HOT STORIES OF THE WEEK

Iminungkahi ni Senator Robinhood ‘’Robin’’ Padilla ang paglalagay ng cable car bilang solusyon sa mabigat na daloy ng trapiko.

Inirekomenda ito Padilla sa gitna ng sesyon kahapon sa plenaryo kung saan ipinanawagan din ni Senator JV Ejercito ang pagpapaunlad ng railway system ng bansa.

Ayon kay Padilla, nauuso ang paggamit ng ropeway sa mundo na makikita rin sa San Juan City kung saan gumagamit ng cable para sa transportasyon.

Akma aniya ito lalo na sa Metro Manila na may pinaka-mabigat na daloy ng trapiko.

Tutol ang Metro Manila Mayors sa panukala ng Land Transportation Office (LTO) na suspendihin ang No-Contact Apprehension Policy (NCAP).

Ipinaliwanag ni Quezon City Mayor Joy Belmonte na noong Hulyo lamang nila inilarga ang NCAP at nagkaroon ng test run noong 2021 para matukoy ang mga problemang kahaharapin ng nasabing polisiya.

Ayon kay Belmonte, hindi sapat na batayan ang sinasabi ng LTO Na mayroon pang mga dapat plantsahin sa implementasyon ng NCAP kaya’t dapat itong suspendihin gayong nagkaroon naman na ng test run.

Bukas naman anya silang baguhin ang penalties at makatutulong kung pare-parehas sila ng iba pang metro mayors na magpatupad ng magkakatulad na multa.

Sa panig ni Valenzuela Mayor Wes Gatchalian, aminado itong bagaman tutol siya sa hirit ng LTO, malaking hamon naman para sa kanila ang pagpapatupad ng NCAP sa lungsod, lalo sa mga bike lane.

Makitid anya ang mga kalsada sa Valenzuela at halos kalahati ng kotse o minsan nakapatong na sa linya ang mga sasakyan na nakukunan ng larawan.

Iginiit ni Gatchalian na noon pang 2019 nila ipinatutupad ang NCAP at aabot na sa 200,000 violators ang nahuhuli at umaabot sa 2,000 hanggang 3,000 pesos ang multa depende sa violation.

Itinanggi ni Vice President at Education Secretary Sara Duterte-Carpio ang akusasyon ng grupong laban ng masa na siya ang nasa likod ng kinakaharap na kaso ni dating vice prsidential candidate Walden Bello.

Nanindigan si VP Inday na hindi siya kailanman naghain ng kasong libel.

Ayon kay Duterte-Carpio, sa halip na kaladkarin siya sa issue at manisi o maghinala si Bello na biktima ito ng isang political persecution, dapat paalalahanan ang dating kongresista na hindi iginagalang ng sibilisado at demokritong lipunan ang kayabangan.

Hindi anya pina-protektahan ng karapatan sa malayang pagsasalita at pagpapahayag ang sinumang naninira ng puri at reputasyon ng iba.

Lunes nang arestuhin ng Quezon City Police District si Bello sa kasong cyber libel na inihain ni Jefrey Tupas, dating information chief ng Davao City.

Nag-ugat ang kaso sa paratang ni Bello na gumagamit at tulak ng droga si Tupas na magugunitang sinibak sa pwesto ni Duterte na noo’y alkalde ng naturang lungsod matapos dumalo sa isang party kung saan P1.5 million na halaga ng droga ang nasabat.

Isinusulong ng Department of Health ang pagasasagawa ng waste water test ng maruruming tubig laban sa covid-19.

Inihayag ni DOH officer-in-charge Maria Rosario Vergeire na malaki ang maitutulong nito lalo na’t na-detect ang polio virus noon sa ilang imburnal sa Maynila at waterways sa Davao nang nagkaroon ng outbreak sa Pilipinas noong 2019.

Ayon kay Vergeire, mababatid kung saan ang sources ng infection at matutukoy ang mga lugar na high risk sa dahil sa testing ng waste water.

Nitong Marso lamang nang kumpirmahin ng Manila Water na plano nilang magtayo ng laboratoryo para sa covid-19 waste water surveillance.

Gayunman, wala pa anyang inisyatibo ang DOH para sa waste water testing ng monkeypox, na nakapasok na sa bansa.

Asahan na ngayong buwan ang pagpapatupad ng P0.21 sentimo na bawas singil sa kuryente.

Ayon sa Manila Electric Company (MERALCO) ito ay dahil sa mas mababang generation charge bunsod ng mababang bentahan ng kuryente sa Wholesale Electricity Spot Market (WES-M).

Dahil dito, aabot sa P42 ang magiging bawas singil para sa mga kumukonsumo ng 200 kilowatt hour, P104 naman para sa mga kumukonsumo ng 500 kilowatt hour.

Epektibo na ngayong araw ang malakihang bawas-singil sa presyo ng produktong petrolyo.

Ayon sa kumpaniyang Shell, Cleanfuel, Petro Gazz, Seaoil at Caltex, aabot sa P2. 10 ang magiging bawas-singil sa presyo ng kada litro ng gasolina.

Papalo naman sa P2. 20 ang magiging tapyas-singil sa kada litro ng diesel habang P2. 55 naman ang bawas-singil sa presyo ng kada litro ng kerosene.

Nagsimula ang price adjustments kaninang alas-6 ng umaga maliban nalang sa kumpaniyang Caltex na una nang nagpatupad kaninang alas-12 ng madaling araw at Cleanfuel na magpapatupad naman alas-8 ng umaga.

Ayon sa Department of Energy (DOE), ang net increase ng year to date adjustment sa gasolina ay pumalo na sa P19. 65; P32. 35 naman sa kada litro ng diesel; habang P27. 30 centavos naman sa kada litro ng kerosene.

Magpapatupad ng P0.21 na bawas-singil sa kuryente ang Manila Electric Company (MERALCO) ngayong buwan.

Ito ay dahil sa mas mababang generation charge bunsod ng mababang bentahan ng kuryente sa Wholesale Electricity Spot Market o WES-M.

Dahil dito, aabot sa 42 pesos na bawas-singil sa mga kumukonsumo ng 200 kilowatt hour, habang 104 pesos para sa kumokonsumo ng 500 kilowatt hour.

Inihayag ng lokal na pamahalaan sa Panglao Island, Bohol na tinanggal na nito ang mga kubo, stall at iba pang istruktura sa ibabaw ng bahura o sandbar sa lugar.

Ito ay kasunod ng reklamo ng isang turista na bumisita sa isla kung saan umabot sa 26,000 pesos ang ibinayad nila para sa pagkain ng 13 katao.

Permanente na ring ipinagbawal ang ilang tourism activities sa isla tulad ng pagbebenta ng pagkain, snorkeling at diving, pero maaari pa ring mag-sightseeing at picture taking.

Magsasagawa naman ng pagpupulong ang nasabing LGU para talakayin ang mga dapat pang gawin upang mapabuti ang turismo sa naturang lugar.

Sumampa sa 6% o katumbas ng 2.99 million Filipinos ang walang trabaho noong June 2022.

Ayon sa Philippine Statistics Authority (PSA), ito ay mas mataas kumpara sa 2.93 million na naitala noong Mayo.

Nabatid na ang kasalukuyang datos ng unemployment rate sa bansa na 6% ay hindi nagbago simula noong May, na mas mababa kumpara sa 7.7% o katumbas ng 3.77 million noong June 2021.

Bumaba naman ang underemployment rate o mga manggagawa na naghahanap ng mas maraming trabaho sa 12.6% o 5.89 million mula sa 14.5% o 6.67 million.

May panibagong big time rollback sa presyo ng mga produktong petrolyo sa Martes, Agosto 9.

Sa pagtaya ng ilang kumpanya ng langis, maglalaro sa P2.00 hanggang P2.20 ang tapyas sa kada litro ng  gasolina;  P2.10 hanggang P2.30 sa diesel; habang P2.50 hanggang P2.70 naman sa kerosene.

Kabilang sa mga nakikitang dahilan ng rollback sa petrolyo ay ang epekto ng ipinatupad na pagtaas ng US Federal Reserve noong nakaraang buwan.

Ngayong araw inaasahang maglalabas ng abiso ang mga oil company kaugnay sa ipatutupad na bawas-presyo sa langis.

Batay sa pinakahuling paggalaw ng presyo ng mga produktong petrolyo, nasa P19.65 per liter na ang net increase sa gasolina habang P32.35 per liter sa diesel ngayong taon.