NATIONAL NEWS

Mas maraming Pilipino ang sumusuporta sa mga Marcos kumpara sa mga Duterte at kanilang kaalyansa.

Sa resulta ng Tugon ng Masa survey ng OCTA Research, 36% ng adult respondents ang sumusuporta sa administrasyon ni Pangulong Ferdinand Marcos Jr. habang 18% lamang ang nagsabing sila ay pro-Duterte.

Kaugnay nito, 26% ng survey respondents ang nagsabing wala silang sinusuportahan sa dalawa, habang 12% ang tumanging sumagot o hindi alam kung sino ang pipiliin.

Samantala, 8% naman ng respondents ang nagsabing sinusuportahan nila ang opposition party.

Itinuturing na halos hindi nagbago ang bilang ng Marcos at Duterte supporters mula sa 3rd quarter Tugon ng Masa survey noong August 2024, gayunman, bumaba ng 2% ang pro-Marcos kumpara sa mga taga-suporta ng pamilya Duterte. –  Sa panulat ni Laica Cuevas 

Iginiit ni dating Senate President Franklin Drilon na hindi tamang dahilan ang pangangampanya para sa May elections, para ipagpaliban ang impeachment trial kay Vice President Sara Duterte.

Ayon sa dating senador, hindi katanggap-tanggap na dahil sa halalan, hindi nagagampanan ng senado ang mandato ng konstitusyuon na magsilbing impeachment court at talakayin ang reklamo laban kay VP Sara.

Hindi dapat aniya bigyang-katwiran ang pagpapaliban sa paglilitis dahil mandato ng 1987 constitution na gawin ang trial “Forthwith” o “Agad” sa oras na matanggap ang articles of impeachment mula sa Kamara.

Sinegundahan naman ito ni dating COMELEC Commissioner Atty. Rene Sarmiento, na isa rin sa mga bumuo ng 1987 Constitution.

Giit ni Atty. Sarmiento, isa sa novel addition ng 1987 Constitution na gawin ang impeachment trial nang walang patumpik-tumpik, at hindi ito makikita sa provisions ng 1935 at 1973 constitutions, maging sa US 1787 Constitution.

Kumbinsido naman si Political Analyst Ronald Llamas na ang desisyon ni Senate President Francis Escudero na simulan ang trial pagkatapos ng SONA ay posibleng dahil sa pressure mula sa mga kapwa-senador.

Maaari aniyang napagtanto ng mga ito na makakasama para sa kanila ang impeachment trial para sa 2028 elections, at mawawalan ng boto mula sa mindanao at mga miyembro ng religious group na Iglesia ni Cristo. – S

Inihahanda na ang Senate Plenary Session para sa impeachment trial kay Vice President Sara Duterte.

Gayunman, nanindigan si Senate President Francis Escudero na hindi ito mangyayari habang naka-break ang Kongreso.

Ayon kay Senate President Escudero, tiyak na magkakaroon ng impeachment trial dahil naipasa na ang impeachment complaints at hindi nila inaaksaya ang panahon kundi pinaghahandaan nila ito.

Kabilang aniya sa mga paghahanda ang pag-i-inspeksyon sa mga lamesa at witness stand kung inanay na, at pagka-canvass ng robe na gagamitin ng mga Senador sa paglilitis.

Sa kabila nito, muling iginiit ng Lider ng Senado na hangga’t walang sesyon, walang trial na magaganap dahil maliwanag ang kanilang panuntunan kaugnay dito. –  Sa panulat ni Laica Cuevas mula sa ulat ni Cely Ortega-Bueno (Patrol 19)

Kinumpirma mismo ni Supreme Court Spokesperson Atty. Camille Ting na naghain na ng petisyon si Vice President Sara Duterte para kwestyunin ang bisa ng impeachment process na sinimulan ng Kamara.

Inihain ng Bise-Presidente ang petition for temporary restraining order at writ of preliminary injuction laban sa kanyang impeachment case.

Kinwestyon ni VP Sara ang validity at constitutionality ng ika-apat na impeachment complaint na tinransmit ng House of Representatives.

Ayon sa Pangalawang Pangulo, hindi na-transmit ni House Secretary General Reginald Velasco ang unang tatlong impeachment sa Kamara kay House Speaker Martin Romualdez ngunit in-endorso ng Kamara sa Senado ang ikaapat na reklamo noong February 05.

Ang pag-freeze aniya ng kamara sa unang tatlong reklamo ay pagpapakita ng grave abuse of discretion.

Hiniling ng Bise Presidente sa Korte Suprema na isantabi ang ikaapat na impeachment complaint at ideklara na applicable ang one year bar mula sa pagsasampa ng unang impeachment complaint, o noong December 2, 2024.

Nabatid na pumirma si dating Pangulong Rodrigo Duterte, bilang abogado ng anak na si Vice President Duterte sa petition for certiorari and prohibition.

Pirmado ni dating Pangulong Duterte ang 36 na pahinang petisyon, kasama ang limang iba pang abugado. –  Sa panulat ni Laica Cuevas

Inihahanda na ng pamahalaan ang sagot sa inihaing petisyon sa Korte Suprema na kumukuwestiyon sa legalidad ng 2025 national budget.

Ayon kay Solicitor General Menardo Guevarra, inaayos na nila ang komento ng mga respondent at isusumite ito sa kataas-taasang hukuman sa lalong madaling panahon.

Matatandaang pinangunahan nina dating Executive Secretary Vic Rodriguez at Davao City 3^rd District Rep. Isidro Ungab ang paghahain ng petisyon na humihiling na ideklarang unconstitutional ang ilang probisyon ng 2025 General Appropriations Act.

Giit ng petiioners, may mga blangkong item sa Bicameral Conference Committee report na maaaring pagmulan ng anomalya sa paggamit ng pondo ng bayan.

Una nang nagbabala si Pangulong Ferdinand Marcos Jr. na sakaling ideklara ng Supreme Court ang 2025 budget bilang unconstitutional, maaaring maapektuhan ang operasyon ng pamahalaan. –  Sa panulat ni Laica Cuevas mula sa ulat ni Gilbert Perdez (Patrol 13)

Idaan na lang sa balota sa halip na demanda.

Ito ang tugon ni Senate President Francis Escudero sa pahayag ni dating Pangulong Rodrigo Duterte na patayin ang 15 incumbent Senators para makapasok ang mga ini-endorso niyang senatorial candidates.

Ayon kay Senate President Escudero, hindi naman niya naramdaman na kasama siya sa sinabihan ng dating pangulo at sa tingin niya ay walang senador ang nakaramdam na banta ito sa kanilang buhay.

Giit ng Senate Leader, nakakalungkot ang mga nasabing pahayag ngunit mainam na idaan na lamang ito sa balota sa halip na sa demanda. – Sa panulat ni Laica Cuevas mula sa ulat ni Cely Ortega-Bueno (Patrol 19)

Nanindigan ang isang Lider ng Kamara na wala sa layunin ng Imbestigasyon ng House Tri-Comm na supilin ang kalayaan sa pamamahayag.

Nilinaw ni Surigao Del Norte Rep. Robert Ace Barbers na kabilang sa nasabing imbestigasyon na matugunan ang pagkalat ng mga maling impormasyon sa mga social media platform.

Nag-ugat ang imbestigasyon ng Tri-Comm mula sa privilege speech ni Rep. Barbers noong Disyembre 16 at sa resolusyon ni House Senior Deputy Speaker Aurelio “Dong” Gonzales Jr.

Ayon pa kay Cong. Barbers, Lead Chairman ng House Quad Comm at Chairman ng House Committee on Dangerous Drugs, nais nilang magtakda ng mga alituntunin o best practices sa pagpapalaganap ng impormasyon sa social media.

Dagdag pa ng kongresista, tanggap nila ang pambabatikos dahil bahagi ito ng demokrasya…pero iginiit na kontra sila sa pagpapakalat ng maling balita o “Fake news”.

Tiwala ang isang miyembro ng 11-man House Prosecution Panel na hindi makiki-alam ang Korte Suprema sa isasagawang pagdinig ng Senado sa impeachment case laban kay Vice President Sara Duterte.

Ginawa ni House Deputy Majority Leader at iloilo Rep. Lorenz Defensor ang pahayag matapos lumabas sa mga balita na naghain ng petisyon si VP Sara sa Korte Suprema upang pigilan ang senado na magsagawa ng impeachment trial.

Bagama’t aminadong hindi pa nababasa ang naturang petisyon, kumpiyansa si Rep Defensor na isa ring abugado na hindi panghihimasukan ng kataas-taasang hukuman ang nasabing usapin.

Bukod naman sa Bise Presidente, naghain din ng petisyon ang ilang abugado mula sa mindanao na kilalang malapit kay dating pangulong Rodrigo Duterte upang harangin din ang pagsasagawa ng impeachment trial.

Mayroon ding naghain ng petisyon sa Korte Suprema na humihiling naman na atasan ang Senado na simulan na ang impeachment trial laban kay VP Sara. –  Sa panulat ni Kat Gonzales

Kabilang sa mga naging ligal na kinatawan ni Vice President Sara Duterte sa kanyang inihaing petisyon sa Korte Suprema ang kanyang ama at dating Pangulo Rodrigo Duterte.

Bukod naman sa dating Pangulo isa rin sa mga abogado ng Pangalawang Pangulo ang kanyang biyenan na si Atty. Lucas Carpio Jr.

Una rito naghain ng  petition for certiorari and prohibition si VP Duterte para hilingin ang agarang paglalabas ng temporary restraining order at writ of preliminary injunction upang pigilan ang senado sa pagsasagawa ng impeachment trial.

Nabtid na hiwalay ang ginawang petison ni VP Sara sa naunang petisyon na inihain ng mga isang grupo ng mga abogado mula sa Mindanao. –  Sa panulat ni Kat Gonzales