NATIONAL NEWS

Posibleng talakayin ng korte suprema ngayong araw ang petisyon ni Bise Presidente Sara Duterte na humiling na ipawalang-bisa ang mga impeachment complaint na inihain laban sa kanya ng House of Representatives.

Na-raffle nuong Lunes, Pebrero a-18 ang nasabing petisyon ni VP Sara.

Kaugnay nito, inaasahan ding tatalakayin sa full court session ng Supreme Court ang petisyon na inihain naman ng mga abogado at residente ng mindanao laban sa impeachment.

Dahil dito, posibleng hilingin ng SC sa dalawang kapulungan na magkomento kaugnay sa dalawang petisyon. –  Sa panulat ni Kat Gonzales

Nananatili pa rin sa Pilipinas ang ilang mga mastermind o Philippine Offshore Gaming Operator bosses.

Ito mismo ang kinumpirma ni Senador Sherwin Gatchalian sa kabila ng ipinatupad na total ban sa POGO.

Sa panayam ng DWIZ, sinabi ni Senador Gatchalian, marami pa ring mga POGO bosses ang nandito pa sa Pilipinas at ayaw bumalik sa China dahil mas mabigat parusa ang kanilang kakaharapin.

Umapela naman ang Senador sa mga lokal na pamahalaan, mga barangay at sa mga pribadong sektor na tulungan ang pamahalaan na tuluyang masawata ang mga patagong operasyon ng POGO sa bansa.

Kinidnap ang isang Senior High School Student ng mga taong may kinalaman sa ipinagbawal na Philippine Offshore Gaming Operator.

Ito’y batay sa natanggap na impormasyon ni Senator Sherwin Gatchalian pero nakikipag-ugnayan na sa mga imbestigador ang isang international school matapos na madiskubre ang pagkawala ng nasabing senior high school student kasama ng driver.

Ayon sa Senador, nakababahala na ang nagpapatuloy na kidnapping incidents na may kinalaman sa mga POGO.

Sa kabila ng pagbabawal ng POGO sa bansa, nasa bansa pa rin ang ilang boss ng mga POGO, naglipana pa rin ang kanilang mga galamay na gumagawa ng krimen kung saan pinasok na rin nila ang pangingidnap ng mga estudyante.

Dahil dito, nanawagan ang Senador sa law enforcement agencies na gamitin ang buong pwersa ng mga batas laban sa mga naiiwan pang pwersa at galamay ng mga ilegal na POGO upang matigil ang kanilang mga krimen. –  mula sa ulat ni Cely Ortega-Bueno (Patrol 19)

 Pinayuhan ni Senate President Chiz Escudero ang mga tatayong prosecution at defense panel sa impeachment trial laban kay Vice President Sara Duterte.

 Ayon kay Senate President Escudero, dapat na pag-aralang mabuti ng prosecution at defense panel ang kanilang kaso at tiyaking handa sila sa pagsisimula ng impeachment trial kay VP Sara.

 Sa halip na mag-aksaya anya ng panahon ang magkabilang panig sa iba’t ibang isyu, dapat pagtuunan din ng pansin ang paghahanda sa kanilang mga isusumiteng pleadings sa impeachment court.

 Babala pa ni Senator Escudero, na hindi nila ikukunsidera ang anumang hiling na palawigin ang mga deadline sa pagsusumite ng mga kinakailangang dokumento sa oras na magsimula ang impeachment process.

 Inaasahan din ng Senado na sa loob ng mahabang panahon na hindi pa sinisimulan ang proseso ay dapat nakapaghanda na ang magkabilang panig.

 Muling nanindigan si Escudero na hindi sila makapagko-convene bilang impeachment court hangga’t walang sesyon ang kongreso. –  mula sa ualt ni Cely Ortega-Bueno (Patrol 19)

 Namumuro nanaman sa susunod na buwan ang taas-singil sa kuryente.

 Ito’y matapos aprubahan ng Energy Regulatory Commission ang dagdag-singil upang pondohan ang mga planta para sa renawable energy gaya ng solar wind at hyroplants.

 Batay sa anunsyo ng Meralco, magiging 11 centavos kada kilowatt per hour ang singil sa kuryente sa Marso o katumbas ng pitong pisong dagdag sa bill sa mga komukonsumo ng 200 kilowatt per hour sa isang buwan.

 Sinabi ng electric company, na taga-singil lamang sila ng fit all charges at hindi sa kanila napupunta kundi inireremit sa national transmission corporation.

 Maliban sa total adjustment, pinawi ng Meralco ang pangamba ng mga konsyumer dahil wala nang naka-ambang dagdag-singil sa kuryente.

Mariing itinanggi ng Department of Health ang kumakalat na bagong corona virus mula sa China.

Ayon sa kagawaran, ito ay isang uri ng false alarm, na layong manakot o mangamba ang mga Pilipino.

Wala naman anyang ulat ang World Health Organization hinggil sa sinasabing HKU5-CoV-2, na bagong corona virus variant.

Idinagdag pa ng DOH, na nakabase sila sa inilalabas na impormasyon ng who kaya’t kailangang suriing maigi ang mga nakikita sa mga social media site.

Iginiit ni Senador Sherwin Gatchalian na wala nang nag-ooperate na Philippine Offshore Gaming Operator sa Pilipinas.

Sa panayam ng DWIZ, sinabi ni Senador Gatchalian, na tanging sindikato na lamang ang naiwan, na gumagawa ng scamming activities sa bansa.

Gayundin ang sinasabing pandurukot, pangingidnap at pagto-torture ng mga chinese sa kapwa chinese nationals.

Dahil dito, nababahala ang senador sa ginagawang krimen ng mga chinese dahil posibleng targetin din nito ang mga pilipino.

Umapela naman si senador gatchalian sa presidential anti-organized crime commission at philippine national police na huwag tantanan ang mga chinese nationals na gumagawa ng krimen sa bansa.