NATIONAL NEWS

Maaaring resulta ng selective interpretation ng konstitusyon o isang political strategy ang patuloy na pagtanggi ng Senado na mag-convene bilang impeachment court para litisin si Vice President Sara Duterte.

Iginiit ni Bataan Rep. Geraldine Roman, Chairperson ng House Committee on Women and Gender Equality, na malinaw na agad-agad ang ibig sabihin ng katagang “forthwith” na nakasaad sa probisyon ng impeachment sa konstitusyon.

Dahil dito, kinuwestyon ni Rep. Roman kung bakit patuloy na inaantala ng liderato ng Senado ang paglilitis sa impeachment sa kabila ng malinaw na mandato ng batas.

Aniya, maaari rin namang isang estratehiyang politikal ang pagka-antala, partikular na ng mga senador na tumatakbong muli sa eleksyon dahil isang malaking isyung pang-eleksyon na ang impeachment case.

Bagama’t naglabas na ng special order ang Senado na naglalatag ng petsa para sa paglilitis ng impeachment, sinabi ni Rep. Roman na mas nanaisin pa rin ng Kamara na masimulan ito ng mas maaga. —sa panulat ni Kat Gonzales

Handa ang pamahalaan na tugunan ang tumataas na heat index sa bansa, lalo na ang epekto nito sa ekonomiya.

Ito ang tiniyak ni Presidential Communications Office Undersecretary Atty. Claire Castro kasunod ng anunsyo ng PAGASA na umabot sa danger category ang heat index na naitala sa Quezon City at Clark Airport sa Pampanga.

Ayon kay Usec. Castro, patuloy na pinaplantsa ng pamahalaan ang iba pang hakbang upang tugunan ang sitwasyon.

Nabatid na simula kahapon hanggang ngayon ay ilang lokal na pamahalaan at paaralan na ang pansamantalang nagsuspinde ng face-to-face classes bilang tugon sa forecast ng pagasa ukol sa heat index sa ilang bahagi ng Luzon.—sa panulat ni Kat Gonzales

Ilulunsad ng isang Faith-Based group ang kampanya nitong “People’s impeachment,” na layong mangalap ng isang milyong pirma kada buwan.

Ito’y para itulak ang Senado na agad umpisahan ang impeachment hearing laban kay Vice President Sara Duterte.

Ayon sa grupong Kontra ABO (Abusive Behavior and Oppression)—isang alyansa ng mga pari, pastor, laypeople at mga mananampalataya, layunin ng signature drive na igiit sa mga Senador na simulan ang impeachment proceedings sa lalong madaling panahon at huwag nang ipagpaliban hanggang Hulyo, gaya ng naunang pahayag ni Senate President Chiz Escudero.

Pahayag ng grupo, mismong ang taumbayan na ang kikilos kung tatanggi ang senado na agarang kumilos kaugnay ng impeachment laban kay VP Sara.

Samantala, bilang panimula, ilulunsad ng Kontra ABO ang kanilang unang malaking pagkilos na tinawag nilang “Sunog Sala,” ngayong araw, Marso 4, ika-10 ng umaga, sa Sacred Heart Parish sa Kamuning, Quezon City. —sa panulat ni Kat Gonzales

Nahuhuli ang Pilipinas pagdating sa ‘work-life balance’.

Ito’y batay sa isang pag-aaral ng Global Human Resource group remote sa Global Life-Work Balance index 2024.

Ayon sa isinagawang data analysis ng World Top 60 GDP countries, nasa 59 na pwesto ang Pilipinas mula sa 60 bansa sa mundo.

Sinundan naman ito ng nigeria, na mayroon lamang 16.15 index score.

Kabilang sa index ang statutory annual leave; minimum wage; healthcare system; happiness index score at average hours worked per week.

Kaugnay nito, nanguna ang Wellington, New Zealand sa index score na may 80.76 ng mga bansang may work-life balance.

Sinundan naman ito ng Dublin, Ireland na may 77.89 at ang Brussels, Belgium na man ay 73.45. —sa panulat ni Alyssa Quevedo

Nilinaw ng Department of Transportation na hindi isasara ang edsa busway sa kabila ng naka-ambang rehabilitasyon sa kahabaan ng naturang kalsada.

Ayon kay Transportation Secretary Vince Dizon, nagpulong na ang kagawaran kasama ang department of Public Works and Highways para sa inaasahang pagsisimula ng edsa rehab ngayong buwan.

Tuloy-tuloy anya ang biyahe ng mga bus sa Edsa Carousel kahit magkaroon ng pagkukumpuni sa naturang kalsada.

Idinagdag pa ng Kalihim, na posibleng magpatupad ng adjustments sa biyahe depende sa kung saan magkakaroon ng construction activities.

Kaugnay nito, target naman ng kagawaran na isabay edsa rehab ang pagsasaayos din sa mga istasyon ng Edsa Bus Carousel.

Iginiit ni Senate President Chiz Escudero na hindi dapat ikabahala ng mga pilipino ang paglabas sa bansa ng malaking halaga ng tinatawag na “hot money.”

Ito’y dahil pumapasok at lumabas naman ang naturang pera.

Ayon sa Senate President, dapat naka-batay sa mga tinawag na long term investment o foreign direct investment ang paglago o pag-unlad ng ekonomiya ng isang bansa.

Paliwanag ng Senador na ang ‘hot money’ ay pondo na kontrolado ng mga investor na aktibo sa short term returns o mabilisang kita.

Kapag umalis anya o lumabas sa isang bansa ang ‘hot money’ ibig sabihin ay may nakita sila na mas mataas na return o kita sa ibang bansa.

Kahit may 283.7 million dollars na hot money na lumabas sa bansa nitong nakalipas na mga buwan, hindi ito reflection ng short, medium at long term stability ng Pilipinas.

Sa huling datos ng Bangko Sentral ng Pilipinas, ipinakita ang paglabas sa bansa ng 283.69 million US dollars pagdating sa foreign portfolio investments noong Enero.—ulat mula kay Cely Ortega Bueno (Patrol 19)

Nilinaw ni Presidential Communications Office Secretary Jay Ruiz na galing kay Executive Secretary Lucas Bersamin ang memorandum na nag-aatas sa lahat ng Presidential appointees na magsumite ng kanilang courtesy resignation.

Sinabi ni Ruiz, na bahagi ito ng mga direktibang kailangang sundin dahil kinakailangan ng pagbabago sa ahensya.

Iginiit pa ng Kalihim, na hindi personalan, at hindi madadaan sa palakasan, pagiging kakilala o kaibigan ang pagkuha niya ng mga tao, kundi base sa trabaho at kakayahan.

Kasabay nito, ibinunyag ng kalihim na may mga insidente ng leakages o pagkalat ng sensitibong impormasyon sa PCO.

Bukod sa mga leakage, inamin din ni Ruiz na may nangyayari ring intriga at siraan sa loob ng ahensya, bagay na nakaaapekto sa kanilang trabaho.

Sa ngayon, kinumpirma ni Ruiz na may ilang Presidential appointees na ang nagsumite ng kanilang courtesy resignation, kabilang ang ilang opisyal na itinalaga ni dating acting PCO Secretary Cesar Chavez. —ulat mula kay Gilbert {Perdez (Patrol 13)

Kumbinsido si Palace Press Officer at PCO Undersecretary Claire Castro na pipilitin pa ring kayanin ng pamahalaan na maabot ang kagustuhan ni Pangulong Ferdinand Marcos Junior na maging 20 pesos kada kilo ang presyo ng bigas.

Ayon kay Atty. Castro, walang kuwestiyon na nais ng pangulo na maabot ang nasabing kagustuhan.

Kaya’t sisikapin aniyang kayanin ng Pangulo na mapababa ang presyo ng bigas.

Muli namang binigyang-diin ni Castro na base sa mga nakaraang statement ni PBBM ay kagustuhan o pagnanais lamang, habang wala naman itong binanggit na pangako na maibaba pa sa 20 pesos kada kilo ang presyo ng nasabing commodity.

Sa kabila nito, tiniyak ng Malakanyang na patuloy ang kanilang pagsisikap ng administrasyong Marcos para maibaba ang presyo ng nabanggit na produkto. —ulat mula kay Gilbert {Perdez (Patrol 13)

Sen. Pimentel, bukas sa alok ni Sen. Tolentino na siya muna ang mamuno sa Senate Rules Committee para sa pag-draft ng senate rules para sa impeachment case ni VP Sara

Bukas si Senate Minority Leader Koko Pimentel sa alok at rekomendasyon ni Senate Majority Leader  Francis Tolentino na mangunguna siya sa pag-draft ng rules ng Senado para sa magiging proseso sa impeachment case laban kay Vice President Sara Duterte.

Ayon kay Senador Pimentel, walang problema sa kanya kung siya man ang italaga na mangunga sa pag-draft ng rules

Lima lamang anya silang abogado sa senado kaya baka wala ng ibang choice o mapagpilian.

Idinagdag pa ng Senador na hihintayin niya muna ang kanyang official assignment bago niya talakayin sa kanyang mga staff.

Giit ni Senador Pimentel, tulad ni senator tolentino, kandidato rin siya pero handa siya na ilaan ang kanyang oras sa paggampan ng tungkulin bilang senador. —ulat mula kay Cely Ortega Bueno (Patrol 19)