NATIONAL NEWS

Hindi na papayagan ang paggamit ng SMS at email-based one-time passwords (OTP) para sa mga high-risk financial transaction simula Hunyo 25.

Ito ay alinsunod sa direktiba ng Bangko Sentral ng Pilipinas o BSP upang mas mapalakas ang proteksyon laban sa online fraud at iba pang uri ng panloloko.

Sa ilalim ng BSP Circular No. 1213, inaatasan ang mga bangko at e-wallet operators na gumamit ng mas matibay na authentication methods gaya ng biometrics, behavioral verification, at passwordless solutions para sa mga high-risk transaction.

Saklaw ng patakaran ang mga bangko at e-wallet providers na may average na higit sa 75 milyong pisong online transactions kada buwan.

Kinumpirma ni Senate President Sherwin Gatchalian na wala pang pinal na desisyon kung magkakaroon ng hiwalay na presiding officer para sa impeachment trial ni Vice President Sara Duterte.

Ayon kay Senate President Gatchalian, malinaw sa kasalukuyang Rules of Procedure on Impeachment Trials na ang Senate President ang nagsisilbing presiding officer sa mga impeachment proceedings maliban kung pangulo ng bansa ang nililitis.

Gayunman, maaari pa rin anyang pag-usapan ng Senado ang posibilidad na magtalaga ng ibang senador bilang presiding officer kung ito ang magiging pasya ng mayorya.

Nilinaw ni S.P. Gatchalian na wala pang pormal na talakayan ang mga senador kaugnay sa usapin, sa kabila ng naunang pahayag ni Senador Panfilo “Ping” Lacson na may paunang pagkakasundo na ang ilang miyembro ng mayorya na italaga si Senador Francis “Chiz” Escudero sa naturang posisyon.—sa panulat ni Jordan Gutierrez

Ihahain na sa Department of Justice ang mga kasong may kaugnayan sa pagkamatay nina Ateneo student-athletes Rene Baterbonia at Divine Adili sa Biyernes, Hunyo a-bente sais.

Ayon kay Interior Secretary Jonvic Remulla, halos tapos na ang imbestigasyon sa insidente at malapit nang makumpleto ang case buildup ng mga otoridad.

Halos isandaang indibidwal na anya ang na-interview ng mga imbestigador at umabot na sa isanlibo’t dalawang daang pahina ang nakalap na mga testimonya sa loob ng dalawang linggong imbestigasyon.

Tiniyak ni Secretary Remulla na kumpiyansa ang PNP-CIDG sa lakas ng ebidensyang kanilang nakalap kaugnay sa pagkamatay ng dalawang Ateneo players sa team-building activity sa Aurora noong Hunyo 8.—sa panulat ni Jordan Gutierrez

Inilarawan ni Senate President Sherwin Gatchalian bilang isang krisis ang sunud-sunod na insidente ng karahasan sa mga paaralan matapos ang panibagong pananaksak na naganap sa isang paaralan sa San Carlos City, Negros Occidental.

Sa nasabing insidente, isang Grade 10 student ang nanaksak sa isang Grade 9 student na nagtamo ng sugat at kasalukuyang nagpapagaling.

Ayon kay Senate President Gatchalian, nakababahala ang panibagong krimen dahil hindi pa tapos ang pagluluksa ng bansa sa trahedyang naganap sa Tacloban City kung saan tatlong estudyante ang nasawi sa pamamaril ng dalawang menor de edad na suspek.

Tiniyak ng pangulo ng Senado na maghahain siya ng resolusyon upang masiyasat ang lumalalang karahasan sa mga eskwelahan at matukoy ang mga kongkretong hakbang para mapalakas ang seguridad at maprotektahan ang kapakanan ng mga mag-aaral.—sa panulat ni Jordan Gutierrez

Lumalabas sa imbestigasyon ng mga otoridad na posibleng matagal nang nakararanas ng pambu-bully ang dalawang menor de edad na suspek sa pamamaril sa San Jose National High School sa Tacloban City.

Ayon kay Interior Secretary Jonvic Remulla, isa sa mga anggulong sinusuri ay kung paano nakaapekto ang pambu-bully at ang marahas na online game na Gorebox sa insidenteng ikinasawi ng tatlong estudyante.

Iniimbestigahan na rin anya kung may pananagutan ang mga magulang at kaanak ng mga suspek, lalo na’t lumabas na hindi rehistrado ang isa sa mga ginamit na baril at may pekeng serial number.

Samantala, suportado rin ng kalihim ang panawagang repasuhin ang Juvenile Justice and Welfare Act at mga polisiya laban sa bullying upang maiwasan ang mga karahasang sangkot ang mga menor de edad.—sa panulat ni Jordan Gutierrez

Nilinaw ni House Prosecutor at Manila Rep. Joel Chua na walang anumang pondo mula sa kaban ng bayan ang ginastos sa trending na audio visual presentation ng House prosecution panel.

Kaugnay ito sa cinematic AVP kung saan tampok ang 11-man member ng prosecution na kalat sa iba’t ibang social media platforms.

Ayon kay Chua, libre at boluntaryong ginawa ng mga pribadong indibidwal ang naturang video na nag-ambag para mapalawak ang public awareness sa impeachment trial ni Vice President Sara Duterte.

Para sa mambabatas, hindi dapat pigilan ang mga mamamayan na kusang magbigay ng kanilang kontribusyon upang mapalawak ang kaalaman ng publiko tungkol sa impeachment proceedings.

Paliwanag ng mambabatas, may mga indibidwal at grupo na naghahanap ng sariling paraan upang makatulong sa pagpapaliwanag ng kahalagahan at proseso ng impeachment.

Aniya, hindi naman lahat ng Pilipino ay lubos na nauunawaan ang usapin kaya may mga nagkukusang magbahagi ng impormasyon at maglunsad ng mga inisyatiba upang mas maging mulat ang publiko.

Dagdag pa ng mambabatas, ang ganitong mga hakbang ay maituturing na ambag sa pagpapatibay ng demokrasya at pagpapalawak ng partisipasyon ng mamamayan sa mahahalagang usapin sa bansa.

Binigyang-diin din ng mambabatas na ang anumang suporta o kontribusyon mula sa publiko ay nagmumula sa kagustuhan ng mga ito na makatulong at makibahagi sa mga usaping may malaking epekto sa bansa.

Sa ngayon, nagpapatuloy ang mga paghahanda ng prosecution team para sa impeachment trial ng bise presidente. | via Geli Mendez (Patrol 30)

Tumanggi magbigay ng komento ang kampo ni Vice President Sara Duterte kaugnay ng hiling ng House prosecution panel na buksan ang kahon mula sa Bureau of Internal Revenue na naglalaman ng mga tax records ng bise presidente.

Ayon kay Defense Spokesman Atty. Michael Poa, magsusumite na lamang sila ng pormal na tugon o reply sa nasabing manifestation na inihain ng prosekusyon.

Gayunman, tiniyak ni Atty. Poa na agad nilang tutugunan ang isyu sa tamang proseso sa impeachment court, pero hindi pa anya matukoy kung kailan eksaktong maisusumite ang kanilang sagot.

Nilinaw din ng depensa na magkaiba ang kanilang posisyon sa usapin ng assets ni Vice President Duterte at sa kahon ng BIR records.—sa panulat ni Jordan Gutierrez