NATIONAL NEWS

Nadismaya ang Malakanyang sa pahayag ni Vice President Sara Duterte na may karapatan ang publiko na magalit sa pamahalaan.

Ayon kay Press Officer at Presidential Communications Office Undersecretary Claire Castro, nakalulungkot na sa pangalawang pinakamataas na lider pa mismo ng bansa nanggaling ang tila panghihikayat na magalit laban sa pamahalaan.

Kinuwestiyon ni Usec. Castro kung bakit ngayon lang naglabas ng ganitong pahayag si VP Sara, gayong mas marami aniya ang kontrobersiyang hinarap ang adminstrasyon ng kanyang ama na si dating Pangulong Rodrigo Duterte.

Binigyang-diin ng PCO official na bilang pangalawang pangulo, mas mainam kung hihikayatin nito ang publiko na makipagtulungan sa gobyerno, sa halip na magtanim ng galit. —sa panulat ni John Riz Calata

Aminado ang Presidential Communications Office na mahalagang pag-aralan nang mabuti at maamyendahan ang batas hinggil sa sim card registration.

Sa press briefing sa Malacañang, sinabi ni Press Officer at PCO Usec. Claire Castro na maraming mga aspeto ang batas hinggil sa sim card ang hindi epektibo.

Ayon kay Usec. Castro, kabilang dito ang pagpaparehistro ng sim card online dahil kahit aniya sino ay pwedeng bumili ng kahit ilang sim cards kaya madali pa ring makapanloko at mahirap habulin ang mga scammer.

Dahil dito, iminungkahi ng PCO Official na gawing personal ang pagpaparehistro ng mga sim sa tanggapan ng pamahalaan.

Sa ganito aniyang paraan ay malalaman kung sino talaga ang may-ari ng sim card, kung sino ang hahabulin at papanagutin sakaling may ginawa itong panloloko gamit ang cellphone.—sa panulat ni John Riz Calata

Target simulan ng Senado ang impeachment trial laban kay vice President Sara Duterte sa July 30.

 Batay sa panukalang calendar na inilabas ng tanggapan ni Senate President Francis “Chiz” Escudero, sa  pagbabalik ng sesyon sa June 2  ipiprisinta ng mga prosecutor ang articles of impeachment at aaprubahan ang revised rules of procedure ng impeachment trial.

 Sa June 3 naman ay mag-co-convene na ang senado bilang Impeachment Court at panunumpain ang mga incumbent senator judges;

June 4 ay mag-i-isyu na ng summon kay Vp Sara; June 14 hanggang June 24 ang pagtanggap ng mga pleadings ng kampo ng Bise Presidente at ng prosekusyon; at sa June 24 hanggang July 25 naman itatakda ang pre-trial.

Sa July 28, ang pagbubukas ng unang regular session ng 20th Congress at SONA ni Pangulong Ferdinand Marcos Jr. dito ay papasok na ang labindalawang bagong senador.

Kaya kinabukasan, July 29, ay manunumpa ang mga bagong halal na senador na uupo bilang judge sa paglilitis.

Paliwanag ni SP Escudero, hinati na nila ang oras ng trial at session upang magampanan nila ang trabaho bilang legislative body, at maisabatas ang mga mahahalagang panukala, lalo na ang inaasahang pagtalakay sa pambansang budget. – Sa panulat ni John Riz Calata mula sa ulat ni Cely Ortega-Bueno (Patrol 19)

Inanunsyo ng PAGASA na ire-retiro na ang walong domestic names ng mga nagdaang bagyo nagdulot ng ‘destructive impact’ sa bansa nuong nakaraang taon.

Kabilang sa mga tatanggaling pangalan ang Aghon; Enteng; Julian; Kristine; Leon; Nika; Ofel; at Pepito.

Samantala, papalitan naman ang mga nasabing pangalan ng Amuyao; Edring; Josefa; Kidul; Lekep; Nanolay; Onos at Puwok, na gagamitin na simula sa January 1, 2028.

Matatandaang, ilang pangalan na rin ang pinagretiro ng weather bureau partikular na ang Yolanda, Goring, Pablo, Sendong at Egay. –  Sa panulat ni Alyssa Quevedo

 Ipino-promote ang Pilipinas sa South Korea bilang pangunahing retirement destination para sa Korean retirees.

Inilalatag ng Philippine Retirement Authority ngayon sa Korean retirees ang magandang klima, murang cost of living, mataas na kalidad ng healthcare, at magandang komunidad sa bansa.

Nagtungo ang mga opisyal ng PRA sa South Korea para sa naturang promotion.

Bukod dito, siniguro din ng PRA na i-promote ang mga benepisyo ng paninirahan ng Korean retirees sa Pilipinas.  –  Sa panulat ni Roma Molina

Aprubado na ng Regional Tripartite Wages and Productivity Board 4-A ang taas-sahod ng mga kasambahay sa Calabarzon, mula 750 pesos hanggang 1,750 pesos.

Ayon sa National Wages and Productivity Commission, inaprubahan ang wage hike noong Pebrero 10, na nagtatakda sa 6,750 pesos bilang bagong minimum wage rate ng mga kasambahay.

Dahil dito, ang mga kasambahay sa lungsod at first-class municipalities sa nasabing rehiyon ay may 750 pesos na umento sa sahod habang ang mga nasa ibang munisipalidad naman ay may dagdag na 1,750 pesos.

Saklaw ng dagdag-sahod ang mga kasambahay at sinumang nagsasagawa ng domestic work na “occupational basis.”

Epektibo na ang bagong wage order sa Marso 7. –  Sa panulat ni Roma Molina

 Tinutulan ng 47%  o halos lima sa bawat sampung Pilipino ang pagpapatalsik ng Kamara kay Vice President Sara Duterte.

Sa resulta ng non-commissioned survey ng Public Opinion Research firm na WR Numero, 33% lamang ng adult respondents ang sumuporta sa impeachment habang 20%  naman ang undecided.

Ayon kay WR Numero President at CEO Cleve Arguelles, mayorya ng kumontra sa impeachment ay mula sa Mindanao habang pinakamarami naman ang sumuporta dito mula sa Metro Manila.

Kaugnay nito, 43% din ng respondents ang hindi sigurado kung dapat i-convict o i-acquit ng Senado ang Pangalawang Pangulo, 34% ang pabor sa acquittal, habang 23% ang naniniwalang dapat ma-convict si VP Sara.

Ginawa ang survey simula February 10 hanggang 18, ilang araw matapos i-impeach ng Kamara ang Pangalawang Pangulo.

-  Sa panulatn i Laica Cuevas

May nakitang ‘grey area’ ang Malacañang sa terminong “forthwith” sa harap ng iba’t ibang interpretasyon na may kaugnayan sa impeachment laban kay Vice President Sara Duterte.

Ayon kay Palace Press Officer at PCO Undersecretary Claire Castro, iba’t ibang opinyon ang lumulutang dahil sa katagang “forthwith” na mababasa sa probisyon ng konstitusyon.

Wala aniyang kwestyon, na agad ikasa ang impeachment kung may session ngunit sa usapin kung dapat isagawa ang paglilitis sa Impeachment Court sa panahon ng recess, pumapasok ang grey area, kaya’t maaaring may iba’t ibang interpretasyon ukol sa argumento.

Giit ni Usec. Castro, walang sinasabi ang konstitusyon na kailangang magpatawag ng special session at pagulungin na ang impeachment trial. – Sa panulat ni Laica Cuevas mula sa ulat ni Cely Ortega-Bueno (Patrol 19)