tugunan ang mga ugat ng problema o mga dahilan kung bakit napapasangkot ang mga bata sa krimen kaysa agad na baguhin ang umiiral na batas.

Nilinaw ni Atty. Oco na hindi nangangahulugang binabalewala ng konseho ang mga krimeng nagagawa ng mga kabataan.

Aniya, layunin ng kasalukuyang sistema na unawain ang mga sitwasyon at factors na nagtutulak sa mga menor de edad na gumawa ng mararahas na aksyon upang mas maagap itong maiwasan sa tulong ng mga law enforcement agencies, social welfare offices, at iba pang ahensya ng pamahalaan.—sa panulat ni Jordan Gutierrez

Aabot sa siyam hanggang labintatlong bagyo ang papasok sa Philippine Area of Responsibility mula buwan ng Hulyo hanggang Disyembre ng kasalukuyang taon.

Ito’y sa kabila ng umiiral na El Niño phenomenon na na-monitor sa Pacific Ocean.

Ayon sa PAGASA, dalawa hanggang apat na tropical cyclone ang inaasahan sa Hulyo, dalawa hanggang apat sa Agosto, at dalawa hanggang tatlo sa Setyembre.

Tantiya rin ng weather bureau na isa hanggang dalawang tropical cyclone bawat isa sa Oktubre, Nobyembre, at Disyembre.

Inihayag ni DSWD Secretary Rex Gatchalian na tatagal pa ng ilang taon ang rehabilitasyon ng 14-anyos na lalaki, isa sa dalawang suspek sa insidente ng pamamaril sa loob ng isang paaralan sa Tacloban City.

Para naman sa 15-anyos na suspek, sinabi ni Gatchalian na tinutukoy pa ng mga awtoridad kung mayroon itong sapat na pag-unawa o “discernment” sa kanyang ginawa.

Siniguro naman ng DSWD chief sa mga pamilya ng mga biktima na mananatili ang mga suspek sa mga pasilidad ng gobyerno at hindi rin agad makababalik sa kanilang komunidad.

Ibinunyag ng kampo ni Vice President Sara Duterte na mayroon silang ipi-prisentang mga ‘surprise witness’ para sa impeachment trial na hindi pa isinasapubliko ang pagkakakilanlan.

Ayon kay Defense Counsel Atty. Michael Poa, kapwa ang depensa at prosekusyon ay may mga testigong hindi muna pinapangalanan, kabilang ang ilan na hindi inilalantad dahil sa mga usaping panseguridad.

Wala anya silang nakikitang problema kung kakailanganing isiwalat ang mga pangalan ng mga naturang testigo alinsunod sa mga patakaran ng impeachment court.

Nilinaw ni Atty. Poa na mismong ang depensa pa ang humiling ng disclosure ng mga testigo upang maging malinaw ang proseso para sa magkabilang panig.—sa panulat ni Jordan Gutierrez

Iimbestigahan na ng Senado sa July 1 ang nangyaring pamamaril sa isang paaralan sa Tacloban City na ikinamatay ng tatlong estudyante.

Pangungunahan ni Senate Committee on Women, Children, Family Relations, and Gender Equality Chairperson Risa Hontiveros ang imbestigasyon kung saan kasama rin sa sisilipin ang lumalaking banta ng online radicalization sa mga kabataan.

Ayon kay Senador Hontiveros, muling bubuksan ang pagdinig kung saan sisiyasatin ng komite kung may papel ang mga online platforms para ma-brainwash at ma-radicalize ang mga kabataan para magkagawa ng karahasan.

Tinukoy ng senador ang naunang imbestigasyon noong April 14 kung saan nabunyag na ang mga online platforms at gaming spaces ay nagagamit sa pag-groom, pagmanipula, at pag-radicalize ng kaisipan ng mga kabataan sa karahasan.

Tiniyak ni Senador Hontiveros na kanilang bubusisiin kung may sapat na ginagawa ang lahat ng online platforms para hindi mapagsamantalahan ang mga kabataan.—sa panulat ni Jordan Gutierrez

Isinusulong sa Kamara ni Akbayan Party-list Rep. Perci Cendaña ang House Bill 9929 o panukalang batas na magpapadali sa pagpapalit ng pangalan at gender marker ng mga transgender, intersex, at non-binary Filipinos sa kanilang mga legal na dokumento.

Sa ilalim ng panukalang “Lived Identities and Recognition Act” o mas kilala bilang “Sharmaine Bill,” gagawing simple at accessible ang administrative process para sa mga trans at intersex.

Kung saan, maaari nang ihanay ang legal documents sa katauhang nais nila, partikular sa pangalan at kasarian, nang hindi na kailangan ng magastos at mahabang court proceedings.

Ayon kay Cong. Cendaña, maraming transgender at intersex Filipinos ang pinagtatawanan, nakararanas ng pangungutya at diskriminasyon dahil hindi tumutugma ang kanilang legal na pangalan sa kanilang pagkakakilanlan.

Ginawa anya ang panukala matapos mag-viral ang pangalang “Sharmaine,” na iniugnay ng mga netizen sa isang orange fruit sa social media.

Iginiit ni Cong. Cendaña na kung madaling nauunawaan ng publiko ang naturang biro, mas dapat anyang maunawaan at kilalanin ang tunay na identity ng mga transgender at intersex na Pilipino.—sa panulat ni Jordan Gutierrez

Rerepasuhin na ng Department of Education ang mga umiiral na hakbang sa seguridad sa mga paaralan kasunod ng pamamaril sa San Jose National High School sa Tacloban City.

Ayon kay Education Secretary Sonny Angara, kailangan pang paigtingin ang koordinasyon sa mga law enforcement agency at pagbutihin ang mga school emergency protocol para sa mga aktibong banta, katulad ng mga isinasagawang earthquake at fire drills.

Nangangamba rin ang kalihim sa posibilidad ng mga “copycat” o panggagayang insidente at iginiit na dapat managot ang may-ari ng baril na napunta sa mga menor de edad na suspek.

Binigyang-diin ni Secretary Angara ang kahalagahan ng police visibility sa paligid ng mga paaralan upang makatulong sa pagpigil ng karahasan at iba pang iligal na aktibidad.—sa panulat ni Jordan Gutierrez

Tinitingnan din ng Department of Justice ang posibilidad na hindi lamang simpleng kaso ng bullying ang nangyaring pamamaril sa San Jose National High School sa Tacloban City.

Ayon kay Justice Spokesman Polo Martinez, inaalam nila kung may kaugnayan sa violent extremism ang insidente, katulad ng mga naganap na pag-atake sa ibang bansa.

Lumabas sa paunang imbestigasyon ng mga pulisya na bullying ang posibleng motibo sa karumal-dumal na pamamaril na ikinasawi ng tatlong estudyante.

Iginiit ni Martinez na madaling maimpluwensyahan ang mga kabataan, lalo na sa mga nakikita nila sa social media.—sa panulat ni Jordan Gutierrez