Nanggagalaiti ang U-K based Filipino gaming content creator na si Gian Lois Concepcion, o mas kilala bilang Gloco, sa planong pag-ban sa mga itinuturing na mararahas na online games, na ayon sa ilang opisyal ng pamahalaan, ay naging mitsa ng karahasan sa mga paaralan kamakailan.
Kabilang na rito ang insidente ng pamamaril sa San Jose National High School sa Tacloban City, na ikinasawi ng tatlong estudyante at ikinasugat naman ng hindi bababa sa dalawa pa.
Nabababawan si Concepcion sa mga usapin ng pag-ban sa mga larong sinasabing naka-impluwensya sa mga suspek na gawin ang krimen, tulad na lang ng larong Gorebox, na nilaro umano ng dalawang suspek sa isinagawang pamamaril sa Tacloban.
Naniniwala rin si Gloco na hindi nagdudulot ng karahasan ang mga video game na may tema ng pagkitil sa tao o anuman nilalang, o pagwasak sa kagamitan o gusali; at mas mainam anya na tumutok sa ugat ng problema, tulad ng maling pagpapalaki sa mga kabataan ng kanilang mga magulang o sinumang nakatatanda sa kanila.
Kung may mga laro na tunay na wumawasak sa buhay ng bawat Pilipino, ito anya ay ang online casino at iba pang uri ng sugal online, na nire-regulate ng pamahalaan dahil kumikita ito.
Gayunman, iginiit ni Concepcion na laging maghahanap ng paraan ang mga tao upang kumita sa pamamagitan ng online sugal.
Gayundin, anya, maghahanap ng paraan ang pamahalaan upang kumita sa pamamagitan ng regulasyon, tulad ng armas, tabako, vapes, at mga palabas sa pelikula, telebisyon, at social media.
Tinawag din niyang mga “hipokrito” ang mga artista at influencer na nag-e-endorse ng mga online gambling platforms dahil may gana pa anya ang mga itong mag-virtue signal tungkol sa anumang paninindigan sa buhay. | Sa panulat ni Anjo Riñon
