NATIONAL NEWS

Gustong bumalik sa kapangyarihan ng mga Duterte kaya sinisiraan nila si Pang. Ferdinand Marcos Jr. at kanyang administrasyon.

Ito ang reaksyon ng Palasyo sa akusasyon ng kampo ni Duterte na sinasadya ng administrasyon na ma-impeach ang bise presidente upang hindi ito makatakbo sa 2028 presidential elections.

Sinabi ni PCO Undersecretary at Palace Press Officer Atty. Claire Castro na sa umpisa pa lang ay malinaw na ang pahayag ni pang. Ferdinand Marcos Jr. na kontra ito sa impeachment.

Nangyari aniya ang pag-impeach ng kamara kay VP Sara dahil sa separation of powers.

Dagdag ng opisyal, walang gagawin si Pang. Marcos matuloy man o hindi ang impeachment trial kay VP Sara. –  Sa panulat ni John Riz Calata mula sa ulat ni Gilbert Perdez (Patrol 13)

 Mariing itinanggi ng Malakanyang ang alegasyon ni dating Pangulong Rodrigo Duterte na ninakaw at ibinenta na ni Pangulong Ferdinand Marcos Jr. ang gold reserves ng bansa.

Sa press briefing sa Malacañang, binigyang-diin ni Presidential Communications Office Undersecretary at Palace Press Officer Atty. Claire Castro na ang Bangko Sentral ng Pilipinas ang tanging nangangalaga at nangangasiwa sa gold reserves ng Pilipinas, at kailanman ay hindi ito pinakikialaman ng pangulo.

Tanong pa ni Usec. Castro, wala bang nagpapayo kay dating Pangulong Duterte na magsasabing regular activity ng bsp ang pagbibenta ng gold reserves.

Batay na rin aniya sa pahayag ng BSP, bahagi ng kanilang mandato na hindi dapat humawak ng sobra-sobrang ginto kaya may pagkakataon na dapat itong ibenta kung mataas ang presyo nito.

Wala namang plano ang palasyo na kasuhan si dating Pangulong Duterte kundi maglalabas lamang ng kontra-pahayag magpapakalat ng mga disinformation ang dating pangulo at mga kaalyado nito. – Sa panulat ni John Riz Calata

Agad pinalagan ng bagong talagang Undersecretary ng Presidential Communication Office at Palace Press Officer na si Atty. Claire Castro ang banat ni dating pangulong Rodrigo Duterte laban kay Pangulong Ferdinand Marcos Jr. na nagsabing patungo na sa diktadurya ang kasalukuyang administrasyon.

Kinwestyon ni Usec. Castro si Duterte kung ano ang ebidensya at papaano nito mapapatunayan ang mga binitawang alegasyon.

Ipinunto ng bagong talagang Undersecretary na noong piskal pa lamang si Duterte ay inamin na nito na siya ay eksperto sa pang-iintriga at pagtatanim ng ebidensya, na napatunayan aniya sa panahon ni dating Senator Leila De Lima. –  Sa panulat ni John Riz Calata

 Pumalag ang Young Guns ng Kamara sa banat ni dating pangulong rodrigo duterte laban kay Pangulong Ferdinand Marcos Jr.

Ayon kay Lanao Del Sur 1st District Rep. Zia Alonto Adiong, malayo sa katotohanan ang paratang ni Duterte na papunta na sa diktadurya ang adminstrasyong Marcos.

Binigyang-diin ng mambabatas na wala siyang nakikitang katangian ng isang diktador kay pangulong marcos dahil naging diplomatiko ito at hindi mapaghiganti sa kabila ng mga pag-atake.

Samantala, sinang-ayunan naman ni La Union 1st District Rep. Paolo Ortega ang pahayag ni executive secretary lucas bersamin na isang “one-man fake news factory” ang dating pangulo.

Hirit ni Cong. Ortega na kapag humingi na ng pananagutan ang sinuman sa mga ipinapakalat na maling impormasyon ng mga duterte ay magdadahilan ang mga ito na joke o biro lang ang mga binitawang pahayag.

Nabatid na muling nagpasaring si duterte laban kay Pangulong Marcos sa ginanap na campaign rally sa Mandaue City, Cebu at sinabing patungo na sa diktadurya ang administrasyong Marcos. – Sa panulat ni John Riz Calata

Ibinasura na ng Sandiganbayan ang isa pang civil case laban kina dating Pangulong Ferdinand Marcos Sr. at dating First Lady Imelda Marcos.

Ito ayon sa 12 pahinang resolusyong inilabas ng second division, ay dahil bigong hatulan ng mga state prosecutor “For an unreasonable length of time”  ang mga Marcos.

Nabatid na nasangkot ang mag-asawang Marcos sa kasong isinampa laban kay Fernando Timbol dahil sa mga sasakyan at appliances na binili nito na hindi pasok sa kanyang sahod.

Sinabi naman ng state prosecutors na hindi na tututulan ng Presidential Commission on Good Government ang pagsasara sa kaso dahil na-recover na ng pamahalaan ang mga ari-ariang kabilang sa nasabing usapin.

Gayunman, binigyang-diin ng sandiganbayan na may mga nakabinbin pang isyu dahil nakasaad sa original complaint ang actual, moral, temperate, nominal at exemplary damages. –  Sa panualt ni John Riz Calata

Inamin ng Philipiine National Police-Criminal Investigation and Detection Group-National Capital Region na hindi pa maituturing na POGO-free ang bansa.

Ayon kay PNP-CIDG-NCR Chief Col. Marlon Quimno, patuloy pa rin ang guerilla-style operations ng mga pogo sa pilipinas, partikular na sa ncr, kung saan mayroon itong tig-lalabing-lima hanggang tig-bebenteng empleyado.

Dahil dito, sinabi ni Col. Quimno, bumuo na sila ng tracker team, katuwang ang presidential Anti-Organized Crime Commission, na layong tugisin at arestuhin ang mga sangkot sa guerilla-style POGO operations sa Metro Manila.

Matatandaang noong nakaraang linggo, naaresto ang 18 chinese nationals at dalawang Pilipino dahil sa pagkakasangkot sa operasyon ng illegal Chinese-run POGO sa Parañaque City. –  Sa panulat ni John Riz Calata

Idineklarang National Cultural Treasure ng  National Commission for Culture and the Arts ang tatlong simbahan sa lalawigan ng Rizal.

Ang tatlong simbahan na ito ay ang  Sta. Ursula Parish sa Binangonan; Diocesan Shrine and Parish of San Jose sa Baras, at ang St. Jerome Parish Church sa Morong.

Nagmula pa ang tatlong simbahan nuong panahon ng Espanyol.

Nabatid na iginagawad ang NCT sa mga istruktura sa Pilipinas na may pambihirang ambag sa kasaysayan; kultura at sining sa bansa. –  Sa panulat ni Kat Gonzales

Umapela sa Senado ang dalawang lider ng Kamara na huwag nang idamay si Pangulong Ferdinand Marcos Jr. Sa impeachment ni Vice President Sara Duterte at kagyat na lang mag-convene bilang Impeachment Court.

Ginawa nina house assistant majority leaders Zia Alonto Adiong at ernix Dionisio Jr. ang apela bilang reaksyon sa sinabi ni Senate President  Francis “Chiz” Escudero na kailangan pang magpatawag ng pangulo ng special session ng kongreso para maaksyunan ng senado ang impeachment at umusad ang paglilitis.

Kasunod na rin ito ng apela ng tatlong miyembro ng Makabayan Bloc sa kamara na magpatawag na ng special session si Pangulong Marcos.

Kapwa iginiit din nina Reps Adiong, Dionisio at house Deputy Majority Leader Paolo Ortega v na hindi na maaaring hintayin ang 20th Congress na magbubukas sa hulyo 28 para simulan ang paglilitis kay Vice President Sara Duterte dahil nais ng mga Pilipino na masimulan na ito.

Pangamba ng mga kongresista na maaaring mahaluan ng kulay-pulitika kung ang presidente pa ang magpapatawag ng special session kaugnay ng impeachment.

Sinusugan din ni Cong. Adiong ang pahayag ni dating Senate President Franklin Drilon na kailangang ibasura ng korte suprema ang tatlong petisyong nakahain sa kataas-taasang hukuman dahil eksklusibo sa kongeso ang kapangyarihan para sa impeachment. –  Sa panulat ni Kat Gonzales

Pinagsusumite ni bagong Transportation Secretary Vince Dizon ng courtesy resignation ang lahat ng undersecretary,  assistant secretary at director ng departamento.

Ito’y kasunod ng pag-upo ni Secretary Dizon sa posisyon kapalit ni dating DOTR Secretary Jaime Bautista.

Sa isang memorandum na pirmado ng Kalihim, nakasaad dito na kinakailangan ng mga nasabing opisyal na magpasa ng kanilang resignation sa Pebrero 26.

Gayunman, nakalagay din sa memo na hangga’t wala pang aksyon na ginagawa ang DOTR Chief, lahat ng undersecretaries, assistant secretaries at directors ay patuloy na magtatrabaho sa departamento at gagampanan ang kanilang karaniwang mga tungkulin at responsibilidad. –  Sa panulat ni Kat Gonzales