NATIONAL NEWS

Matibay ang ebidensya laban sa na-impeach na si Vice President Sara Duterte upang masibak sa puwesto at hindi na muling makahawak ng anumang posisyon sa pamahalaan.

Ito ang kumpiyansang sinabi San Juan City Rep. Ysabel Maria Zamora sa isang forum na inorganisa ng University of the Philippines College of Law hinggil sa impeachment trial ni VP Sara.

Muli ring binigyang-diin ni Rep. Zamora, miyembro ng House Prosecution Panel na tungkulin ng Kongreso na ituloy ang impeachment matapos makita ang matibay na ebidensyang natuklasan sa mga pagdinig sa Kamara.

Ayon sa kinatawan ng San Juan City na isang abugado, “Solid” ang kaso na inihain ng House Prosecution team laban sa Pangalawang Pangulo.

Ipinaliwanag din ni Rep. Zamora na kahit magbitiw sa puwesto ang isang opisyal na-impeach, hindi ito nangangahulugang tapos na ang proseso ng impeachment.

Dahil maaaring ipagpatuloy ng Senado ang paglilitis upang matukoy kung dapat bang tuluyang i-ban ang naturang opisyal sa paghawak ng anumang posisyon sa pamahalaan. –  Sa panulat ni Kat Gonzales

Pinalagan ng isang Lider ng Kamara ang mga kaalyado ni dating Pangulong Rodrigo Duterte at inakusahang ginagamit na sandata ng mga ito ang Office of the Ombudsman upang gantihan ang mga miyembro ng Kamara na bumotong pabor sa impeachment complaint laban kay Vice President Sara Duterte.

Reaksyon ito ni House Majority Leader Manuel Jose “Mannix” Dalipe kasunod ng paghiling ng grupo ni Davao Del Norte Rep. Pantaleon Alvarez sa ombudsman na suspendihin ang mga pinuno ng Kamara na kanyang inakusahan ng pamemeke ng mga pampublikong dokumento kaugnay ng isyu ng budget insertions.

Ayon kay Rep. Dalipe, isang desperadong pagtatangka ang panawagan ni Cong. Alvarez para sa suspensyon at gawing sandata ang Ombudsman para sa paghihiganting pampulitika dahil nananatiling matatag ang kamara sa pagtataguyod ng transparency at accountability, anuman ang political affiliations.

Tiwala naman ang House Majority Leader na hindi magpapagamit ang ombudsman sa mga kaalyado ng mga duterte sa tinagurian nyang “Political games”.

Aniya, malinaw na taktika ang reklsmo at panawagang suspensyon upang ilihis ang atensyon sa isyu ng impeachment laban kay VP Sara. –  Sa panulat ni Kat Gonzales

Naniniwala ang isang Senador na kakayanin ng senado na masimulan sa susunod na buwan ang impeachment  proceesdings  laban kay Vice President Sara Duterte.

Ayon kay Senate Minority Leader Koko Pimentel,  handa naman na ang senado para paglilitis at nareview na rin ang rules ng Impeachment Court.

Gayunman, nilinaw ng Senador na hindi naman nangangahulugang haharap na agad ang mga testigo sa kaso, sa pagsisimula ng impeachment proceedings.

Binigyan-diin ni Senador Pimentel, na sisimulan pa lamang ang proseso gaya panunumpa nila bilang impeachment  judge at pag-apruba ng umiiral na impeachment rules. –  Sa panulat ni Kat Gonzales

 Hihikayatin ni Senate Minority Leader Koko Pimentel  si Senate President Chiz Escudero na magpatawag ng  caucus sa mga senador.

Ayon kay Senador Pimentel, ito’y upang mapag-usapan ang hakbang  na dapat ng gawin ng Senado sa impeachment case laban kay Vice President  Sara Duterte.

Pagkakataon anya ito para makonsulta ang iba pang mga senador at malaman ang kanilang mga posisyon hingil sa usapin.

Kaugnay nito, naniniwala ang Senador, na hindi na kailangan magpatawag ng special session ng pangulo, para matalakay sa plenaryo ang nasabing usapin pag-nag-convene ang Senado bilang Impeachment Court.

Itinanggi ng Department of Agriculture na sila ang may kasalanan sa nadiskubreng bukbok sa ibinebentang bigas sa Kadiwa ng Pangulo sa Quezon City.

Ayon kay Agriculture Secretary Francisco Tiu-Laurel Jr., pina-hold ang pagbebenta ng nasabing bigas kaya’t iniimbestigahan na nila kung sino ang nasa likod ng pagbebenta ng mga sinasabing bukbok na bigas.

Napag-alaman din na hindi NFA rice ang ibinentang bigas na may bukbok.

Iginiit ng Kalihim na isang isolated case lamang ang nangyari.

Kaugnay nito, tiniyak  ni Sec. Laurel na paiigtingin pa nila ang quality control measures para sa Rice-for-All program sa Kadiwa ng Pangulo stalls. – Sa panulat ni Alyssa Quevedo

 Posibleng gamitin ng House Prosecution team ang mga naging aral mula sa impeachment trials nina dating Pangulong Joseph “Erap” Estrada at Chief Justice Renato Corona hinggil sa paghahanda para sa paglilitis kay Vice President Sara Duterte.

Ayon kay San Juan Representative Ysabel Maria Zamora, isa sa mga miyembro ng prosecution, ang mga nakaraang impeachment trial ay nagbibigay ng mahahalagang kaalaman kabilang na ang suporta ng publiko; legal strategy; at mga pamantayan sa ebidensya na makatutulong sa pagpapatibay ng kaso laban sa Pangalawang Pangulo.

Dagdag pa ng mambabatas, binubusisi at pinag-aaralan na ng prosekyusyon ang mga naging hakbang sa nakaraang paglilitis.

Binigyang diin din ni Congresswoman Zamora ang pangangailangang maging handa sa pagpapakita ng matibay na ebidensya sa bawat articles of impeachment.

Kaugnay naman sa gagamiting proseso, tinukoy ng kongresista ang mga naunang alituntunin ng Senado kaugnay ng kanilang papel sa impeachment trials. –  mula sa ulat ni Geli Mendez (Patrol 30)

Pinawi ng world bank ang pangamba ng mga pilipino matapos ang ulat na posibleng pagkawala ng trabaho dahil sa artificial intelligence.

Ayon sa ilang researchers, hindi masasapol ng epekto ng AI ANG developing countries tulad ng Pilipinas kumpara sa mga mayayamang bansa.

Mas limitado anila ang epekto ng makabagong teknolohiya sa labor market ng mga bansang mababa ang kita dahil mas maraming trabaho rito ang nangangailangan ng manual labor at interpersonal interaction, mga gawaing hindi madaling mapalitan ng AI.

Dagdag pa rito ang kakulangan sa kuryente at internet.

Bagaman may mga trabahong maaaring maapektuhan, nilinaw ng World Bank na hindi ito nangangahulugan ng agarang pagpapalit ng tao sa trabaho, sa halip, maaaring palakasin ng ai ang productivity ng mga manggagawa.

Para naman mapaghandaan ang future ng AI sa bansa, hinimok ng mga eksperto ang gobyerno na palawakin ang access sa internet at kuryente, pagtuunan ang ai augmentation sa halip na automation, at gamitin ang ai upang mapabuti ang serbisyong panlipunan tulad ng edukasyon at kalusugan. –  Sa panulat ni Laica Cuevas