NATIONAL NEWS

Umaray si Communications Undersecretary at Palace Press Officer Claire Castro sa mga ipinakakalat na larawan at video niya sa social media, na maituturing umanong “demolition job” laban sa kanya.

Sa press briefing sa Malacañang, naniniwala si Castro na pagtatangka ito mula sa mga kritiko ng administrasyon na nais siyang mapatalsik agad sa pwesto, kaya nagpapakalat ng mga kulang o maling impormasyon tungkol sa kanya.

Ang pahayag ni Castro ay kasunod ng muling paglutang sa social media ng kanyang video sa isang presinto sa maynila noong 2015 kung saan na-detine siya at kanyang asawa at secretary, matapos niyang ipagtanggol ang kanyang kliyente na ilegal na inaresto ng mga pulis.

Iginiit ni Castro na hindi eskandalo ang nangyari, at handang gawin ulit ang pagtatanggol sa kanyang kliyente, dahil malinaw na ginawa niya ilang yon para sa hustisya.

Nilinaw naman ni Castro na hindi niya kapatid si Act Teachers Party-List Rep. France Castro, matapos din lumutang sa social media ang pag-uugnay sa kanila.

Ayon sa Opisyal, hindi niya naman ikakahiya kung kamag-anak niya ang kongresista pero malinaw aniyang pakana ito ng mga kritiko, na basta lang siya i-uugnay sa kung sinong kaapelyido, para lang makagawa ng isyu laban sa kanya.—ulat mula kay Gilbert {Perdez (Patrol 13)

Iginiit ngayon ni Palace Press Officer at PCO Undersecretary Claire Castro na kataka-taka sa Palasyo kung bakit hanggang ngayon ay nananatiling mataas ang presyo ng bigas.

Ayon kay Atty. Castro, marami namang dumarating na bigas subalit hindi pa rin bumababa ang halaga nito.

Mismong ang Pangulo, sabi ni Castro, ay pinag-aaralan ito at dinedetermina kung saan nagkakaroon ng problema.

Pagtiyak ng PCO Official, hindi tatantanan at patuloy na tinututukan ng pamahalaan ang usapin sa bigas sa gitna ng pagnanais ng pangulo na maibaba ang presyo nito sa mga mamimili.

Matatandaang kamakailan ay nagpatawag ang pangulo ng pagpupulong ng implementing agencies ng Anti-Agricultural Economic Sabotage Council.  —ulat mula kay Gilbert {Perdez (Patrol 13)

Kinumpirma ng Presidential Anti-Organized Crime Commission nagpapatuloy pa rin ang operasyon ng mga iligal na POGO sa bansa.

Ayon kay PAOCC Spokesman Dr. Winston Casio, karamihan sa mga ito ay nasa Southern Metro Manila.

Sinabi ni Spokesman Casio na kanilang natukoy na ang mga natugis na nag-o-operate na POGO ay mga dating lisensiyadong POGO ngunit naging iligal dahil bigo ang mga itong itigil ang operasyon.

Dagdag pa ng PAOCC official na karamihan sa mga dayuhang POGO workers ay lulong na sa sugal at nagpupunta sa mga entertainment centers sa southern metro manila kung saan aalma ang mga ito kapag inilipat sa mga lugar na malayo sa kamaynilaan.

Kaugnay nito, sinabi ni Spokesman Casio na kalat na rin ang operasyon ng mga guerilla-styled pogo sa buong bansa, pati na rin sa Visayas at Mindanao.

Kaya naman kabilang na aniya ito sa kanilang mga tinututukan. – Sa panulat ni john riz Calata

Hinimok ng National Food Authority ang mga lokal na pamahalaan na bumili ng bigas sa pamamagitan ng Food Terminal Incorporated.

Ito ayon kay NFA Administrator Larry Lacson, ay upang makatulong sa pag-decongest ng mga warehouse upang makabili na ang pamahalaan ng sariwang palay, at maibenta ang abot-kayang bigas sa mga consumer.

Sinabi ni Administrator Lacson na kabilang sa mga rehiyon na puno ang mga warehouse ay ang regions 2, 3, at 4-B.

Gayunman, ayon kay Administrator Lacson, nagsisimula nang maglabas ng bigas sa Metro Manila.

Sa kasalukuyan, nasa pagitan ng P33-35 ang halaga ng NFA rice stocks na ibinebenta ng DA-FTI. - sa panulat ni John Riz Calata

Ikinabahala ng isa sa mga miyembro ng House prosecution panel ang pagkakaantala ng impeachment trial ni Vice President Sara Duterte.

Ito ay kasunod ng paglalabas ng timeline ni Senate President Francis “Chiz” Escudero kaugnay sa kung kailan sisimulan ang proseso ng nasabing impeachment trial.

Naniniwala si Manila 3rd District Representative Joel Chua na ang pagkaka-antala ng impeachment process ng pangalawang pangulo ay posibleng magdulot ng oportunidad para masira ang mga ebidensya at matakot ang mga testigo.

Binigyang-diin ng kongresista na nais ng mga House prosecutor na masimulan ang impeachment trial para mapanatili ang integridad ng mga ebidensya at testigo.

Iginiit din ni Cong. Chua na ang impeachment ay isang constitutional duty na hindi maaaring ipagpaliban dahil lamang sa personal na dahilan.

Gayunman, nilinaw ni Cong. Chua na nirerepeto pa rin niya ang desisyon ng lider ng Senado kaugnay sa nasabing isyu. – sa panulat ni John Riz Calata

Pinaikli ng Bangsamoro Autonomous Region in Muslim Mindanao government ang working hours ng Muslim officials at employees sa lahat ng ministry, tanggapan, at ahensya ng rehiyon.

Ito ayon sa BARMM Office of the Chief Minister, ay bilang pagbibigay-daan sa pagdaraos ng sagradong buwan ng Ramadan.

Alinsunod sa memorandum na inilabas ng BARMM-OCM, sa halip na  8 a.m. hanggang 5 p.m. ang oras ng trabaho ay pansamantala itong gagawin na 7:30 a.m. hanggang 3:30 p.m.

Nakasaad sa pahayag ng OCM, na makatutulong ang pagpapaikli sa working hours upang makadalo ang mga empleyadong Muslim sa religious practices.

Ang Ramadan ang pinakasagradong buwan sa Islam na isinasagawa sa buong mundo. - sa panulat ni John Riz Calata

Naitala ng Department of Health sa rehiyon ng CALABARZON ang pinakamaraming kaso ng dengue sa bansa ngayong taon.

Batay sa datos ng DOH, umabot na sa halos 10,800 ang dengue cases sa CALABARZON hanggang nitong February 22.

Sumunod sa mga rehiyong may pinakamaraming kaso ng dengue ang National Capital Region na may mahigit 9,000, at Central Luzon na nasa mahigit 8,000 ang kaso ng nasabing sakit.

Kaugnay nito, pumalo na sa mahigit 52,000 ang dengue cases sa buong bansa ngayong taon, 64% na mas mataas kumpara sa kaparehong panahon noong 2024. - sa panulat ni John Riz Calata

Ikinaalarma ng Malacañang ang pagkakaresto ng National Bureau of Investigation sa dalawang Chinese at tatlong Pilipino na hinihinalang nang-eespiya sa Palasyo.

Sinabi ni Palace Press Officer Undersecretary Claire Castro, na kailangan nang magpatupad ng mas mahigpit na seguridad sa malacañang at kay Pangulong Ferdinand Marcos Junior para matiyak ang kaligtasan ng Palasyo at Presidente.

Tiniyak ni Castro na paiigtingin din ng mga otoridad ang mga hakbang para masugpo ang mga sinasabi at napagbibintangang espiya.

Pag-aaralan naman anya ni Pangulong Marcos kung aaprubahan o ive-veto ang panukalang paggawad ng Filipino citizenship sa chinese businessman na si Li Duan Wang, na ini-uugnay sa mga Philippine Offshore Gaming Operations.

Sa ngayon, hinihintay pa ng palasyo na maisumite ang enrolled bill na inaprubahan ng Kamara at Senado para gawaran ng citizenship ang nasabing Chinese.—ulat mula kay Gilbert {Perdez (Patrol 13)

 Binigyang diin ng ilang kongresista, na dapat ay mga merito at hindi survey ang maging basehan hinggil sa impeachment trial laban kay Vice President Sara Duterte.

Kasunod ito ng inilabas ng survey firm na WR Numero kung saan 47% ng kanilang mga respondent ay tutol sa proseso ng paglilitis sa Bise Presidente.

Ayon kay House Assistant Majority Leader Zia Alonto Adiong, kinikilala nila ang resulta ng survey lalo na’t mayroon ding mga naunang survey na pabor naman sa impeachment.

Bagamat sumasalamin aniya ang mga survey sa sentimyento ng publiko, magkakatalo pa rin ito sa mga ebidensyang ilalatag ng House Prosecution Panel kapag nagsimula na ang paglilitis.

Dagdag pa ng mambabatas, maraming Pilipino ang interesadong malaman ang mga nilabag, alegasyon, at katotohanan batay sa mga nakuhang ebidensya.—ulat mula kay Geli Mendez (Patrol 30)

Umaasa ang Kamara na mas mapapadali na ang proseso ng impeachment trial laban kay vice President Sara Duterte.

Kasunod ito ng ipinalabas na direktiba ni Senate President Francis Chiz Escudero, na bumuo na ng administrative support bilang paghahanda sa paglilitis.

Ayon kay House Deputy Majority Leader at Ako-Bicol Partylist Rep. Jil Bongalon, posibleng mapaaga ang pagko-convene ng Senado bilang impeachment court.

Indikasyon aniya ito na nakikita ng Senado ang pangangailangan na masimulan na ang impeachment trial sa ilalim ng saligang batas.

Sa kabila nito, binigyang diin ni Cong. Bongalon, ang kahandaan ng House Prosecution Panel na idepensa ang napagtibay na impeachment complaint mula sa mga reklamo ng ibat-ibang grupo laban sa Bise Presidente.