NATIONAL NEWS

Inilarawan ni Ako Bicol Party-List Rep. Jil Bongalon, na panic mode na ang kampo ni Vice President Sara Duterte sa napipintong impeachment trial.

Ayon kay Cong. Bongalon, isang desperate move at publicity stunt ang pagtatangka ng kampo ng Bise Presidente na harangin sa Korte Suprema ang pag-usad ng impeachment case.

Tiyak aniya siya na nakasunod sa lahat ng constitutional requirements para sa paglilitis sa Senado ang inihaing impeachment complaint laban kay VP Sara.

Inihayag ng Kongresista na ang impeachment ay isang political process at hindi judiciary.

Ipinunto pa ng mambabatas na gumagamit ng mga taktika ang kampo ng mga Duterte para maantala ang proseso at mapigilan ang Senado sa paglilitis.

Hinamon naman ng House Impeachment Prosecutor ang kampo ng Pamilya Duterte na itigil na ang mga taktika at direktang harapin ang mga akusasyon laban sa Pangalawang Pangulo. –  Sa panulat ni Laica Cuevas mula sa ulat ni Geli Mendez (Patrol 30)

Kumbinsido si 1-Rider Party-List Rep. Rodge Gutierrez, na paglilihis lamang sa isyu ng impeachment case ni Vice President Sara Duterte ang pagsasampa ng kaso ng mga kaalyado ng pamilya Duterte.

Ginawa ng Kongresista ang pahayag matapos sabihin ni dating house speaker at ngayo’y Davao Del Norte Rep. Pantaleon Alvarez, na umaastang Korte at lasing sa kapangyarihan ang mga miyembro ng Kamara.

Ang pahayag ni Cong. Alvarez ay kaugnay ng pagkuwestyon ni Cong. Gutierrez na timing ang paghahain ng reklamo sa Ombudsman ng mga kaalyado ng mga Duterte sa kinakaharap na impeachment case ng bise Presidente.

Ayon kay Cong. Guttierez, iginagalang niya ang karapatan ng kapwa-mambabatas at iba pang indibidwal na magsampa ng kaso kaugnay sa budget insertions at budget blanks controversy.

Imbis aniya na diretsahang sagutin ang mga isyu, inililihis pa ito para linlangin ang publiko at siraan ang institusyon.

Matatandaang ilang mambabatas na rin ang pumuna kay Cong. Alvarez sa paghahain nito ng reklamo sa kabila ng pananahimik ng kongresista nang talakayin ang 2025 national budget sa plenaryo ng Kamara. –  Sa panulat ni Laica Cuevas mula sa ulat ni Geli Mendez

Ipina-subpoena na ng House Tri-Committee ang mga Vlogger at Social Media Influencer na bigong makadalo sa ikalawang pagdinig ng Komite.

Layon nitong obligahin ang Social Media Personalities na dumalo sa susunod na pagdinig ng Tri-Comm dahil tatlo lamang sa 40 inimbitahang Vlogger at Social Media Personalities ang sumipot sa hearing.

Ginawa ang hakbang matapos ang manifestation ni Abang-Lingkod Partylist Rep. Joseph Stephen Paduano na pinaboran naman ng mga miyembro ng Komite.

Samantala, posible namang tuluyan nang maharap sa disbarment si Atty. Trixie Cruz-Angeles, ang dating Presidential Communications Operations Office Chief dahil sa patuloy na pang-i-isnab sa imbitasyon ng Tri-Comm para talakayin ang issue ng fake news at disinformation.

Ayon kay Cong. Paduano, bilang abogado, dapat magsilbing magandang ehemplo si Atty. Angeles sa pagsunod sa batas.

Una nang sinuspinde si Angeles bilang abogado noong 2016 at 2023. –  Sa panulat ni Laica Cuevas mula sa ulat ni Geli Mendez (Patrol 30)

Iginiit ni Solicitor General Menardo Guevarra na International Criminal Court ang dapat magsumite ng resulta ng imbestigasyon nito kaugnay sa drug war campaign ng nakaraang administrasyon sa Philippine authorities para talakayin ang kaso.

Ayon kay SolGen. Guevarra, hindi pa tumutugon ang Pilipinas sa hiling na pakikipagtulungan ng ICC sa drug war ni dating Pangulong Rodrigo Duterte dahil hindi na obligado ang bansa na makipag-ugnayan sa international tribunal matapos kumalas sa pagiging  miyembro nito.

Nanindigan ang opisyal na hindi nito tutulungan ang ICC dahil may sariling imbestigasyon ang Pilipinas.

Iniimbestigahan ng ICC ang posibleng human rights violations sa ilalim ng war on drugs campaign ng Duterte administration, kung saan libu-libo ang sinasabing napatay ng mga pulis at mga hindi pa nakikilang suspek. –  Sa panulat ni Laica Cuevas

Dinepensahan ni Senator Ronald Dela Rosa si dating Pangulong Rodrigo Duterte kaugnay sa killing remarks nito laban sa 15 incumbent Senators.

Ayon sa Senador, walang maituturing na kaso kung wala namang complainant.

Wala rin aniya sa mga Senador na binirong papatayin ang naghain ng reklamo dahil wala namang pinangalanan sa mga ito.

Sinabi pa ni Senador Dela Rosa na kung talagang totoong papatay ang dating Pangulo, hindi ito mag-aanunsyo sa national TV.

Idinagdag pa ng Senador na kung siya ang PNP Chief, pagsasabihan niya ang CIDG na huwag nang magsampa ng reklamo, gayunman kung sa tingin ng CIDG ay tungkulin nilang gawin ito, hindi naman aniya ito haharangin. –  Sa panulat ni Laica Cuevas

Ipinanganak na laging handa si dating Pangulong Rodrigo Duterte kaya tiyak na haharapin nito kung may legal liability ang pahayag na patayin ang 15 incumbent Senators para makapasok ang kanyang ini-endorsong senatorial candidates sa ilalim ng PDP-Laban.

Ito ang inihayag ni Senator Robin Padilla na kilalang kaalyado ng dating Pangulo.

Humingi ng paumanhin ang Senador kung mayroon mang nasakatan sa sinabi ng dating Pangulo ngunit hindi talaga aniya ito bayolente, kundi mabait at relihiyoso sa likod ng pulitika.

Matatandaang si dating Pangulong Duterte ang nagbigay sa Senador ng executive clemency na nagbalik ng kanyang civil at political rights kaya nakatakbo sa pagka-senador.

Aminado ang Bureau of Internal Revenue (BIR) na hindi nila nababantayan kung nagbabayad ng tamang buwis ang Vloggers at Social Media Personalities na kumikita mula sa kanilang content sa digital platforms.

Sa ikalawang pagdinig ng House Tri-Committee hinggil sa isyu ng fake news at disinformation, sinabi ni Atty. Tobias Arcilla, kinatawan ng BIR, nakabase lamang sila sa voluntary declaration ng Social Media Personalities kung magkano ang kanilang kinikita sa paggawa ng content.

Ayon sa opisyal, sa ilalim ng tax laws, hindi nila maaaring basta na lamang imbestigahan ang taxpayers kaya ang tangi nilang ginagawa ay ang random audit investigation partikular sa mga indibidwal na itinuturing na “High-risk.”

Paliwanag pa ni Arcilla, sumasailalim sa cross-checking ang mga idinedeklarang vloggers mula sa foreign tax jurisdiction kung saan mayroon silang umiiral na treaties o kasunduan.

Kasunod nito, ipinasusumite ni acting Chairman at Antipolo Rep. Romeo Acop sa BIR ang datos kung ilang Social Media Influencers na ang nasingil ng buwis. – Sa panulat ni Laica Cuevas mula sa ulat ni Geli Mendez (Patrol 30)

Naghain ng petisyon sa Korte Suprema ang grupo ng mga Abugado mula sa Mindanao para hilingin na maglabas ng temporary restraining order laban sa pagsasagawa ng impeachment trial kay Vice President Sara Duterte.

Sa inihaing Petition for Certiorari and Prohibition sa pangunguna ni Atty. Israeli Torreon at dating LTFRB chair Atty. Martin Delgra III, iginiit ng petitioners na in-isyu ang articles of impeachment ng may grave abuse of discretion.

Pinroseso anila ang reklamo ng walang committee evaluation at may depekto sa verification process.

Ayon kay Atty. Torreon, dapat alam ng mga kongresista ang alegasyon at napag-aralan itong mabuti, ngunit matatandaang blangko ang mga ito na impeachment pala ang tatalakayin sa caucus sa kamara.

Hiniling din ng petitioners sa kataas-taasang hukuman na ideklarang null and void ang articles of impeachment at atasan ang Senado na huwag kilalanin ang sinasabing invalid na impeachment complaint.

Nabatid na kabilang sa iba pang naghain ng petisyon sina Davao City Councilor Luna Maria Dominique Acosta, Bai Jundra Cassandra Dominique Advincula, at Lord Byron Cristobal. –  Sa panulat ni Laica Cuevas

Umabot na sa mahigit 1,000 magsasaka ang naapektuhan ng shearline at iba pang weather disturbances sa bansa.

Batay sa ulat ng Department of Agriculture-DRRM Operation Center, kabilang sa mga naapektuhang lugar ang Mimaropa at ilang lugar sa Eastern Visayas region.

Pumalo naman sa 17.74 million pesos ang halaga ng napinsala sa agrikultura, na kinabibilangan ng palay; kamoteng kahoy; high-value crops; livestock at poultry.

Nasa 452 metrikong toneladang agriculture products naman ang hindi na mapapakinabangan.

Tiniyak naman ng D.A., na handa silang tumulong sa mga apektadong magsasaka. –  Sa panulat ni John Riz Calata