NATIONAL NEWS

Mayorya ng mga Pilipino ang boboto sa mga kandidatong nagsusulong para sa job creation dahil sa paniniwalang solusyon ito sa paglutas ng mga problema sa ekonomiya ng bansa.

Batay sa resulta ng survey ng Social Weather Stations, 89% ng mga Pilipino ang boboto sa mga kandidatong layong pataasin ang mga oportunidad sa trabaho habang 88% naman ang susuporta sa mga nagsusulong ng mga karapatan sa paggawa at kapakanan ng mga Overseas Filipino Workers.

Ayon kay Stratbase Group President Dindo Manhit, mahalaga ang paglikha ng mga trabaho dahil binibigyan nito ng kapangyarihan ang mga Pilipino na maka-ahon sa kahirapan at kagutuman sa pamamagitan ng pagbibigay ng matatag na kita; purchasing power at economic security.

Isinagawa ang survey sa 1,8000 respondents sa buong bansa mula Pebrero 15 hanggang 19 at kinomisyon ng Stratbase group. —sa panulat ni Kat Gonzales

Pinangangambahan ni Senator Nancy Binay na aksaya lamang sa pera at oras para sa mga graduating senators katulad niya ang impeachment trial ni Vice President Sara Duterte.

Ayon sa Senador, hindi pa sila nagkakaroon ng caucus ukol dito at inaasahan niyang maisagawa ito upang mas maging malinaw ang mangyayari sa naturang impeachment trial.  —sa panulat ni Roma Molina

Sisimulan ng Department of Public Works and Highways ang rehabilitasyon ng Edsa sa pamamagitan ng pagsasara sa Edsa Bus Lane.

Ayon kay DPWH National capital Region Director Lorie Malaluan, nakikipag-ugnayan na sila sa Department of Transportation at Metropolitan Manila Development Authority kaugnay sa nasabing usapin.

Sinabi ni Dir. Malaluan, na batay sa napagkasunduan nila ng MMDA, buong araw isasagawa ang rehabilitasyon kaya buong araw ring isasara ang bus lane.

Pinag-aaralan na rin anila na gawing shared lane ang Edsa bus way habang isinasagawa ang rehabilitasyon ng nasabing pangunahing kalsada.

Nauna nang sinabi ng MMDA na target nilang masimulan ang pagsasaayos ng Edsa busway ngayong buwan. —sa panulat ni John Riz Calata

Binawi ng Commission on Elections ang kautusan kung saan kailangang mag-register ng mga survey firm upang makapagsagawa ng mga survey.

Sa panayam ng DWIZ Sinabi ni COMELEC Chairman George Erwin Garcia na ang nasabing kautusan na nakapaloob sa inilabas na Resolution no. 11117 ay maaaring magdulot ng paglabag sa konstitusyon.

Sa halip na sapilitan ay ginawa na lamang na boluntaryo ang pagpaparehistro para sa mga survey firm.

Ayon kay Chairman Garcia, makatutulong ang nasabing resolusyon upang mawala ang mga survey entities na nagpapabayad upang paboran ang isang kandidato.—sa panulat ni John Riz Calata

Inaasahang wala o isang bagyo ang papasok sa Philippine Area of Responsibility ngayong buwan.

Ito ayon sa PAGASA ay batay sa monthly climatology track ng ahensya.

Sinabi ng weather state bureau na maaaring daanan ng bagyo ang Visayas at Mindanao at tutungo sa Palawan; posible rin anila itong mag-recurve palayo sa kalupaan.

Kaugnay nito, sakali mang matuloy ang pamumuo ng bagyo sa loob ng PAR ay papangalan itong “Auring”.—sa panulat ni John Riz Calata

 Ipinag-utos ni Executive Secretary Lucas Bersamin sa lahat ng presidential appointees sa presidential Communications Office at attached agencies na magsumite ng unqualified courtesy resignations.

 Ayon kay Executive Secretary Bersamin, sa kabila ng ipinag-utos na pagbibitiw ay ipagpapatuloy pa rin ng mga apektadong opisyal ang kanilang mga trabaho hangga’t wala pang abiso si Pangulong Ferdinand Marcos Jr.

 Nabatid na kamakailan lamang ay nanumpa na bilang bagong acting Secretary ng PCO si Jay Ruiz kasunod ng pagbibitaw sa pwesto ni dating acting Secretary Cesar Chavez.—sa panulat ni John Riz Calata

 Simula na ngayong araw, March 2, ang sagradong buwan ng Ramadan.

Ito ayon kay Bangsamoro Grand Mufti and Executive Director of the Bangsamoro Darul-Ifta’ Sheikh Abdulrauf Guialani, ay dahil walang sighting ng crescent moon noong Biyernes, February 28.

Binigyang-diin ni Dir. Guialani, na mahalagang aktibidad ang moon sighting sa pagtukoy ng pagsisimula ng bagong lunar month.

Kaugnay nito, hinimok ng Bangsamoro Official ang muslim community na makiisa sa pagsasagawa ng fasting, prayer, at reflection, alinsunod sa mga katuruan ng islam.

Samantala, nauna nang nag-abiso ang Bangsamoro Autonomous Region in Muslim Mindanao goverment ng mas pinaikling working hours sa lahat ng ministry, tanggapan, at ahensya ng rehiyon.—sa panulat ni John Riz Calata

Kapwa sumadsad ang ratings nina Pangulong Ferdinand Marcos Jr. at Vice President Sara Duterte.

Ayon sa isang non-commissioned survey, bumaba sa 30.1% ang nasiyahan sa performance ni Pangulong Marcos nitong nakalipas na February 2025 mula sa 45% noong September 2024.

Gayundin, bumaba sa 47% nitong February 2025 ang performance rating ni VP Sara mula sa 41% noong September 2024.

Ang naturang survey ay isinigawa noong February 10 to 18 sa 1,814 adults sa buong bansa.   —sa panulat ni Roma Molina

Umabot na sa halos 60 ang namatay sa Congo dahil sa “mystery disease” outbreak.

Ayon sa mga Health Official, lumagpas na rin sa mahigit isanlibo katao ang naapektuhan ng nasabing sakit.

Hanggang sa ngayon ay tinutukoy pa rin ng mga eksperto kung ano ang dahilan ng pagkalat ng “mystery disease”.

Samantala, bukod sa nasabing misteryosong sakit, laganap din ngayon sa Congo ang sakit na malaria. —sa panulat ni John Riz Calata