Pinuri ni Akbayan Partylist Rep. Perci Cendaña ang hakbang na ginawa ng Korte Suprema matapos ipag-utos ang pagpapabalik ng 60 billion peso excess fund ng PhilHealth.
Ayon kay Congressman Cendaña, magandang balita ito para sa ating mga kababayan na kapos sa maayos na serbisyong pangkalusugan.
Iginiit ng kongresista na dapat sumunod ang Senado at Kamara sa kautusan ng Supreme Court at isama sa 2026 General Appropriations Act o GAA ang pagbalik ng pondo sa PhilHealth.
Binigyang-diin ni Cong. Cendaña na hindi dapat kinukuha ng pamahalaan ang pondong inilaan para sa sektor ng pangkalusugan para lamang gastusin sa mga proyekto sa flood control at infrastructure.
Matatandaang una nang iginiit ng Korte Suprema na ang ginawa pagkuha at paglipat ng pondo mula sa PhilHealth patungo sa ibang ahensya ay malinaw na paglabag sa batas. — sa panulat ni Jordan Gutierrez
