Dalawa lamang sa mga pamilya ng mga nawawalang sabungero ang dumalo sa pagdinig kaugnay ng mga kasong kinasasangkutan ng negosyanteng si Charlie “Atong” Ang at iba pang akusado sa pagkawala ng ilang sabungero.
Ito ang unang pagdinig na isinagawa sa Quezon City Regional Trial Court matapos ilipat ang mga kaso mula sa mga korte sa Sta. Cruz at San Pablo sa Laguna, gayundin sa Lipa City, Batangas.
Saklaw ng kasalukuyang pagdinig ang mga kasong kidnapping with homicide at kidnapping and serious illegal detention.
Dumalo sa pagdinig ang mga kinakasama ng nawawalang sina Ferdinand Dizon at Nerio Antecristo.
Samantala, hindi nakadalo ang iba pang 17 nagreklamo na unang naghain ng kaso sa Sta. Cruz Court.
Nauna nang inaprubahan ng Supreme Court En Banc ang paglipat ng mga kaso matapos ang mosyon ng panel of prosecutors, dahil sa mga isyung pangseguridad at sensitibong katangian ng mga kaso.—sa panulat ni Daniela De Guzman
