NATIONAL NEWS

Pabor ang pito sa bawat sampung Pilipino na ipagpatuloy at palawakin pa ang ayuda para sa kapos ang kita o AKAP program ng administrasyong Marcos.

Ito ay batay sa resulta ng tugon ng masa nationwide survey ng OCTA Research.

Sa isinagawang face-to-face interview mula January 25 hanggang 31, 2025 sa 1,200 respondents, 69% ang nagsabi na sila ay pabor na ipagpatuloy at paramihin pa ang mga benepisyaryo ng AKAP, isang financial aid program ng pamahalaan na naglalayong tulungan ang mga pamilyang kulang ang kita para matustusan ang pang-araw-araw na pangangailangan.

Kaugnay nito, 79% naman ng mga pilipino ay alam ang akap: 88% mula sa visayas, 85% sa Mindanao, at 81% sa Metro Manila, isang indikasyon na malaking bahagi ng populasyon ang nakaka-alam sa nasabing inisyatiba.

Ang pagpapalawig ng AKAP ay suportado ng lahat ng socio-economic classes na naitala sa 69%, patunay na kinikilala ang programa anuman ang estado sa buhay. –  Sa panulat ni John Riz Calata

Sinagot ng Malakanyang ang pahayag ni dating Pangulong Rodrigo Duterte na papunta na sa pagiging diktadurya ang administrasyon ni Pangulong Ferdinand Marcos Jr.

Iginiit ni Executive Secretary Lucas Bersamin na itinuturing nilang walang batayan at katawa-tawa ang pahayag ni Duterte na hindi rin naman pinapansin ng mga Pilipino.

Ayon kay Sec. Bersamin, itinuturing ng palasyo na kathang-isip lamang ang mga pahayag ng dating pangulo na isang kwento mula sa isang taong sanay sa kasinungalingan at paggawa ng mga panloloko.

Aniya, ang mga paratang ng dating presidente ay isa na namang ‘budol’ mula sa ‘one-man fake-news factory’ o isang-taong pabrika ng pekeng balita.

Tiniyak ng Kalihim na hindi babalik ang administrasyon sa mapanupil na pamamahala ng nakaraang gobyerno, kung saan ipinakulong ang mga kritiko, gamit ang gawa-gawang kaso at kung saan tuwang-tuwang naglalabas ng utos na pumatay na isinagawa nang walang pag-aalinlangan.

Dagdag pa ni Sec. Bersamin, ang dating chief executive rin ang hindi gumalang sa karapatan ng mamamayan, na sa isang salita lang ay maaaring may mawalan ng buhay, kalayaan, at ari-arian nang walang due process. –  Sa panulat ni John Riz Calata

Kinatigan ni Senate Committee on Ways and Means Chairman Sherwin Gatchalian ang pasya ni Senate President Francis “Chiz” Escudero na posibleng pagkatapos pa ng SONA ni Pangulong Ferdinand Marcos Jr. sa Hulyo matatalakay ang impeachment ni Vice President Sara Duterte.

Ito’y matapos sumulat ni Senate Minority Leader Aquilino “Koko” Pimentel kay Senate President Escudero na humihiling ng agarang aksyon para sa impeachment ni VP Sara.

Gayunman, sinabi ni Senador Gatchalian sa DWIZ na handa siyang dumalo sa anumang pagpupulong kaugnay sa impeachment sakali mang magpatawag ang Senado. –  Sa panulat ni John Riz Calata

“It takes two to tango”

Iyan ang mga katagang binigyang-diin ni Professor Antonio Calipjo Go, isang retired Private School Administrator, kaugnay sa pagkakaroon ng “ghost students” na benepisyaryo ng senior high school voucher program.

Sinabi ni Professor Go sa DWIZ na naniniwala siya na posibleng kasabwat ang Department of Education sa nasabing iregularidad.

Nabatid na sinasabing dawit ang 12 paaralan mula sa iba’t ibang lugar sa bansa sa pagkakaroon ng ghost students” na benepisyaryo ng SHS voucher program.

Iginiit din ni Professor Go na tila ipinapakita ng DEPED na wala itong accountability sa naturang alegasyon. –  Sa panulat ni John Riz Calata

Tinanggal na ng Financial Action Task Force (FATF) ang Pilipinas sa tinatawag na “grey list” o listahan ng mga bansang nasa ilalim ng “increased monitoring” ng mga pinansyal na transaksyon.

Dahil dito, binabati ng FATF Plenary ang Pilipinas sa pagiging progresibo nito sa pagtugon sa anti-money laundering, pagkontra sa pagpopondo sa terorismo, at pagkontra sa pagtaas ng financing deficiencies.

Ang FATF ay isang Paris-based organization na nagre-review ng mga hakbang na ginagawa ng higit 200 bansa at jurisdiction para pigilan ang money laundering at terrorism financing.  –  Sa panulat ni Roma Molina

Iginiit ni Senate President Chiz Escudero na hindi siya interesado sa pwesto ng pagka-bise presidente kung sakaling ma-impeach at ma-convict sa paglilitis si Vice President Sara Duterte.

Ayon kay SP Escudero, isa lamang siya sa mga maaaring mapili bilang bise presidente ni Pangulong Ferdinand Marcos Jr. na binubuo ng mga lagpas 40-anyos ang edad sa dalawang kapulungan ng Kongreso.

Habang ikatlo aniya sa line of succession ang Senate President, hindi awtomatikong siya na ang papalit kung sakaling mabakante ang pwesto ng bise presidente.

Samantala, binigyang-diin ng Senate President na hindi siya magpapadala sa pressure mula sa mga nagpapabilis at nagpapa-delay ng impeachment trial ni VP Sara. –  Sa panulat ni Roma Molina

Nagpasaring muli si dating pangulong Rodrigo Duterte kay Pangulong Ferdinand Marcos Junior.

Sa Cebu indignation rally, sinabi ng dating pangulo na ‘veering towards a dictatorship’ ang kasalukuyang administrasyon.

Binigyan-diin ni dating Pangulong Duterte na hindi niya nakikitang bababa sa pwesto si Pangulong Marcos sa pagtatapas ng termino nito.

Gaya ng ginawa ni dating Pangulong Ferdinand Marcos Senior, nakikita anya niyang magdedeklara rin  ng martial law si PBBM.

Kasunod nito nanawagan si Duterte sa Philippine National Police na gumawa anya ng moral desisyon at huwag lamang basta sumunod sa mga ipinag-uutos ng mga nakatataas. –  Sa panulat ni Kat Gonzales

Kinumpirma ng Malacañang na pirmado na ni Pangulong Ferdinand Marcos Jr. ang panukalang batas na nagpapaliban sa kauna-unahang parliamentary elections sa Bangsamoro Autonomous Region in Muslim Mindanao.

Ayon kay Executive Secretary Lucas Bersamin, nilagadaan na ni Pangulong Marcos ang Republic Act 12123, na nagtatakda ng bagong schedule ng parliamentary polls mula May 12, 2025, sa October 13, 2025.

Sa ilalim ng bagong batas, isasabay ang barmm elections sa national elections sa 2028 at magpapatuloy tuwing ikatlong taon.

Nakasaad din sa batas na ang COMELEC, sa pamamagitan ng Bangsamoro Electoral Office, ang magpapatupad ng mga patakaran at regulasyon para sa halalan alinsunod sa national laws, bangsamoro organic law, at Bangsamoro Electoral Code.

Samantala, magsisimula naman ang official term ng BARMM Officials sa October 30, 2025, ganap na alas-dose ng tanghali.

Agad ding magkakabisa ang batas matapos itong mailathala sa Official Gazette o sa isang pahayagang may general circulation. –  Sa panulat ni Laica Cuevas

Iginiit ni Transportation Secretary Vince Dizon na dapat pa ring ituloy ang implementasyon ng PUV Modernization Program, sa kabila ng pagkontra dito ng ilang transport groups.

Ayon kay Secretary Dizon, handa siyang pag-aralang mabuti ang programa, pero malinaw na walang ibang paraan kundi yakapin ang modernisasyon para umusad at magkaroon ng improvement ang public transportation.

Naniniwala ang Kalihim na may valid concern o inaalala rin ang mga kontra sa programa, at kailangan lang kausapin ang mga ito at maipaintindi ang layunin ng PUV Modernization para maresolba ang kanilang mga problema.

Una nang sinabi ni Pangulong Ferdinand Marcos, Jr. na dapat nang ipatupad ang puv modernization program matapos maantala ng pitong beses dahil sa pagkontra ng ilang grupo at organisasyon. –  Sa panulat ni Laica Cuevas

Pinawi ni Transportation Secretary Vince Dizon ang pangamba ng mga commuter kaugnay sa planong tanggalin ang Edsa Busway.

Ayon sa Kalihim, hindi nila aalisin ang Edsa Carousel, kundi mas pagagandahin pa para sa mas mabilis na byahe ng mga mananakay.

Dahil dito, makikipagtulungan aniya ang DOTR sa Metropolitan Manila Development Authority at Department of Public Works and Highways para mapabuti pa ang sistema nito.

Matatandaang sinabi ni MMDA Chairman Romando Artes na pinag-aaralan nilang alisin ang Edsa Busway kapag tumaas na ang kapasidad ng MRT-3, bagay na umani ng negatibong reaksyon mula sa publiko na umaasa sa busway bilang pangunahing transportasyon. –  Sa panulat ni Laica Cuevas