NATIONAL NEWS

 Mahigit isanlibong senior citizens at centenarians sa buong bansa ang nakatanggap ng cash gift sa ilalim ng Expanded Centenarians Act.

Pinangunahan mismo ni Pangulong Ferdinand Marcos, Jr. ang ceremonial distribution sa Palasyo, kung saan 14 na benepisyaryo ang nakatanggap, kabilang ang tatlong centenarian o senior citizen na 100-years old na.

Sa ilalim ng batas, makatatanggap na rin ng cash gift na 10,000 pesos ang mga senior citizen na umabot sa edad na 80, 85, 90, at 95, habang mananatili sa 100,000 pesos ang cash gift sa mga senior na umabot ng 100-years old.

Kabilang sa qualification para maging benepisyaryo ay dapat Filipino citizen ang isang senior, at verified ng kanyang local Government Unit at Office for Senior Citizens Affairs (OSCA).

Kabilang naman sa mga pangunahing requirements ang kopya ng birth certificate o photocopy ng national id, 2 by 2 id picture, full body picture ng aplikante, at application form, na ipapasa sa OSCA o Local Social Welfare Development.

Ipinamahagi ang aabot sa 12.5-million pesos na halaga ng cash gift, pero target umano ng National Commission of Senior Citizens na makapamahagi ng 2.9 billion pesos na halaga ng cash gift ngayong taon sa 275,000 na mga benepisyaryo.  – Sa panulat ni Laica Cuevas mula sa ulat ni Gilbert Perdez (Patrol 13)

Tiniyak ni Senator Risa Hontiveros ang pagiging patas at objective sa paghatol sa impeachment case laban kay vice President Sara Duterte.

Sa kabila ito ng pag-amin na may namumuo na siyang opinyon o judgment sa matagal ng mga isyu at performance ni VP Sara.

Paliwanag ng senador, kung may namumuo man siyang judgement  laban sa Bise-Presidente, ito ay dahil sa mga nagdaang imbestigasyon sa mga isyu na pinagtalunan sa Senado kung saan ilan ay napasama sa grounds na nakapaloob sa  article of impeachment. –  Sa panulat ni Laica Cuevas mula sa ulat ni Cely Ortega-Bueno (Patrol 19)

Pagpapakita ng kapabayaan ng mga senador ang pagpapaliban sa impeachment trial kay Vice President Sara Duterte.

Ito ang inihayag ni Senator Risa Hontiveros makaraang igiit na tungkulin nilang magkasa ng impeachment trial sa lalong madaling panahon dahil mandato ito ng konstitusyon.

Sinang-ayunan ng Senador ang opinyon ng ilang Abogado  na pwede nang mag-convene ang Senado bilang Impeachment Court ngayon kahit nakabakasyon ang kongreso. – Sa panulat ni Laica Cuevas mula sa ulat ni Cely Ortega-Bueno (Patrol 19)

Iimbestigasyon na rin ng Senate Committee on Basic Education ang nadiskubreng ghost students sa Senior High School voucher program ng Department of Education.

Ayon kay Senator Sherwin Gatchalian, Chairman ng naturang kumite, kuntento at nasisiyahan siya sa ginagawang imbestigasyon ng DEPED sa naturang isyu alinsunod  sa utos ni Education Secretary Sonny Angara.

Pero bubusisiin nila sa Senado kung may eskwelahan nang nakasuhan o natanggalan ng lisensya o permit dahil sa pagkolekta ng bayad para sa ghost students.

Layunin ng imbestigasyon ang pag-amyenda sa batas ukol sa voucher program, na Government Assistance to Students in Private Education (GATSPE).

Mas hihigpitan ang patakaran sa akreditasyon ng mga private school dahil may mga eskwelahan na hindi inaasikaso ang kalidad ng edukasyon, nais lang na makakulekta ng bayad ng deped para sa Senior High schools. –  Sa ulat ni Cely Ortega-Bueno (Patrol 19)

Iginiit ni Health Secretary Ted Herbosa na hindi sagot ang bakuna kontra dengue outbreak.

Sa panayam ng DWIZ, ipinaliwanag ng Kalihim na prinoprotekhan lamang ng bakuna ang mga batang nagkaroon ng dengue.

Sa oras naman anya na maaprubahan ng Food and Drug Administration ang bakuna, ibibigay ito ng Department of Health sa mga doktor para iturok sa mga batang nangangailangan nito.

Sa ngayon, sinabi ni Sec. Herbosa na nag-plateau na ang kaso ng dengue sa Quezon City.

Patuloy namang pinapaalalahanan ng DOH ang publiko na agad na magpakonsulta sa eksperto sakaling makaranas ng sintomas ng nasabing sakit.

 Isa nang Impeachment Court ang Senado kahit sa panahon ng recess alinsunod sa mandato nito sa ilalim ng konstitusyon.

Bunsod nito, naniniwala ang isang miyembro ng House Prosecution Panel na hindi na kailangan na magpatawag ng special session ang pangulo para masimulan ng Senado ang impeachment trial ni Vice President Sara Duterte.

Sinabi ni San Juan Rep. Ysabel Maria Zamora na isa ring Abogado na malinaw din sa saligang batas na dapat agad na isagawa ang impeachment trial.

Kinatigan din ng kongresista ang desisyon ni Pangulong Ferdinand Marcos Jr. na hindi makikialam dahil binigyang-diin nito ang prinsipyo ng paghihiwalay ng kapangyarihan sa pagitan ng mga sangay ng pamahalaan.

Samantala, kinumpirma ni House Assistant Majority Leader Jil Bongalon ng Ako Bicol Party-List na hindi pa natatanggap ng kamara ang kopya ng petisyong isinampa ng kampo ng bise presidente upang kuwestyunin ang impeachment proceedings.

Kasabay ng pagtiyak na handa namang tumalima sa kamara sa nasabing kautusan ng kataas-taasang hukuman sa oras na matanggap na ito.

Welcome para sa kampo ni Vice President Sara Duterte ang pag-uutos ng Korte Suprema sa Kamara at Senado na magkomento sa petisyon ng bise Presidente laban sa impeachment complaint.

Ayon kay atty. Shiela Sison, Legal Counsel ni VP Sara, malugod nilang tinatanggap ang naging hakbang ng kataas-taasang hukuman.

Naniniwala anya sila na lubusang tutugunan ng sc ang mga legal issue na kanilang isinumite.

Mayroon lamang sampung araw ang dalawang kapulungan para magkomento. – Sa panulat

Pinangaralanan ni Chief Presidential Legal Counsel at dating Senate President Juan Ponce Enrile ang mga mambabatas na aralin mabuti ang mga naung impeachment trial sa nakalipas na mga taon.

Ayon sa opisyal, magsisilbi itong ‘guiding materials’ sa dalawang kapulungan para mapatibay ang kani-kanilang posisyon sa nakabinbin na impeachment trial ni Vice President Sara Duterte.

Kabilang anya rito ang trial kila dating Pangulong Joseph Estrada; dating Ombudsman Merceditas Gutierrez, at dating Chief Justice Renato Corona.

Iginiit ng dating Senate President na ang mga ito ay magsisilbing precedent kaya’t mabuting mapag-aralan upang magsilbing gabay sa magiging trial laban kay VP Sara.

Naniniwala rin si Enrile na makabubuti pa rin sa senado na pag-aralan ang mga nakalipas na trial kahit pa hindi maaaring pag-usapan sa publiko ang merito ng mga petisyong kumukuwestiyon sa impeachment complaint laban kay VP Sara.

Nabatid na ang Chief Presidential Legal Counsel ang  nagsilbing presiding judge nuong impeachment trial kay dating CJ Corona bilang siya ang senate president nang panahon na iyon. –  Sa panualt ni Kat Gonzales