Hiniling ng House prosecution panel sa Senate Impeachment Court ang pagpapa-subpoena kay dating Senator Antonio Trillanes IV.
Ito ang kinumpirma ni House Prosecutor Terry Ridon, na ang pagsalang sa witness stand kay Trillanes ay may kaugnayan sa Article 2 na tumutukoy sa unexplained wealth o hindi maipaliwanag na yaman ni Vice President Sara Duterte.
Nais ng prosecution na tanungin si Trillanes kung ano ang mga nalalaman nito tungkol sa kwestiyonableng pag-yaman ng bise presidente batay sa idineklara niyang kita sa Statement of Assets, Liabilities and Net Worth o SALN.
Dahil dito, asahan na haharap sa witness stand si Trillanes sa susunod na linggo.
Asahan din ang muling pagharap ni PhilGEPS Division Chief Rendell Sopeña upang ipagpatuloy ang kaniyang testimonya sa mga government procurement records na may kaugnayan kay VP Sara.
Bukod naman kay Trillanes, una nang ipinatawag ng prosecution sina Davao City Mayor Sebastian “Baste” Duterte at PhilHealth Regional Office XI – BAC Secretariat Atty. Gary Samonte. | Sa panulat ni Geli Mendez
