NATIONAL NEWS

Target ni bagong talagang Transportation Secretary Vince Dizon na i-update ang masterplan para sa transport infrastracture development ng bansa at palawigin ang partnership ng pamahalaan sa mga pribadong sektor.

Alinsunod ito sa direktiba ni Pangulong Ferdinand Marcos Jr., na pabilisin ang pagpapatupad at pagtapos sa mga transportation project.

Sa press briefing sa Malakanyang, sinabi ni Secretary Dizon na mahalaga ang papel ng pribadong sektor at mga lokal na pamahalaan sa pagsasakatuparan ng mga proyekto, lalo na’t may mga isyu tulad ng right of way.

Plano aniyang balikan ang pag-aaral ng Japan International Cooperation Agency hinggil sa masterplan ng mga imprastruktura sa transportasyon upang mas maging epektibo ang mga hakbangin ng pamahalaan.

Bukas din ang bagong Kalihim sa public transport privatization at sumakay sa mga pampublikong sasakyan tulad ng busway at mrt para personal na maranasan ang sitwasyon ng mga commuter.

Sa ganitong paraan, mas magiging malinaw sa kanya ang mga dapat gawin para matugunan ang problema sa transportasyon.

Inaasahang maglalabas ang DOTR ng detalyadong plano sa mga darating na linggo upang matukoy ang mga prayoridad na proyekto sa land, air, at sea transportation.

Una rito, pormal na nanumpa si Dizon bilang bagong kalihim ng DOTR, kasunod ng pagbibitiw ni dating Transportation Secretary Jaime Bautista. –  Sa panulat ni Laica Cuevas

Tumanggi munang magkomento ang Department of Health kaugnay sa sinasabing bagong bat virus na nadiskubre ng mga researcher sa China.

Ayon kay  DOH Spokesman at Assistant Secretary Albert Domingo, ito ay dahil wala pang dumarating na abiso mula sa  world health organization hinggil sa sinasabing bagong sakit.

Binigyang-diin ni Asec. Domingo na iiwas muna sila sa pagbibigay ng pahayag dahil wala pa silang sapat na batayan upang magkomento ukol dito.

Ipinunto ng DOH Official ang isa pang napaulat na flu-like virus kamakailan na kalaunan ay napasinungalingan din.

Nabatid na iniulat ng isang foreign media ang sinasabing bagong bat virus sa china na mayroong kahalintulad na komposisyon sa Sars-Cov-2 na siyang nagdudulot ng COVID-19. –  Sa panulat ni John Riz Calata

Humiling si dating Senador Leila De Lima sa Korte Suprema na maglabas ng “public clarification” matapos idawit ang pangalan sa isang disbarred na abogado.

Ayon kay De Lima, hindi niya kilala si demosthenes tecson at wala siyang natanggap na pera mula sa pina-disbar na abogado.

Sa inilabas na press release ng kataas-taasang hukuman, tinanggalan ng lisensya sa pagka-abogado si Tecson dahil sa paglabag sa code of professional responsibility and accountability dahil sa sinasabing hindi pagbibigay nito nang buo sa 134 million pesos na pabuya ng kliyente nito mula sa naipanalong expropriation case.

Sinabi ng Korte Suprema na mula sa nasabing halaga ay 53 million pesos lamang ang ibinigay ni Tecson sa kanyang kliyente; at itinabi ang natitirang pera para sa kanyang attorney’s fees at sa kampanya sa pagka-senador ni De Lima noong nakaraang eleksyon.

Binigyang-diin ng dating senador na hindi makatarungan na makaladkad ang kaniyang pangalan dahil sa “misconduct” ng isang abogado na natanggal sa propesyon dahil sa “ethical violations”. –  Sa panulat ni John Riz Calata

Nakatakdang ilabas ng Commission on Elections sa Marso ang desisyon sa disqualification case laban sa mga miyembro ng pamilya tulfo kaugnay ng 2025 midterm elections.

Ayon kay COMELEC Chairman George Erwin Garcia, inaaksyunan na ng kanilang division ang technical issue bago maglabas ng “summons” Sa mga Tulfo candidate.

Binigyang-diin ni Chairman Garcia na pasasagutin nila ang mga Tulfo, limang araw matapos matanggap ang “summons” At kasunod nito ay “submitted for decision” na ang kaso.

Nabatid na naghain ng disqualification case noong February 17 si Virgilio Garcia laban sa magkakapatid na sina senatorial candidates Erwin Tulfo at Ben Tulfo;

Gayundin kina Jocelyn Pua-Tulfo, Ralph Wendel Tulfo at Wanda Tulfo-Teo dahil kabilang aniya ang mga ito sa “political dynasty”. –   Sa panulat ni John Riz Calata

Pinaboran ni Senador Grace Poe ang desisyon ni bagong Transportation Secretary Vince Dizon na ipagpaliban muna sa March 15 ang pagpaptupad ng cashless toll payment.

Sinabi ni Senador Poe sa DWIZ na hindi ganun kadali para sa lahat ang makakuha agad ng Radio Frequency Identification (RFID).

Gayunman, ayon sa mambabatas na mainam naman na mag-modernize ngunit kailangan pa ring maglagay ng cash booth sa mga toll.

Binigyang-diin din si Senador Poe na kailangan munang tiyakin ng DOTR na gumagana nang maayos ang mga scanners bago ipatupad ang cashless toll payment. –  Sa panualt ni John Riz Calata

Hindi na matutuloy ang nakatakdang implementasyon ng full cashless toll collection sa expressways simula sa Marso 15.

Inanunsyo ni Transportation Secretary Vince Dizon, na nagbigay na siya ng kautusan sa Toll Regulatoty Board para suspendihin ang cashless toll system.

Hindi pa anya napapanahon na maipatupad ang full cashless toll collection.

Idinagdag pa ng bagong Kalihim, na nakita niya kung paanong nagkabuhol-buhol ang mga sasakyan noong unang sinubukang ipatupad ito.

Kakusapin muna ng kalihim ang toll operators ng NLEX at slex at titingnan kung epektibo na ang kanilang sistema.

Naniniwala rin si Dizon na anti-poor ang cashless system sa mga expressways.

 Paiigtingin pa ng Rizal High School sa Pasig City ang seguridad at safety measure sa oras ng uwian ng mga estudyante.

Kasunod ito ng viral video ng pananaksak sa dalawang estudyante ng paaralan na mga kapwa nila kamag-aral.

Ayon kay RHS Principal Richard Santos, nauunawan nila ang bigat ng sitwasyon at kung gaano ito nakaaapekto sa kanilang komunidad.

Bukas din anya ang paaralan sa anumang imbestigasyon upang mabigyan ng linaw ang mga usapin.

Dahil dito, magpapatupad na ang pamunuan ng RHS ng inspeksyon sa mga bag ng mga estudyante simula ngayong araw.

Walang basehan at malabong mapagbigyan ang hirit ng Korte Suprema na temporary restraining order para sa impeachment proceedings laban kay Vice President Sara Duterte.

Ito ang iginiit ni House Prosecution team member Batangas 2nd District Representative Gerville Luistro dahil walang sapat na batayan ang kataas-taasang para mag-isyu ng TRO laban sa impeachment complaint na inendorso ng kamara sa Senado.

Itinanggi naman ng mambabatas ang argumento ng mga naghain ng petisyon na may pagkakamali sa verification process ng impeachment complaint dahil sumunod ito sa rules ng Kamara.

Pati ang alegasyon na ang verification page ay isiningit lang matapos maipadala sa senado ang impeachment complaint.

Binigyaan diin pa ni Representative Luistro, na hindi minadali ng kamara ang pagpapa-impeach sa Bise Presidente dahil nagkaroon sila ng pagkakataon na pag-aralang mabuti ang tatlong impeachment complaint na inihain noong 2024.

 Iginiit ng isang Abogado na sinasabotahe at pinapatay ni Senate President Chiz Escudero ang impeachment complaint na inihain laban kay Vice President Sara Duterte.

Sa panayam ng DWIZ, sinabi ni Attorney Howard Calleja, na labag din sa konstitusyon na i-adjourn agad ng senate president ang sesyon ng Senado lalo na’t hindi pa tinatalakay ang articles of impeachment na isinumite ng  House of Representatives noong Pebrero 5.

Idinagdag pa ng Abugado na may dalawang araw pa ang senado sa kanilang legislative calendar dahil ang huling araw ng sesyon ay Pebrero 7.

Sinabi pa ni Attorney Calleja, na dapat simulan na ang impeachment trial ni VP Sara alinsunod sa konstitusyon.