Maaaring payagan na ang operasyon ng mga pampasaherong jeep at UV express bago pa magtapos ang unang phase ng pagbabalik ng pampublikong transportasyon sa Metro Manila sa Hunyo 21.
Ayon kay Transportation Assistant Secretary Mark De Leon, ito ay sakaling hindi maging sapat ang bilang ng mga public utility vehicles (PUV) na magbibigay serbisyo sa mga commuters sa phase 1 ng pagbabalik ng public transportation.
Sinabi ni De Leon, itinuturing na high-risk sa pagkalat ng coronavirus disease 2019 (COVID-19) ang mga lumang jeep at UV express dahil sa kawalan ng mga automatic fare collection system (AFCS).
Gayunman, kanilang titignan ang posibilidad ng panunumbalik ng operasyon ng mga ito sakaling hindi umubra ang mga pampublikong bus at modern jeepney sa dami ng mga pasaherong bibigyan ng serbisyo.
Una nang inanunsyo ng DOTR ang paghati sa dalawang phase o bahagi para sa pagbabalik ng public transportation sa Metro Manila kasabay ng pag-iral ng general community quarantine (GCQ).
Sa ilalim ng phase 1 mula June 1 hanggang June 21, tanging mga train system at bus augmentation nito, taxi, TNVS tulad ng Grab, shuttle service, point to point (P2P) bus, bisikleta, at tricyle ang papayagang magbalik operasyon para sa limitadong kapasidad.
Habang sa phase 2 mula June 22 hanggang 30, maaari na ang bumiyahe sa limitadong kapasidad ang mga pampasaherong bus, modern jeep, at UV express.