Nananawagan si National Bureau of Investigation Director Melvin Matibag na gumawa ng posibleng batas na nagtatakda ng pamantayan para sa mga journalist na naka-base sa social media.
Ito’y kasunod ng pagdami ng mga indibidwal na nagpapakilalang mamamahayag online nang walang malinaw na regulasyon.
Sinabi ito ni Matibag sa gitna ng isang press briefing kung saan pinuri niya ang media dahil sa propesyonal at fact based na pag-uulat ng mga ito.
Dumaan anya kasi ang mga lehitimong mamamahayag sa tamang proseso ng edukasyon at pagsasanay sa journalism, communication, o kaugnay na larangan.
Giit pa ng hepe ng NBI, malaki ang hamon ang dulot ng social media sa pagpapakalat ng impormasyon dahil marami ang pwedeng gumamit ng online platforms para sa pag-uulat ng impormasyon ng walang pananagutan sa umiiral na pamantayan.
Ipinunto rin ni Matibag na nakagapos ang tradisyonal na media sa mga regulasyon, gaya ng Movie and Television Regulatory and Classification Board, at mga organisasyong tulad ng Kapisanan ng mga Brodkaster ng Pilipinas at National Press Club, dahilan para mag-ingat ang mga ito sa kanilang pag-uulat kumpara sa ilang content creator online. | via Aya Yupangco (Patrol 5)
