Handa si dating Congressman Mike Defensor na harapin ang reklamong ihahain ng National Bureau of Investigation laban sa kanya kaugnay ng umano’y pagkakasangkot sa human trafficking.
Iginiit ni Defensor na walang sapat na batayan ang kasong inihahanda laban sa kanya.
Aniya, mali ang interpretasyon na siya ang nagpapatakbo ng anya’y isang lihim na prostitution den, gayong bukas at lantad naman, aniya, ang operasyon ng establisimyento.
Noong Abril, sinalakay ng mga ahente ng NBI ang Chicago KTV Bar sa Pasig City kung saan nasagip ang mahigit limampung kababaihan.
Ipinaliwanag ni Defensor na ang Cliffpoint Development ang kumpanyang nagmamay-ari ng gusali kung saan matatagpuan ang iba’t ibang negosyo, kabilang ang Chicago KTV, isang convenience store, mga opisina, at mga restaurant.
Aniya, bilang may-ari ng gusali, hindi nangangahulugang may pananagutan siya sa anumang iligal na aktibidad na maaaring gawin ng isa sa mga umuupa rito.—sa panulat ni Daniela De Guzman
