Pinaiimbestigahan na ng Land Transportation Franchising and Regulatory Board ang pagkakasama ng Stronghold Insurance Consortium sa Passenger Personal Accident Insurance para sa mga public utility vehicles.
Ito’y kahit hindi nakapagsumite ng mga required documents sa itinakdang deadline ng LTFRB ang Stronghold.
Sa inilabas na circular letter ng Insurance Commission na nilagdaan ni Commissioner Reynaldo Regalado, ang mga aplikante para sa management company ng insurance consortium ay dapat makapagsumite ng lahat ng kailangang dokumento dalawang buwan bago pa mag-paso o mawalan ng bisa ang 5-year accreditation nito.
Ayon sa isang source, pumatak sa November 30, 2025 ang huling araw ng submission ng lahat ng requirements pero nabigyan pa rin ng accreditation ang Stronghold kahit December 1 na ito nagsumite ng mga dokumento.
Magugunitang naging kontrobersiyal ang Stronghold Insurance matapos matuklasan na ito ang insurance company na kinuha ng mag-asawang Sarah at Curlee Discaya sa kanilang mga nakuhang flood control project sa DPWH.
Samantala, nanawagan naman ang mga opisyal ng LTFRB sa ICI na imbestigahan ang kontrobersiyang ito dahil malalagay sa panganib ang mga pasahero ng mga PUV kung hindi malinaw ang sistema ng insurance na titiyak sa kanilang kaligtasan.
