Pinangunahan ni Batangas Governor Vilma Santos-Recto ang dalawang araw na pagtitipon ng mga lokal na mamumuhunan at negosyante sa buong Southern Luzon kabilang ang Camarines Sur, MIMAROPA, CALABARZON sa ginanap na 35th South Luzon Area Business Conference o SOLABC sa Lipa City, Batangas, na pinangunahan ng Philippine Chamber of Commerce and Industry o PCCI Lipa bilang host chamber.
Naging pangunahing tampok sa naturang business conference ang malaking papel na ginagampanan ngayon ng digital industry sa higit na pagpapahusay ng pagnenegosyo sa bansa.
Ayon kay Ronilo M. Balbieran, En.P., vice president for business development and head of research ng Reid Foundation, ang susunod na yugto ng paglago ng Pilipinas ay hindi magmumula sa iisang sektor lamang, kundi sa pagsasanib ng limang pangunahing sektor. Ang pinakamalaking oportunidad ay nasa kanilang pagtatagpo—gaya ng mga health-tech na aplikasyon, mga malikhaing karanasan sa turismo, at mga plataporma sa logistics na pinapagana ng mga de-kuryenteng sasakyan (EV).
Pinagsama-sama ng nasabing pagtitipon ang mga nangungunang eksperto at lider sa iba’t ibang industriya upang talakayin ang kinabukasan ng pamumuno, inobasyon, pakikipagtuwang, at pinabilis na kaunlaran. Ulat ni Ron Lozano / DWIZ Correspondent
